Read Konyak Naga KAHTAMYENGHAN 43 Bible Online

KAHTAMYENGHAN 43 - Konyak Naga bible

KAHTAMYENGHAN 43

¹Sha-a Kanan kahtok me seanyaopu yeonge yemeipe ngai.

²Hüyange aope Egypt kahtok mepu iman-e peipu tah kümyapeih iman üpawe imante i, “Üne-o tatüoh, hüyange teman jingne hahying üjingha shakke peikei.”

³Hüpoi Judahwe Ite i, “Kahtapawe tomante mei mei-e iyangki, ‘Numan-e numan ünao numan phei woi yepeima-a, numan-e ü-sheta ye-ngelak.’

⁴Nange toman ünao toman phei shonma-a, toman talak hüyange nangjingne hahying shaklak.

⁵Hüpoi nange I yeshon tamma-a toman minta ngoh; hangjingne kahtawe tomante i, ‘Numan ünao numan phei ye-om ma-a, ü-shetapa-a ye-ngelak.’”

⁶Israel-e i, “Numan-e hangne kahtapa te numan ünao üne-o ngoh nangja she iye üte teshinne shangne tampushi?”

⁷Iman-e jan, “Kahtapawe toman jeng, hüyange temnok jeng, yeonge shangnyakke tonge i, ‘Numan üpa sha-ate ngoiye üyin me ngoh nang kü a? Hüyange numan ünao ja ngoh nangkü a?’ Tüokhei toman-e I ngao kih-e jan. Iye, numan ünaowa tüome yah-e taikei she ikülak she, toman-e hangke shing?”

⁸Hüyange Judah-e Ipa Israel te i, “Naosheha-a ü-phei taine tampha, hüyange toman yayonge tashih ning; hümme nakshih toman, nang hüyange tenok hayimlan-o yelipe üyin me ngohlak.

⁹I jingne tao sakine menglak; ü-yak mepu nange I yutüoh. Taowe nang tangte I woi yepeima-a, hüyange nang sheshao me yetüohma-a, hüma-a jinte nang sheshao me tao ümengne menglak;

¹⁰Hükih hipak winne toman yeshon shihma-a, hakih tingma-a ni me shinne ong tei nehoi ngoh hah shepu!”

¹¹Hüwante iman üpa Israel-e imante i, “Hüke nanglak ne mengma-a hüke lingtüoh: kahta tüopate hünghao üne teman kahtok me ngaipu pelick ümei, ütipheipu muli üjingha, zahtai jelo üjingha, üpe meipu hoi pelak, pistachio hüyange almond lick, tüolan üjingha yah-e hangki ne tümyah.

¹²Tüokhei numan-e yoi yakme ngin üphong ni yahtüoh; hüyange numan nyekhok üju me leih-e phapu ngin-o yayah, aoweshing, ülamja phei teipinpu ngohne ok.

¹³Numan ünao woiyah hüyange mamshe leih yekei.

¹⁴Ütahpa Kahwange I sheshao me numante shüpshe ngene tamtüoh, hüke kahtapawe numan ünao-o lantamlak, hüyange Benjamin numan phei leih yene tamlak. Üjingne-a, tao hayim yenangpe linge tam küma-a, tao ütingme hayim yenangpe ngohlak.”

¹⁵Tüokhei jeihei naolanne phalak hünghaolan, hüyange yak me ngin üphong ni nyeiye yahyange, hüyange Benjamin yahyange Egypt kahtok te tawe Joseph sheshao me iman yong.

¹⁶Aope Joseph-e iman phei Benjamin nge, Iye yoinok shaoshanpa yakjongpa te i, “Tüolan kahta noksate woi intüoh; heeitam hahju me iman ü-phei hahyingpu ngohlak, tüokhei yinmok toitüoh hüyange tüolan tümtüoh.”

¹⁷Joseph-e ipu kih-e kahtapawe ling, hüyange kahtalan Joseph nokte woi in.

¹⁸Hüyange Joseph nokte woi inwante kahtalan nyam, hüyange hüke i, “Üwangpe teman nyekhok me leih-e phapu ngin jingne teman tüome woi in nang; hüyange Iye temante ümeng phawe teman phowe hüyange gadolan yahyange teman-a I jing rha ne anglak yang.”

¹⁹Tüokhei iman Joseph yakjongpa tangte ong, hüyange tafün shongme I phei ngao,

²⁰hüyange i, “Oh Üyongpa, toman üwangpa nük shaklak jingne ta;

²¹hüyange aope toman yayonge onge toman pümjing toman-e ngoiye nyekhok lan, hüwante toman kahta lili nyekhok üjupong me ngin khakshuwe ngoh; tüokhei hatüo toman yak me nishe yah-e peinangki.

²²Hüyange nük shaklak jingne ngin yoi yoi ne toman-e yah-e tai nangki. Ngin-a aowe toman nyekhok me hinne tam toman-e yeshing.”

²³Yakjongpawe janne i, “Numan mongshange tahteih, tahnyam; numan Kahwang hüyange numan üpa Kahwange, numan nyekhok me ngin angtampu ne ok; taowe numan ngin tüoyangki.” Tüophei me Iye Simeon iman sheshao me woipei.

²⁴Hüyange kahtalanna Joseph nokte lye woiye inne, ya poilak jingne imante yeng pha, hüyange iman-e iman ya poi; hüyange iman jing gadolante-o lye uhyinge tam.

²⁵Hüyange heeitam hahju me Joseph üne-o nokte manpeipe, iman-e hünghao tüm; hangjingne iman-e tüome hahlak she jai.

²⁶Aope Joseph nokte ye, iman-e iman phei yah taipu hünghaolan I nokte yah ong, hüyange kahtok ngoiye khuh tawe Ite khüm.

²⁷Hüyange lye iman hangke ngoh-e pei tonge i, “Numan üpa wupa ja jeng numan-e ngaopuwa meiye ngohya? I üne-o üyin me ngoh nang a?”

²⁸Hüwante iman-e janne i, “Nang shaoshanpa toman üpa meiye ngohnang hüyange üne-o üyin me ngoh nang.” Hüyange iman-e yatuh shünge khuh tawe khüm.

²⁹Tüophei me Iye mükwemme lei, hüyange yoinyu üha yoinao Benjamin ngeye i, “Numan-e ükümpa nao jeng üte ipuwa tüone jeya? Shemei, Kahwange nang moiman tüoh.”

³⁰Tüophei me Joseph mamshe yonge tai, hangjingne yoi naote kenne teihpu mongken juteih Iye yetük okpe pei. I ütahte ngaiye pa shap she lak, tüokhei I yoi tüpte ong, hüyange shap.

³¹Tüophei me Iye yoi sheta la, hüyange yu; hüyange yoi nying nyingke mong toloimei yang phei me hüke i, “Shaaji hahlak phatüoh.”

³²Tüophei me iman-e Ite, hüyange I jeiheinao lante, hüyange I phei hahlak Egypt lante, yoi yoi ne hahying ngaitam; hangjingne Hebrew phei jamme Egyptlanne hahlak shupu ne yeje; hangjing ne tüopa-a Egyptlan jingne nulakpa ne ngoh.

³³Aope I jeihei naolanna Joseph phei janhüowe khao me jeiyongpa mepu wange ükümpa te ngoiye khüng linge jeiyong naoli ityange shotne tam, iman hüke shotte okpu nge, iman teilei yange yashan.

³⁴Imante hahyinga Joseph khao mepu pheih-e tam; hüyange Benjamin meitam-a eiha meitam phei üphong nga nyeiye ngoh. Tüokhei iman-e hahying yange I phei mongmei.