Read Konyak Naga KAHTAMYENGHAN 45 Bible Online

KAHTAMYENGHAN 45 - Konyak Naga bible

KAHTAMYENGHAN 45

¹Tüophei me Joseph-a, I sheshao me ngohpulan shongme yoi nying nying te tük-e ye-okpe ngai, hüyange i üngwün, “Ü-shong mepu üshei yantepha.” Tüokhei Joseph-e I jei hei naolan te I jeng ngai-e iwante I shong me ülao aohi-o yenangpe ngoh.

²Hüyange I yeonge üngwün-e Egyptlan hei Pharaoh noksalan-e nehoi jai-e shap.

³Joseph-e I jeihei naolante hüke i, “Taowa Joseph. Üpa sha-a te ngoi-e üyin me ngoh nang a?” Hüpoi I jeihei naolan jamloi mokh-e nyampu jingne hang ngao-o yejan.

⁴Tüophei me Joseph-e I jei hei naolan te i, “Ü-shongte owe wenkei.” Hüyange iman owe wen wante Iye hüke i, “Taowa numan-e Egypt te yah-e teilak jingne yüowe tampu, numan ünao Joseph.

⁵Hüyange sha-a tao yüo yangpu jingne numan yoi nying nying te mongtah shang yesheküma-a mongtah shih; hangjingne kahtalan üyin yinne anglak jingne Kahwang-e numan shao te tao shon-e tam.

⁶Hangjingne kahtoknyu me seanyaopu-a sha-a wangpeng ni shepupa hei ngohnang; sha-a üne-o wangpeng nga ngoi she kah yehamkülak üne-o tahyahpu-o yengoh külak.

⁷Kahwange kahtoknyu me lanshe pa-a mah ne yetampe numan jingne ütam pa-a towe anglak üne-o maapu üyin tük-e anglak jingne shaotan te numan shao me tao shon.

⁸Tüokhei tao hatüo me shonpu-a numan yeje, hüpoi Kahwang ngohnang; hüyange Iye taowa Pharaoh üpa yafün me I jing noksa lanshepu tangme nokpu ne üne-o Egypt kahtok nopu tangme wanglam lampa ne linge tam.

⁹“Mamtüoh, hüyange onge üpa te hüke itüoh, ‘Nangha Joseph-e hüke ngao shonne inang; Kahwange taowa Egypt lanshepu tang me nokpu ne mengtamteki; shon-e yengohpe ü-tangte ta kei.

¹⁰Nang Goshen kahtok me nyoilak, hüyange nang ü-phin me ngohlak, nang hei nanghalan hüyange nanghayim halan, hüyange nang nyee ükhong, mahu ükhong, hüyange nangjing hanghe yin ngoh khongkümpu;

¹¹nang tüome nyoi ma-a nang wongpong üshei taowe namno-e phalak, hangjingne üne-o wangpeng nga seanyaolak ngoh nang, hüke yeling ma-a nang hei nenok noksalan hei numan me nangpu üshei toiheinanpu yafün te takülak.’

¹²“Hüyange sha-a numan mük hei ü-nao Benjamin mük-e hatüo ngao numan te ngao puwa ü ju me ngao she nge okteki.

¹³Egypt kahtok me hangshin tao kheyong hüyange numan mük-e ngepu sheminlamphe jeng üpa te itüoh. Mamtüoh hüyange üpa mamshe yahtai kei.”

¹⁴Hüwante lye yoinao Benjamin üngme kenyange shap; hüyange Benjamin-o I üngme kenyange shap.

¹⁵Tüophei me I shapjang shappe Ijeilan püm leppute üngme kenyange omhüp. Tüophei me nakshih I jeilan-e Iphei teingao.

¹⁶Aope Joseph I jeiheinaolan ta-e ngoh nangki she Pharaoh nok te ngaolan pei, Pharaoh hei I shaoshanpalan üshei mongmei.

¹⁷Pharaohwe Joseph te i, “Nang jeihei naolante, imanjing gado me hangki khak wange kiyange Kanan kahtokte yelak jingne itüoh.

¹⁸Iman-e iman üpa hüyange iman noksalan yahyange tüome leih ye ne tamtüoh. Hüyange Egypt kahtok üshei me shemeipupa nyoi phalak, hüyange tüome iman kahtok üyao wangman-e tüowe nyoilak.”

¹⁹Imante üne-o tüo itüoh, “Hüke lingtüoh: numan hashih nahalan, hei shekolan jingne, Egypt kahtok mepu tongtoi yah yah, hüyange numan üpa woi taikei.

²⁰Numan toinyu nanhalan jingne nüngnei-e tahteih, hangjingne Egypt kahtok lanshepu me shemei pupa-a numan jingne mengteki.”

²¹Imante ngaowe tampu kih-e Israel hayimlan-e ling. Ahngpa ngaowe tampu kih-e, Joseph-e imante tongtoi pha, hüyange lamme hahlak jingne pha.

²²lye iman kahta lep i pu te leijei lak inkhek pha.

²³Iye yoipa te tüo lan shon: Egypt kahtok mepu toimei lan Gado pen ma-e, üne-o gado üpi pen me tah, an hei Ipawe lam me hahlak hahhei ying tüm-e tam.

²⁴Tüophei me lye yoi jeihei naolan shonne tei, hüyange hüke iman yayong wante lye imante i, “Lamme numan tahtee.”

²⁵Iman-e Egypt kahtok tüohyange yayonge nokte ye, hüyange Kanan kahtok me ngohpu iman üpa Jacob tangte ngoi.

²⁶Hüyange iman-e Ite i, “Joseph-a sha-ate ngoiye üyin me ngoh nangki! I-a Egypt kahtok üshei tangme nokpu ne ngoh nang ei!” Jacob yashan-e mongpai hüyange iman ngao te üting yelak ok.

²⁷Hüpoi aope Joseph-e Ite shonpu ngaolan khongkümpu I phei ngao yapeih, hüyange I woilak jingne Joseph-e shonpu tongtoi ngeye, iman üpa Jacob yaha yange ye.

²⁸Jacob-e i, “Hülan! Üha Joseph üyin me ngohnang she ipuwe wangteki, tao ta-e tao lishao me I te leilakeih.”