Read Konyak Naga KAHTAMYENGHAN 46 Bible Online

KAHTAMYENGHAN 46 - Konyak Naga bible

KAHTAMYENGHAN 46

¹Aope Israel yoi me nangpu khongkümpu phei tümyange yayong, hüyange Beersheba ngoi, Iye yoipa Isaac Kahwang te dopu pha.

²Kahwange himang me Israel phei ngao hüyange nyik, “Jacob, Jacob,” Hüyange lye i, “Tao tüome ngohnang.”

³Tüophei me Iye i, “Taowa Kahwang, nangpa mengpu Kahwang. Nang Egypt kahtokte tailak nyamme tahteih; hangjingne Taowe tüome nang jatnyu ne linge tamlak.

⁴Tao nang phei Egypt kahtokte talak, hüyange Taowe nanghu nanghalan tüopa kahmük te yah-e yene tamlak, nang aope lilakei, Joseph nang phei ngohlak.”

⁵Tüophei me Jacob Beersheba mepu yayong. Hüyange I hayimlanne yoipa Jacob, hüyange yoi ha-naolan, hüyange shekonyulan, Egypt ahngpawe shonpu tongtoi me ongne tam.

⁶Üne-o iman-e yoi tampu yinmok, hüyange Kanan kahtok me hanghe toilam ngoh, tüolan khongkümpu yahyange Jacob, hüyange inok lan khongkümpu phei Egypt kahtok te tai.

⁷Hüke lye yoi halan, huyimlan, hüyange yoi nokphong jat hei li khongkümpu yoi phei Egypt kahtok te woi tai.

⁸Sha-a Egypt kahtokte taipu Israel hayimlan min hüke ngoh: Jacob hüyange I hayim; Jacob ü-ha jeiyongpa Reuben,

⁹hüyange Reuben ühalan: Hanoch, Pallu, Hezron, hüyange Carmi.

¹⁰Simeon hüyange I hayim: Jemuel, Jamin, Ohad, Jachin, Zohar, hüyange Kanan shekonyuwe puhpu ha Shaul.

¹¹Levi hüyange I hayim: Gershon, Kohath hüyange Merari.

¹²Judah hüyange I hayim: Er, Onan, Shelah, Perez, hüyange Zerah. (hüpoi Er hei Onan ni-a Kanan kahtok me li.) hüyange Perez hayimlanna Hezron hei Hamul.

¹³Issakhar hüyange I hayim: Tola, Puvah, Jashub, hüyange Shimron.

¹⁴Zebulun hüyange I hayim: Sered, Elon, hüyange Jahleel.

¹⁵Mesopotamia me ngohwante tüolan-a Dinah omme Jacob phei Leahwe puhpu hayim; khongkümpu sheiye hayim kahta delüm me lüm.

¹⁶Hüyange Gad hei I hayim: Ziphion, Haggi, Shuni, Ezbon, Eri, Arod, hüyange Areli.

¹⁷Asher hüyange I hayim: Imnah, Ishvah, Ishvi, Beriah, hüyange iman ünao sheko Serah. Hüyange Beriah hayim: Heber hüyange Malchiel,

¹⁸tüolan-a Laban-e yoi ha Leahte phapu Zilpah hayim, hüyange yhawe Jacobte kahta pen me wok puhtam.

¹⁹Jacob sheko Rachel-e naoshe ni puhtam: Joseph hüyange Benjamin.

²⁰Hüyange Egypt me Joseph hayim ni On mepu ngengpa Potiphera üha Asenath-e puhpu Manasseh hei Ephraim.

²¹Hüyange Benjamin hayimlan: Bela, Becher, Ashbel, Gera, Naaman, Ehi, Rosh, Muppim, Huppim hüyange Ard.

²²Tüolan-a Jacob te Rachel-e puh tampu hayim khongkümpu iyange kahta pen me peli.

²³Dan hüyange Iha Hushim .

²⁴Naphtali hüyange I hayimlan: Jahzeel, Guni, Jezer, hüyange Shillem.

²⁵Tüolan-a Laban-e yoiha Rachel te phapu rhanyu Bilhah hayim, hüyange yhawe Jacob te puh tampu khongkümpu iyange kahta nyit.

²⁶Jacob mepu ngaipu hüyange I phei Egypt kahtok te taipu, yoiha shekonyulan ye-i-pe, khongküm iyange kahta dewok me wok.

²⁷Hüyange Egypt kahtok me Joseph üha ni puh; Egypt kahtokte taipu Jacob nokphong khongküm iyange kahta denyit ngoh yangki.

²⁸Jacob-e Goshen me I phei hüolak jingne Joseph tangte Judah shaoyete shon. Hüyange aope iman ngoi,

²⁹Joseph-e yoi tongtoi tümyange yoipa (Israel) pongte Goshen kahtokte tai. Aope iman hüoyapeih, Joseph-e yoi yakke yoipa üngme ken, hüyange hipak laolünge shap.

³⁰Israel-e Joseph te i, “Shaapa-a tao lilakei, hangjingne shaaji taowe nang sheta ngeteki hüyange nang üyin me ngoh nang she shingteki.”

³¹Tüophei me Joseph-e I jeihei naolan hüyange Ipa nok kahtalan te i, “Tao taiye ahngpate hatüo iküning; ‘Kanan kahtok me ngohpu ü-jeihei naolan hüyange üpa noksalan, ü-tangte peiteki.’

³²Taowe Ite hüke ilak, ‘iman-nyeeyompalan, hüyange yinmok te nam nowe tampalan, iman-e yoi nyee, mahu ükhong, hüyange shemin lamphe yahyange tateki.’

³³Aope Ahngpawe numante nyik yange, ‘Numan hanghe lingpulan shi?’ she tonglakei,

³⁴hüwante numan-e hüke jantüoh, ‘Hüke nang shaoshanpalan-e naha memuh sha-ate ngoiye tampu yinmok yompu kahtalan; toman jing pajeiyong lanne hangke ling hüke toman-o ngoh nang.’ Hüke ngaopu jaiwante lye numan-a Goshen kahtok me ngohne tam phalak. Joseph-e tüopa ngaowe tam, hangjingne ima-a Egyptlan jingne nyeeyom puwa hang wongpong ne-o üjepu wanglam ne ngoh.”