Read Konyak Naga KAHTAMYENGHAN 48 Bible Online

KAHTAMYENGHAN 48 - Konyak Naga bible

KAHTAMYENGHAN 48

¹Hipak ütenja linyang phei me Ipa dak nangki she Joseph te ngaolan pei. Tüokhei lye yoiha Manasseh hei Ephraim ni yahyange Jacob phei hüolak jingne tai.

²Aope Jacob te I phei hüolak jingne yoiha Joseph peinangki she ngaowe tam, lye yoi wong khongkümpu yahyange lüo hüyange leng me shot.

³Hüyange Jacob-e Joseph te i, “Kanan kahtok Luz nyoi me Ütahpa Kahwang ü-tangte ngai, hüyange üte moiman tam,

⁴lye üte i, ‘Leihuyah, Taowe nang te hayimlan maawe phalak, tüokaiye nang huyimlan mepu jatlan maawe ngailak. Taowe tüopa kahmük-a nang mepu huhayimlan te jintepu jingne iman jing moth ne menglak jingne phalak.’”

⁵Jacob-e yelakpe ngao, “Joseph, nangha ni, tao tüome tashao me aoyin Egypt me nangte puhtam, imni-a üjing. Ephraim hei Manasseh ni-a ü-ha Reuben hei Simeon ni shinne ngoh nang.

⁶Nang me ülao hayimlan üne-o ngohma-a, iman üjing she i ne ye-ok lak, iman jalunpu huhayimlan-a Ephraim hei Manasseh ni kaiye hei tüolak.

⁷Taowe hatüo lingpuwa nangnyu Rachel jing üne lingnang. Tao Mesopotamia mepu leih yewante, Ephrath mepu meiyange yejaipe tao mongmengpu üyong pu phei Kanan kahtok me yha li. Taowe yha-a tüoken Ephrath lamnyu nah me muwe tam.” (Tenyih, Ephrath te-a Bethlehem she nyiknang.)

⁸Aope Israel-e Joseph hayim nge, lye tong, “Tüolan nahalan-a aoshi?”

⁹Joseph-e Ipa te janne i, “Tüolan-a Kahwange üte Egypt kahtok tüome phapu ü-halan üja.” Hüwante Jacob-e i, “Chingmei lam linge iman ü-tangte yah wenkhu, taowe iman moiman tamlakei.”

¹⁰I wupa ne mengpu jingne Jacob mük pomteiye ngoh; hüyange lye hango meimei-e ye-nge ok. Tüokhei Joseph-e imni I shongte woipei hüyange lye imni te kenyange omhüp.

¹¹Jacob-e Joseph te i, “Taowe nang sheta nishe ngelak she aope-o yeteih; hüpoi leihu, Kahwange shaapa-a nangha nehoi üte ngene tamnang.”

¹²Hüwante Joseph-e Jacob yungtang mepu yoi ha ni yah, hüyange I sheshao me kahtokte sheta khuhta shotne tam.

¹³Joseph-e Jacob yaknya ye me Ephraim hüyange I jing yakjah ye me Manasseh ange tam.

¹⁴Hüpoi Jacob-e yoi yak jiengpei, hüyange I naolipa ne mengyapoi Ephraim shang me lye yoi yakjah ye shüng, hüyange jeiyongpa ne mengpu Manasseh shangme yoi yaknya ye-e shüng.

¹⁵Tüophei me Iye Joseph te moi man phawe tam: “Kahwang ao te üpayim Abraham hei Isaac lanne shaoshan, tüopa Kahwange tüolan naoshe lante moiman shih! Tüopa nyih hipak ngoiye aowe üte lam woipei, tüopa Kahwange imante moiman shih!

¹⁶Wangdang shongmokpa aowe ümeng üshei mepu tao yinne tam, moiman tamshih! Ü-min hüyange üpayim Abraham hei Isaaclan min tüolan nahalan kaiye üyin me angshih! Iman me hayimlan üngang hüyange huhayimlan üngang ngohtam shih!”

¹⁷Aope Joseph-e Ipa yak yakjah ye-e Ephraim shangtang me shünge nge, I mong yehah ok; hüyange Ephraim shangtang mepu Manasseh shang me shüngne tamlak jingne Ipa yak yah.

¹⁸Hüyange Joseph-e Ipate i, “Opa, hüke yeje; hatüowa üwangne puhpu ha; I shangtang me nang yakjah ye-e shüng tüoh.”

¹⁹Hüpoi Ipawe yemong hüyange i, “Taowe shing nang, üha, taowe shinge ngoh nang. Manasseh huhayim lan-o kahta üyonglan ne menglak; hüyange yonge lüowe ngailak. Tüoyangpoi Inao I phei sheyongpupa ne menglak, hüyange I huhayim lanna jatnyu üyongne menglak.”

²⁰Tüokhei tüopa nyih me lye imante moiman phawe i, “Aope iman-e moiman yuwe ngaolakei, hüwante Israel lanne numan min jonlak. Iman-e ilak, ‘Kahwange nanga Ephraim hei Manasseh kih-e linge tamshih.’ ” Hükih-e linge Jacob-e Manasseh shaoma-a Ephraim angne tam.

²¹Tüophei me Jacob-e Joseph te i, “Nange ngepu kih-e, taowa shaaji li ne o-nang; hüpoi Kahwang nang phei ngohlak, hüyange lye nang numan jing pajeiyonglan kahtok te woi leih yene tamlak.

²²Tüo tokte taowe nangjei yimante yeje, nangte Shekhem, üyao pheipu kahmük phanang; tüopa-a taowe ü-yanglow hüyange wenglah phei Amorlan yak mepu nyieye omme yahpu ngoh nang.”