Read Konyak Naga KAHTAMYENGHAN 49 Bible Online

KAHTAMYENGHAN 49 - Konyak Naga bible

KAHTAMYENGHAN 49

¹Tüophei me Jacob-e yoi hayimlan te nyik-e i, “Numan khongkümpu jemkei, hüyange ngoikülak hipak me numan üyin me hanghe ngaikülak taowe numante ipha ning.

²“O Jacob hayimlan, jamshe jemkei hüyange jaitüoh. Hüyange numan üpa Israel ngao jaitüoh.

³“Reuben, nanga ü-üwang puhpu ha, ü-wongtepu üwangpa ülick. Hüyange tao kahta ne mengpu üwangpa ha, ü-hayim üshei yo me wang ngoipu me, hüyange otamaohepu me nanga ünyei.

⁴Nanga jünge yengoh okpu yeng kih, hüpoi nanga üshuk yüowe yengoh oklak, Hangjingne nange ü-phongphenyu phei shi, Hüyange nangpa jing shinleng nuwe shakke tam!

⁵“Simeon hei Levi ni-a jeiheinao, Imniye imni jing ngou hei yanga ümeng omlak jingne jon.

⁶Iman-e lowe teingaopu me tao ye-omlak, yejema-a, iman-e taishopu me taowe meitam yeyahlak. Hangjingne mongshih ngaiyange iman-e kahta toinang. Hüyange iman mongshih ngaipu me wonwanglak jingne mahu üponglan yafai tamnang.

⁷Iman mongshih ngaipu te phoiwümpu ngohtüoh, hangjingne hatüowa nyam nyam she, Hüyange iman shih khahpute phoiwümpu ngoh tüoh, hangjing ne hatüowa loishe mengshi! Taowe Israel kahtok üshei ye me iman tee-shai tamlak, Taowe iman-a tüopa mepu kahtalan yo me yanne tamlak.

⁸“Judah, nang jeihei naolanne nangte minyong phalak. Nange nangtepu wepalan üngme tüklak. Nang jeihei naolanne nang sheshao me khuhtawe khümlak.

⁹Judah-a yengkong mailang kih-e, Ite shangne tampa toiyange hüyange yoi longsa te leih ye. Laowe kangyange hüyange lamme tawe shi yange, yengkong mailang kih-e Ite pokke nolak aowe-o mong üyong ok.

¹⁰Judah mepu ahngpa shengshaoh yeyanlak, Yejema-a I mepu huhayim lanne jinte wanglam lamlak. Jatlan-e Ite yihnoonne poonpu yah peilak, Hüyange I sheshao me yihnoon-e ümme khümlak.

¹¹Iye yoi gado üha wuwüngwu ja me shinnang, Shemeipupa wu me shinne tamnang. Iye yoijing inkhek lan-a iy kih-e takpu wuwüngti me shaonang.

¹²I jing mük-a wuwüngti phei shütak, hüyange I fa-a düamyeng phei sheheng.

¹³“Zebulun yengching nah me ngohlak: I-a yengching nah me yenglin angjing nyoi ne menglak; I jing yikenga Sidon te ngoi she ngohlak.

¹⁴“Issakhar-a gado ja phei shemeipupa ne yejelak, Shotjing monnye pa me wük kange lamyange,

¹⁵Hüpoi toloimeilak nyoi-a meinang she lye nge ok, Hüyange tüopa kahtok-a yahhu jakke, Tüokhei lye hangki kilak jingne yoi tok shan hüyange kange rhapa ja kih-e toi lingne tam.

¹⁶“Dan-a yoi kahtalan jingne wanglam lampa ne menglak. Iman-o Israel ülao nokphonglan kih-e ngohlak.

¹⁷Dan-a lamnah me ngohpu pu kih-e ngohlak, Lamnah me ngohpu pujam ja ne, Tüopawe koipong ya-ong te jotlak, Tüokaiye tüopa tok me ongpulan yeiyange tokpheite yelak.

¹⁸O Youngwanpa, nange yintamlak jingne taowe tannang.

¹⁹“Wepalan-e Gad te toi ne lüklak, hüyangpoi Gad-e pahi iman ya-ong te mette jang tamlak.

²⁰“Asher jing kahtok-e hahying shemeipa ngailak, Iye ahngpa jingne khakshupu hahying phapu oklak.

²¹“Naphtali, hangko yeteihpe phette okpu tok üpi, Aome yahhu keipu nyoi ngoh hüonang.

²²“Joseph-a lickpu manpu peequi, Lümlei wante lickpu manpu peequi I mepu üquiye longpenyu te küppe yüoh nang.

²³Lahhan pheipu lan-e Ite yemeipe shüm, Ite kep, hüyange ma-o ngaiye Ite shu-ngüm.

²⁴Tüoyangpoi I lahhan yepope ngoh, Hüyange I jing yak wongnangne tam Jacob wongnangpu Kahwang üngan wonge, Israel yintampa, nyeeyompawe.

²⁵Hatüowa nangpa jing Kahwang, aowe nangte jam-e pong, Ütahpa Kahwang aowe nangte moimannang, Wang mepu moimanlan wai phei hüyange kahtok ümong mepu shelupupa yeng mepu tampu yinmok üngang hüyange hayimlan moimanlan phei;

²⁶Tahlick hüyange jupenglan moimanlan, üshong wantepu kahmüohlan mepu moimanlan, üküm yenangpu kahtanglan mepu, minyong ngampaipu toishaolan. Tüolan moimanlan-a Joseph shangtang me ngoh ne tamshih, Aohipa yoi jeihei naolan mepu yanne ang, tüopa shekeng me.

²⁷“Benjamin-a phao shopong mengshipupa kih ngohlak, Shomme hüyange ünpong me Iye toilak hüyange hahnyak puphei hahyinglak.”

²⁸Tüolan khongkümpuwa Israel nokphong pen me ni; hüyange yoite shupu moiman jeng iye, iman üpawe yoiha pümlep pute ayou ngaowe tam.

²⁹Tüophei me Jacob-e yoi hayimlan te ngaowe i, “Shaaji taowa ü-phei pulan phei jamme ngohlak jingne taining; tüokhei Hitlan Ephron kahjee me ngohpu longsa me menyih hongnyihpu üpayim phei tao angtam pha;

³⁰Kanan kahtok me Mamre ongjing yekao, Machpelah me ngoh nang. Abraham-e tüopa longsa hüyange Ephron mepu kah-a mangjong üne shak.

³¹Tüolan me iman-e Abraham hei I shekonyu Sarah mu; hüyange tüome Isaac hei I sheko Rebekah iman-e mu; hüyange tüoken me taowe Leah mu;

³²Tüopa kah hüyange tüome ngohpu longsa-a Hitlan mepu shak yangki. Tao tüoken me muwe tampha.”

³³Aope Jacob-e yoihalan phei ngaowe sho, I ya shinleng te nowe in, hüyange ükümpa lüohe; hüyange I shao me li pulan phei om-e tai.