Read Konyak Naga KAHTAMYENGHAN 7 Bible Online

KAHTAMYENGHAN 7 - Konyak Naga bible

KAHTAMYENGHAN 7

¹Tüophei me Youngwanpawe Noah te i, “Nang hüyange nenok noksa khongkümpu ghonu te ongtüoh; hangjingne tüopa jin me khakshupuwa nang ja shing she Taowe ngeteki.

²Nang phei jaoshepu yinmok ülam lili mepu üpi hei üpong nishep nyitpong yahtüoh; hüyange yejao yeshapu yinmoklan mepu nipong üpong hei üpi;

³hüyange wang awhalan mepu-o nishep nyit pong, üpong hei üpi, kahtoknyu üshei me üli üyin anglak jingne yahtüoh.

⁴Tüolan nyih nyit shepupa me Taowe nyih deli hüyange pha deli kahtoknyu me wai keine tamlak; hüyange üyin ngohpu üshei, hangheyin Taowe lingengai, Taowe kahtoknyu mepu mah-e tamlak.”

⁵Hüyange Youngwanpawe Ite ngao phapu kih-e Noah-e khongkümpu ling.

⁶Aope kahtoknyu te yeng muleam pei Noah wangpeng gho wok lwngmei ne ngoh yangki.

⁷Hüyange Noah hei I halan, I sheko hei nyemnyalan yeng muleam pu mepu yinlak jingne I phei ghonu te ong.

⁸Üjao yinmok yo mepu, hüyange yejao yeshapu yinmok yo mepu hüyange awhalan yo mepu, hüyange kahtok me leh-e kempu üshei mepu,

⁹nini, üpong hei üpi, Kahwange Noahte ngao phapu kih-e Noah phei ghonu te ong.

¹⁰Hüyange nyih nyit linyang phei me kahtoknyu te muleam.

¹¹Noah jin hipak wangpeng gho wok, leat ni shepupa, nyih pen me nyit shepupa me, tüonyih yengpeiwo ülu-üyonglan phüppe ngai, hüyange wang tawolan ep.

¹²Kahtok te nyih deli hüyange pha deli wai kei.

¹³Tüonyih muh Noah hüyange I halan-Shem, Ham hüyange Japheth, hüyange Noah sheko, hüyange iman phei nyemnyalan lüm-a ghonu te ong;

¹⁴iman hüyange phao yinmok üshei ülam lili, hüyange ching yinmok üshei ülam lili, hüyange chahwan me leh-e kempu üshei ülam lili, hüyange awhalan üshei ülam lili, üyang nyimpu üshei ülam lili,

¹⁵üyin lüohe ngohpu mei üshei nini iman Noah ghonu te ong.

¹⁶Hüyange iman ongpulan, mei üshei üpong hei üpi Kahwange Ite ngaophapu kih-e ümongte ong, hüyange Youngwanpawe I-a ümong me küp.

¹⁷Muleampu chahwannyu me nyih deli ngoh; hüyange yeng-a loi-e ngai hüyange ghonu-a phoonge in, hüyange hatüowa chahwan mepu daowe nowe in.

¹⁸Hüyange yeng loishe yonge chahwannyu tangme ngai, hüyange ghonu-a yeng tangme phoong.

¹⁹Hüyange chahwannyu dangme yeng loishe yonge ngaipuwe wangphang me ngohpu kahtang üdaolan khongkümpute lüm.

²⁰Kahtanglan kaiye ongpu yeng yakkong pen me nga luwe tüolante lüm.

²¹Hüyange chahwan tangme powe kempu yinmok mei üshei, awhalan, ching yinmoklan, phao yinmoklan, chahwan tangme shom-e kempu üshei li;

²²hüke kahmük üwan tangme ngohpu nateang me lüohe üyin üshei li.

²³Iye kahtok me ngohpu üyin üshei mahne tam, kahta hei yinmoklan hüyange shom-e kempu hei wang awhalan üshei; iman-a chahwan tang mepu mahtam. Noah hüyange Iphei jamshe ghonute ongpulan shaha towe tüoh.

²⁴Hüyange chahwan tangme yeng muleampu nyih ghoja denga ngoi-e ngohyangki.