Read Konyak Naga KAHTAMYENGHAN 8 Bible Online

KAHTAMYENGHAN 8 - Konyak Naga bible

KAHTAMYENGHAN 8

¹Hüpoi Kahwange Noah hei I phei ghonu me ngohpu üyin yinmok üshei hüyange ching yinmok üshei teih-e tüo; hüyange Kahwange kahtoknyu me wangyang ja leine tam, hüyange yeng-a eamah;

²yengching yengpeiwo hüyange wangdang tawolan küp; hüyange wangmepu yeipu wai tüke lak,

³hüyange yeng-a kahtoknyu mepu yelakpe jüppe mah. Hüyange nyih gho ja phei me denga ngoi phei me yeng-a eamah,

⁴hüyange leat nyit, hüyange nyih pen me nyit shepupa nyih me ghonu-a Ararat kahtang me ngoi.

⁵Yeng-a yelakpe jüppe ta, hüyange leat pen shepupa üwangpa nyih me kahtang shedaopupa ngeye wangyangki.

⁶Nyih deli phei me Noah-e Iye lingpu ghonu tawo ep,

⁷hüyange lye khawang ja shonne tei. Tüopa leih-e üye hüyange yeng-a kahtoknyu mepu jaosheye ea manmah manmah lingleiye puwe ngoh.

⁸Tüophei me kahtok mepu yeng-a hüm-e lakman shi she shinglak jingne, lye awshu ja shonne tei;

⁹hüpoi awshuwa yoi yaloklak yetüopu jingne, I tangte ghonu te muh leih ye, hangjingne kahtok üshei me yeng ngoh. Tüokhei, üne-o Iye yoi yak ngaiye I yahyange yoi phei ghonu me in.

¹⁰lye üne-o nyih nyit tanne ngoh, hüyange nishe lye awshuwa ghonu mepu shonne tei;

¹¹hüyange awshuwa ünpong me I tangte leih ye, hüyange leihu, I ju me olive peyak üla ja jepyange ngoh. Tüokhei yeng-a kahtok te hümme yeteki she Noah-e shing.

¹²Hüyange Iye üne-o nyih nyit tanyange, awshuwa shonne tei, tüo ünpa-a I tangte leih üye.

¹³Noah wangpeng gho wok phei me ja shepupa, üwangpa leat, hüyange üwangpa nyih me, yeng-a chahwannyu mepu eamah; tüophei me Noah-e ghonu te küppu epyange lei, hüyange leihu, kahtok-a ea-teiye ngoh.

¹⁴Leat ni shepupa, nyih da me nyit shepupa me kahtok meimei-e eamah yangki.

¹⁵Tüokhei Kahwange Noah te i,

¹⁶“Nang, hüyange nenok sheko, nahalan hei nyemnyalan ghonu mepu yutüoh.

¹⁷Mei üshei yomepu nang phei üyin ngohpu üshei, awhalan hei ching yinmoklan, shom-e kempu yinmok hangheyin kahtoknyu me pah-e tainang, nang phei ghonu mepu ngaitüoh; hüke iman chahwannyu me wangmanne puh-e hüyange jalunne chahwannyu me ngailak.”

¹⁸Tüokhei, Noah, I hayimlan, hüyange I sheko hei nyemnya nyulan ngai.

¹⁹Hüyange yinmok üshei, wang awhalan üshei, hangheyin kahtoknyu me po nang, yoi yoi ükhong ghonu mepu yu.

²⁰Tüophei me Noah-e Youngwanpa jingne wümjong ja ling; hüyange jaoshepu yinmok mepu, hüyange jaoshepu awhalan mepu yahyange lye wümjong me jak dopu ja do.

²¹Hüyange dopu phawe Youngwanpa mongmei ne tam, hüyange Youngwanpawe yoi nying nyingke hüke i, “Taowe kahtanyuha jingne nishe kahtoknyu te yephoilak hangjingne kahtanyuha mongjang me teihpu naha memuh ümeng ngoh nang; yejema-a Taowe lüohe üshei nishe Taowe ja me lingpu kih-e mah ne yetamlak.

²²Kahtoknyu hangshin ngohlakei ngohwante, deidei lilalak hei tah yahpu hipak, wangshüm hei wanglüm, jüo hei eanyu, nyihning yaning ngaipu yelaklak.”