Read Konyak Naga KAHTAMYENGHAN 9 Bible Online

KAHTAMYENGHAN 9 - Konyak Naga bible

KAHTAMYENGHAN 9

¹Hüyange Kahwange Noah hüyange I hayimlan moiman phawe imante i, “Ülick licktüoh, hüyange jaluntüoh, hüyange kahtoknyu maatüoh.

²Hüyange yinmoknyuha, awhalan, hüyange nyah khongkümpuwe numante nyampu phei nyoilak. Kahtoknyu hüyange yengching me maapu yinmoknyuha üshei nang yak me phünne phanang.

³Powe ngohpu üyin yinmok üshei hüyange phümha weangyong ühüng üshei Taowe phapu kih-e numan jingne hahying ne menglak.

⁴Numan-e üyin iy ngohjang ngohpu meei hei yehahlak; hatüowa Taowe tiennang hangne ima-a üyinna iy me ngohnang.

⁵Ütam-e kahta üyin yahma-a, Ite shaoshi yatengne tamlak. Yinmok ütam-e kahta üyin yahma-a, li ne tampuwe Taowe shangne tamlak.

⁶Aoyinne kahta iy shailakei, kahtawe muh I iy shaitam lak; hangjingne I yoi lepu me Kahwange kahtanyuha lingngai yangki.

⁷“Hüyange nang, ülick licktüoh hüyange jaluntüoh, chahwannyu me wangmanne hüyange jaluntüoh.”

⁸Tüophei me Kahwange Noah hüyange I halante i.

⁹“Leitüoh, Taowe numan hei numan phei mepu huhayimlan phei;

¹⁰hüyange numan phei ngohpu üyin yinmok lili phei, awhalan, tampu yinmoklan hüyange chahwannyu me nang pheipu yinmok lili, ghonu mepu ngaipu üshei phei, jiengjeppu angnang.

¹¹Hüyange Taowe numan phei Ü-jiengjeppu monge tamnang; hüke mei üshei shaaji yengyong muleam puwe phoonge yeteilak; hüyange kahtoknyu mahlak üne shaaji muleampu hango yengoh lak.”

¹²Hüyange Kahwange i, “Tao hei numan hüyange numan phei ngohpu üyinlan üshei pa me, üküm yenangpu jin ngoiye, Ü-jiengjeppu yepinlakpa hatüo:

¹³Taowe wangphom me ünyümlong tüoh nang, hüyange hatüo tao hei kahtoknyu nipa me jiengjeppu yepinlakpa ne ngohlak.

¹⁴Aope Taowe wangme wangphom nyeih tamlakei, hüyange nyümlonga wangphom me ngelakei,

¹⁵Taowe jiengjeppu ngao, hanghepa tao hei numan yinmoknyuha üshei pa me ngohnang, tüopa Taowe teih-e tüolak, hüyange yeng kaiye yinmoknyuha üshei mahtamlak ne shaaji muleampu ngaine yetamlak.

¹⁶Aope wangphom me nyümlong ngailakei, Taowe tüote leilak hüyange Kahwang hei kahtoknyu me ngohpu yinmoknyuha nipa me üküm yenangpu jiengjeppu teih-e tüolak.”

¹⁷Hüyange Kahwange Noah te i, “Hatüowa jiengjeppu füo, hanghepa Tao hei kahtoknyu me ngohpu yinmoknyuha üshei nipa me Taowe linge tamnang.”

¹⁸Noah hayim aoyin ghonu mepu yu, tüolan-a Shem, Ham, hüyange Japheth; hüyange Ham-a Kanan üpa ne ngoh.

¹⁹Tüolan Noah hayim naoshe lümma kahtoknyu nopu kahtalan üshei jingne pajeiyonglan ne meng.

²⁰Noah, aohipa kahhampa ne meng, wuwüngkah üwangne deiye hampa kahta ne I meng.

²¹Wuwüngti ütam lye yingyang phei me I jok, hüyange pümkeng me nyenok phangme lamyange ngoh.

²²Aope Kanan üpa Ham-e Ipa pümkeng me ngeyapeih nokshao te yuwe Ijei heinao nite i.

²³Hüyange Shem hei Japheth niye inkhek yah-e peiye, tüopa iman phaktang me vaiyange, tokshong yange kemme wenne, iman üpa pümkeng me ngohpu büange tam, hüyange iman sheta tokphei yeme lüpyange peipu jingne kahtok me iman-e yoipa pümkeng me ngohpu ye-nge.

²⁴Aope Noah I jokke ngohpu mepu lüo hüyange I ha naolipawe Ite hanghe ling shinge pei,

²⁵Iye i, “Kanan te phoiwümpu shahtüoh! Yoi jeiheinao rhapa ütahpa ne I menglak.

²⁶Iye üne-o i, Shem Kahwang Youngwanpa te minyong phatüoh! Kanan Shem rha ne mengtüoh.

²⁷Kahwange Japheth yong tamtüoh! I jing huhayimlanna Shem kahtalan phei ngoh ne tamshih! Kanan-a Japheth rha ne menglak.”

²⁸Muleam phei me Noah wangpeng gho lüm phei me denga ngoh.

²⁹Hüyange Noah jin khongkümpu wangpeng gho tu phei me denga ngoh; hüyange I li.