Read Konyak Naga 2 SAMUEL 1 Bible Online

2 SAMUEL 1 - Konyak Naga bible

2 SAMUEL 1

¹Saul liphei me, aope David Amaleklan toipu mepu leih yeyapeih, Ziklag me David nyih ni nyoi.

²Lüm shepupa nyih leihuyah, kahta ja mongmengpu hüowe yoi nyemo hüyange I shangme kahtok phoyange, Saul lakjing mepu phette pei. Hüyange I David tangte peiwante, Iye kahtok te khuhta hüyange wangshüm hüo.

³David-e Ite tong, “Nang ümeken mepu peipu?” Hüyange Iye Ite jan-e i, “Tao Israel lakjing mepu taiye okpu kahta!”

⁴Hüyange David-e Ite i, “Hangke tainangki? Üte itehu!” Hüyange Iye jan, “Shapju mepu kahtalan phette taikümteki, hüyange kahta üngang mahteki hüyange liteki; hüyange Saul hei Iha Jonathan liteki.”

⁵Hüwante Ite ngaowe peipu naoshete David-e tonge i, “Saul hei Iha Jonathan li she nange hangke shingpu?”

⁶Ite ipupa naoshepawe i, “Yatuhshao meiye tao Gilboa kahtang me ngoh shu; hüyange tüome Saul yoi ngou me nyengyange ngohyangki; hüyange leihu, tongtoilan hüyange koipong me shotpu wepalan I shongme owe ngoh yangki.

⁷Iye tokphei yete lüppe leiwante Iye tao nge hüyange üte nyik. Hüyange taowe jan, ‘Tao tüome ngohnang!’

⁸Hüyange Iye üte tong, ‘Nanga ao shi?’ Taowe Ite jan, ‘Tao Amaleklan ngohnang.’

⁹Hüyange Iye üte i, ‘Ü-shong me yongkei hüyange tao toipha; hangjingne tao loishe pateki, hüyange ü-üyinna üme hei tükke ngohnang.’

¹⁰Tüokhei tao I shong me yong, hüyange I toitam; hangjingne I toita pheima-a I üyin yengoh oklak taowe shing; hüyange I shang mepu ahngpa shaoshaoh hüyange I yak me ngohpu wentong taowe yahye, hüyange taowe tüolan-a tüome ü-nokpu tangte yah peiye ngoh nang.”

¹¹Hüwante David te yoi inkhekte jon, hüyange mongmeng hüowe tüolan-a hitte tam, hüyange hüke I phei ngohpu moilan-e ling;

¹²hüyange iman-e mangshap hüyange yeonge shap hüyange Saul hei Iha Jonathan hüyange Youngwanpa kahtalan jingne hüyange Israel nokphong jingne yaningte ngoiye nyaowele, hangjingne yanglow phei iman loishe mah.

¹³Hüyange Ite ngaowe peipu naoshepate David-e tonge i, “Nang ümeken mepu peipu?” Hüyange Iye jan, “Taowa yinkempa üha ja, Amaleklan ngohnang.”

¹⁴David Ite i, “Youngwanpawe minnga phowe lepupa mahtamlak nang yak hünglak hangke iye nange yenyampe yongpu?”

¹⁵Tüophei me David-e naoshelan yo me ja te nyik hüyange i, “Wentüoh, hüyange I toitam tüoh.” Hüyange Iye met hüyange I li.

¹⁶David-e Ite i, “Nang iy nang shangtang me kiyah, hangjingne nang juwe nang phei tüi-e saki phawe i, ‘Taowe Youngwanpawe minnga phowe lepu toiyangki.’ ”

¹⁷Hüyange Saul hei Iha Jonathan tangme tüopa yoongeshonpu hem ngao phei David-e ngaowelok,

¹⁸hüyange Iye i, hatüowa Judah kahtalante nyüowe tamlak yang; leihuyah tüopa-a Jashar laitep me nyanyange ngohnang.

¹⁹“Müktishiwa, O Israel, nang ütahpa shotjing me toiye ngoh nang! Hangke wong shenangpalan toiyeta!

²⁰Gath me hatüo tah i, ye-i-ma-a Ashkelon chingyanglan me hatüo tahpong tam. Philistia yhalalan hoongli mongong lakne tahtam, hüke shoyekhüppu yhalan-e üngwün langpheng ne tahtam.”

²¹“Numan Gilboa kahtanglan, nang tangme nyai yejema-a wai tah yüt, numan kah ükengne wan-e ngoh shih! Hangjingne tüoken me wongnangpa ree nuwetam, Saul ree shaaji minngawe phowe tampu yenang.”

²²“Toiye tampalan iy mepu, wongnangpa wepa teihpu mepu, Jonathan weanglah leih-üye, hüyange Saul yanglow ükeng me leih üye.”

²³“Saul hei Jonathan, mongkenpu hüyange yayeng jake, üyin me hüyange lipume iman teiyeyan; iman awlan phei shemamshe, hüyange yengkong mailanglan phei nehoi wong she nang she ngoh yangki.”

²⁴“Numan Israel yhalalan, Saul jingne mang shaptüoh! Iye numan shemei yaoma pu phei ta-akke takpu inkhek innetam; aowe numan nyemo me honne owetam.”

²⁵“Wongnangpu wetaipalan toitateki, iman-a shapju me toiteki. Jonathan kahtang me liteiye lamyange ngohnang.”

²⁶“Tao nang jingne yatuhshao yenangpe dakpuwe daknang, Ü-jeiheinao Jonathan! Nanga üjingne jamloi meiye ngoh yangki; üte nange kenpuwa yashan yalilakne! Shekowe kenpu phei nehoi shetahpa ne ngohyangki.”

²⁷“Wongnangpu wetaipalan toitateki, imanjing ngouyang angteki hüyange jajang japune mengteki.”