Read Konyak Naga 2 SAMUEL 10 Bible Online

2 SAMUEL 10 - Konyak Naga bible

2 SAMUEL 10

¹Ütenja ngohyang pheime Ammon ahngpa Nahash li, hüyange Iha Hanun I nanlei ahngne meng.

²Hüwante David ahngpawe i, “Nahash üha Hanunte, Ipawe üte kenyangpu kih-e taowe yayeng hüolak.” Tüokhei David-e Ipa jengme I mong toloimeiye tamlak jingne I shaoshanpalan shon. Hüyange David shaoshanpalan Ammonlan kahmükte pei.

³Hüpoi Ammon ahngha lan-e iman nokpu Hanunte i, “David-e nangpa langhoonpu she nange teih-e nang tangte toloimeiye tamlak jingne shon she teih nangkü a? David-e yoi shaoshanpalan nang tangte chingnyute kuhshüklak jingne, hüyange hatüo yahlak, hüyange hatüo mahtamlak jingne yeshon a?”

⁴Tüokhei Hanun-e David shaoshanpalan pho, hüyange iman jumin ükao ja linne tam, hüyange iman nyemo yungkeng me peiye wettewin, hüyange iman shonne yetam.

⁵Aope iman-e hatüo David te i, Iye iman pongte shon; hangjingne kahtalan yeonge wüowe ngohyangki. Hüyange ahngpawe i, “Numan jumin manngai manngai Jerikho me ngohtüoh, hüyange tüophei me leih yekei.”

⁶Hüyange aope Ammon kahtalan-e David sheshao me iman shaaji we ne menge mahteki she shinge pei, Ammon kahtalan-e shon, hüyange Bethrehob hei Zobah me ngohpu Syrialan ya me kempu wetaipalan haja da, hüyange kahta haja ja phei Maacah ahngpa hüyange Tob mepu kahtalan haja pen me ni nanphenge tai.

⁷Aope David-e tüopa ngaolan jai, Iye Joab woiyange wongnangpu nyahpong ükhong khongküm shon.

⁸Ammon kahtalan ngai, hüyange chingnyu petente ongpu yeme shapju üwen üwen dodoyange yong; hüyange Zobah me ngohpalan hüyange Rehob me ngohpalan Syrialan, hüyange Tob hei Maacah kahtalan kahko ye me iman shaha tanne ngoh yangki.

⁹Aope Joab-e shapjuwa I phei tüi-e sheshao yeme hüyange tokphei yeme ngohpu nge, Iye Israel le ngaipu yo mepu shemeipu kahtalan Iye leyah, hüyange Syrialan phei hoklak shapju khüng lenge tüoh.

¹⁰Topu kahtalan-a Iye Inao Abishai woipa ne menge tamyange I yak me phünne pha, hüyange Iye Ammon kahtalan phei tüi-e iman khüng lenge tüoh.

¹¹Joab-e Ite i, “Syrialan üjingne jamloi wongnange ngeyahma-a, hüwante nange üte jamlak; hüyange Ammonlan nangjingne jamloi wong nange ngema-a hüwante tao nang tangte peikülak hüyange nangte jamlak.

¹²Wongnange hüyange mongyongyah! Hüyange teman kahta jingne, hüyange teman Kahwangpa chingnyulan jingne teman-e netan ne menghah hüyange Youngwanpawe I sheshao me meinang she teihpu lingne tamtüoh!”

¹³Tüokhei Joab hüyange Iphei ngohpu kahtalan Syrialan phei tüi-e shapju shongte pei; hüwante Syrialan I sheshao mepu phette tai.

¹⁴Aope Syrialan nyamme yanteki she Ammonlan-e ngeyapeih; hüke iman-o Abishai sheshao mepu phette tai, hüyange chingnyute ye mah. Hüwante Ammonlan phei hokpu mepu Joab lüppe ye hüyange Jerusalemte leihye mah.

¹⁵Hüpoi aope Syrialan-e Israel sheshao mepu iman khoppu she ngeye ok, iman nying nyingke jamshe jem.

¹⁶Hüyange Ahngpa Hadadezerwe shon, hüyange Euphrates yengyin kaiye taiye ngohpu Syrialan yahpei; hüyange iman Helam te Hadadezer ngangpalan ükhong woipa Shobach, iman tangme woipa ne pei.

¹⁷Aope David-e tüopa ngaolan jai, Iye Israel khongkümpu jamshe jemne tam, hüyange Jordan kaiyange Helamte pei. Hüyange Syrialan-e David phei tüi-e shapju yong, hüyange Iphei hok.

¹⁸Hüpoi Syrialan Israel sheshao mepu phette tai, hüyange Syrialan tongtoi gho nyit, hüyange koipong pheipu, wetaipalan haja deli, hüyange iman ngangpu ükhong woipa Shobach mayahtam; tüokhei I tüome li.

¹⁹Aope Hadadezer phang mepu ahngpa khongkümpuwe Israel tangme iman papuyang she shinge pei, iman-e Israel phei chingmei ling, hüyange iman shaoshan. Tüokhei Syrialan-e shaaji Ammon kahtalante jamlak nyam.