Read Konyak Naga 2 SAMUEL 12 Bible Online

2 SAMUEL 12 - Konyak Naga bible

2 SAMUEL 12

¹Hüyange Youngwanpawe Nathan hipa David tangte shon. Hüyange I tangte Nathan pei, hüyange Ite i, “Chingnyu ja me kahta ni ngoh; ja-a hakpa hüyange ja-a toiha.

²Hakpa kahta me-a nyee hei mahu ükhong üngang ngohnang;

³hüpoi toiha kahta me-a nyeeha ja shingha, hanghepa Iye shak hüyange tam, tüopa tokte kaiye hango yenangpe ngoh; tüopa-a I phei jamme hüyange Iha lan phei jong; tüopawe I yoi hahying mepu hah, hüyange I yoi wan mepu ying; hüyange yoi jakuh me nyengyange ngoh, hüyange I sheshao me yhala ja leye ngoh yangki.

⁴Sha-a hakpa kahta tangte yinpa ja pei, hüyange Iye yoi nyee ükhong mepu hüyange yoi mahu ükhong mepu, I tangte peipu yinpa jingne yeyah, hüpoi toiha kahta jing, ja shingha ngohpu yah, hüyange I tangte peipu kahta jingne tümme tam.”

⁵Hüyange kahtapa phei tüi-e David yeonge mongshih ngai; hüyange Iye Nathan te i, “Youngwanpa üyin me ngohtepuwe, tüopa lingpu kahta-a lilak wangnang she taowe jiengnang!

⁶Hüyange Iye nyee üha-a üphong peli nyeiye leih phalak, hangjingne Iye hatüo ling hüyange Iye shüpshe yehüo.”

⁷Hüyange Nathan-e Davidte i, “Kahtapa-a nang ngohnang. Hüke Youngwanpa Israel Kahwange inang, ‘Taowe nang Israel tangme ahngne mengne minnga phowe le, hüyange taowe nang Saul yak mepu yintam;

⁸hüyange taowe nangte nang nokpu nok pha, hüyange nang jakuh me nang nokpu shekonyulan pha, hüyange nangte Israel hüyange Judah nok pha, hüyange hatüo jamloi shoipu she teihpu ne mengma-a, taowe nangte üphong ni nyeiye phayange ngohhah shepu!

⁹Hangne nange Youngwanpa sheshao me hanghepa ümeng hatüo linglak jingne I ngaokeng yaowele tampu? Nange Hitlan Uriah yanglow-e toiteki, hüyange I sheko nange yah, hüyange I Ammonlan yanglow me toine tam.

¹⁰Sha-a jin ngaipu phe me nang huhayimlan yakphei teilükpuwe lipu ngailak, hangjingne nange ü-ngao yejai hüyange Uriah shekonyu yahteki.’

¹¹Hüke Youngwanpawe inang, ‘Leihuyah, taowe nang yoi noksa mepu nang phei tüi-e ümeng ngaine tamlak, hüyange nang sheshao mepu taowe nang shekonyulan yahlak, hüyange iman nang pheipu kahta ja te phalak, hüyange Iye nang shekonyulan phei tüopa wanghenyu üko me shilak.

¹²Hangjingne nange hatüowa lowe ling; hüpoi tüopawe taowe Israel khongkümpuwe ngelakne, hüyange wanghenyu üko me lingne tamlak.’ ”

¹³David-e Nathante i, “Taowe Youngwanpa phei tüi-e ünu omyangki.” Hüyange Nathan-e Davidte i, “Youngwanpawe-o nang ünu winteki; nang yelilak.

¹⁴Tüoyangpoi tüopa toishao jingne nange Youngwanpate yaowe le ne tampu jingne, nangte puhtamne ngohpu naha-a ütingme lilak.”

¹⁵Tüophei me Nathan yoi nokte ye mah. Youngwanpawe Uriah shekonyuwe David-e puhtampu nahate shet, hüyange hatüo yeonge dak.

¹⁶Hüyange naha jingne David-e Kahwangte yeonge yoppedo; hüyange David-e nyaowele, hüyange noksate ong, hüyange wangnyak phapan taleng me lamyange ngoh.

¹⁷Hüyange Inok gho mepu lwngmeilan yayong, hüyange I shongme yongyange kahtok mepu I loiyahlak jingne ngang, hüpoi I yelao, yejema-a iman phei yehah.

¹⁸Nyit shepupa nyih me naha-a li. Hüyange David shaoshanpa lan-e naha-a liteki she ilak Ite nyamme ngoh; hangjingne iman-e i, “Leihuyah, naha-a üne-o üyin me ngohwante toman-e Iphei ngao, hüyange Iye toman ngao yejai; hümma-a toman-e Ite naha-a liteki she hangke ilak? Iye yoi nying nyingke ümeng ütam lingne ok!”

¹⁹Hüpoi aope David-e I shaoshanpalan jamshe teingaopu nge, David-e naha-a liteki she shinge ok; hüyange David-e yoi shaoshanpalante i, “Naha-a litekü a?” Iman-e jan-e i, “I liteki.”

²⁰Hüwante David kahtok mepu lao, hüyange yengyao, hüyange I nying nyingke minnga phowe shang shai, hüyange I nyemo jeilei; hüyange Youngwanpa nokte I tai, hüyange khüm; tüophei me Iye yoi nokte ye; hüyange Iye hahying yu hüyange iman-e hatüo I sheshao me angtam hüyange Iye hah.

²¹Tüoyangpoi I shaoshanpalan-e Ite i, “Nange lingpu hatüowa hanghete leppu toman-e yeshing! Naha üyin me ngohwante nange I jingne nyaowele hüyange shap; hüpoi aope naha li, nang laowe hahying hahnang!”

²²Hüyange Iye i, “Aope naha üne-o üyin me ngoh, taowe nyaowele hüyange shap; hangjingne ü-jingne Youngwanpawe üte shüpshe hüolak hüyange naha-a yelilak-o aowe shing she teih!

²³Hüpoi sha-a I liteki, hanghene tao shappe ngohlak? Taowe I leihyepu oklak a? Tao nyih ja pa-a I ümeken me ngoh I tangte tailak, hüpoi I-a ü-tangte leih yeyekülak.”

²⁴Tüophei me David-e I sheko Bathsheba mong toloimei ne tam, hüyange yha tangte ong, hüyange yha phei mei, hüyange yhawe netan naha ja puh, hüyange Iye I min Solomon she nyik, hüyange Youngwanpawe nahate ken.

²⁵Hüyange hipa Nathan me ngaolan shon, hüyange Iye I min Jedidiah, Youngwanpawe kenpupa she nyik.

²⁶Sha-a Joab-e Ammon kahtalan Rabbah phei tüi-e hok, hüyange ahngpa chingnyu yah.

²⁷Hüyange Joabwe ngaolan kipalan David tangte shon, hüyange i, “Taowe Rabbah phei tüi-e hokyangki, hüyange yeng chingnyu yahteki.

²⁸Tüokhei sha-a towe ngohpu kahtalan nange jamshe jemne tamtüoh, hüyange chingnyu phei tüi-e shapju yongtüoh, hüyange hatüo yahtüoh: tüokih-e yelingma-a taowe chingnyuwa yahyange, hüyange hatüowa ü-min me nyik-e mahlak.”

²⁹Tüokhei David-e kahta khongkümpu jemne tam, hüyange Rabbahte tai, hüyange tüo phei tüi-e hok, hüyange hatüo yah.

³⁰Hüyange Iye iman kahwang ahngpa shaoshaoh-a I shangmepu yah; hüyange tüopa tokpu me hon kilogram (tok) delüm nanjing ngoh, hüyange tüopa me müktishiwapu toinyu long shaha ngoh yangki. Hüyange hatüo David-e yoi shangme shaoh. Hüyange Iye chingnyu mepu nyieyeyahpu toinan üngang yah ye.

³¹Hüyange tüome ngohpu kahtalan Iye yah ngai; hüyange iman pee wetne, yanne kahhoklak lingne, hüyange wa yaopume, hüyange jaklong lingpu me toi lingne tam. Hüke Iye Ammonlan chingnyu khongküm pute lingne tam. Tüophei me David hüyange kahtalan khongküm Jerusalemte leihye.