Read Konyak Naga 2 SAMUEL 14 Bible Online

2 SAMUEL 14 - Konyak Naga bible

2 SAMUEL 14

¹Sha-a Zeruiah üha Joabwe ahngpa mongjang Absalom yekaote ngohnang she nge ok.

²Hüyange Joabwe Tekoate shon, hüyange tüomepu sheko ja woipei, hüyange yhate i, “Taowe nangte yoppe tongnang, nang nying nyingke mangshappalan nyoingoh hüotüoh hüyange mangshappe yoongpalan o otüoh; hüyange nange minnga phowe shang tahshai; hüpoi hipak nangjange, litepulan jingne mangshappe yoonge ngohpu sheko ja kih-e ngohtüoh.

³Ahngpa tangte ongtüoh, hüyange Ite hüke ngaotüoh.” Tüokhei Joab-e yha ju me ngaolan-a hinnetam.

⁴Aope Tekoa sheko ahngpa tangte pei, yhawe yha sheta kahtok yete khuhyange wangshüm pha, hüyange i, “Üte jampha, O ahngpa!”

⁵Ahngpawe yhate i, “Nang shangpu hanghe shi?” Yhawe jan, “Aya, taowa wamnyu ja ngohnang, ü-netanpa liteki.

⁶Nang shaoshannyu netanha ni ngoh, hüyange imni kahme teishet, hüyange imni teyantamne ao-o yenangpe ngoh, hüpoi shejawe shejate shet, hüyange sheja li.

⁷Sha-a leihuyah, noksalan khongkümpuwe nang shaoshannyu phei tüi-e yongteki, hüyange iman-e i, ‘Inao toipa-a phünne yahkei, tüome Inao aowe toi, I üyin jingne toman-e I toilak;’ hüyange hüke mothleipa-o iman-e mahtamlak. Hüke towe ngohpu ü-üli iman-e mahtamkülak, hüyange ü-netanpate kahtoknyu me min yejema-a jetohapu hango yetüoh lak.”

⁸Ahngpawe shekonyute i, “Nenokte leih yetüoh, hüyange taowe nang jeng ngaokhüm phalak.”

⁹Hüpoi Tekoa shekowe ahngpate i, “Ü-nokpu, O ahngpa, ümenga ü-tangme, hüyange üpa noksa tangme ngohtamtüoh; hüyange ahngpa hüyange I ahngpa shotjingpa-a ümeng yenangpe ngohtam tüoh.”

¹⁰Ahngpawe i, “Ütamme nangte nyamshaowe tamma-a I ü-tangte woi peikei, hüyange Iye nangte nishe aope-o hango ye-ilak.”

¹¹Hüwante yhawe i, “Chingmei lamlinge ahngpawe Youngwanpa nang Kahwangte, iy phuh hahpalan-e shaaji yetoilak, hüyange ü-ha yemahtamlak teihtüone tampha.” Hüyange Iye i, “Youngwanpa üyin me ngohtepuwe, nangha shangmin ja nehoi kahtokte yeyeilak.”

¹²Hüwante shekonyuwe i, “Nang shaoshannyute ü-nokpu ahngpate ngao ja inetampha she yoppe tongnang.” Iye i, “Ngaotüoh.”

¹³Shekowe Ite i, “Hangne hüma-a nange tüo kih-e Kahwangpa kahtalan jingne konkonpu? Hangjingne ahngpawe Iye jange teine tampu Iha nishe nokte woiye yepei tepuwe hüke ngaopuwe ahngpa-o ümeng omnang.

¹⁴Hangjingne teman khongkümpu hei lilak, hüyange kahtok me yeng shokke tamyang phei nishe shaijem me ye-okpu kih-e ngohnang; yejema-a Kahwange üyin yah yetei, hüpoi ao jange teiye ngohnang, I mepu winpulan ja ne yejelak jingne kon konnang.

¹⁵Sha-a tüojingne ü-nokpu ahngpate tüopa ngao ngaone tao pei, hangjingne kahtalan-e tao nyamshao ne tam; hüyange nang shaoshannyuwe teih ‘Taowe ahngpate ngaolak; aoweshing, ahngpawe I shaoshannyuwe yoppe tongpu linge tamne ok.

¹⁶Hangjingne ahngpawe jailak, hüyange I shaoshanpa-a, kahta aowe tao hüyange üha Kahwang mothlei mepu mahtamlak jingne ngoh I yak mepu yintamlak.’

¹⁷Nang shaoshannyuwe teih, ‘Ü-nokpu ahngpa ngaowe tao toloimei me tüohphalak’; hangjingne ü-nokpu ahngpa-a, ümei hüyange ümeng shinge okpu Kahwang shongmokpa leye ngohnang. Youngwanpa nang Kahwang nang phei ngohtüoh.”

¹⁸Hüwante ahngpawe shekote jan, “Taowe nangte tongpu ja tongpha ning hüyange nange ü-mepu hango lowe tah ang.” Shekonyuwe i, “Sha-a, ü-nokpu ahngpawe ngaotam tüoh.”

¹⁹Ahngpawe tonge i, “Tüolan khongkümpu me Joab yak yuwe ngohnang kü a?” Shekonyuwe jan, “Nang üyin me ngohtepuwe ü-nokpu ahngpa, aohe-o ü-nokpu ahngpa mepu yakjah yemepu yaknya yete lüpne ye-ok; tüolan ngao khongkümpuwa Joab-e üte ngaowe tamme ipu ngohnang, tüolan ngao khongkümpuwa nang shaoshannyu ju me Iye hintam.

²⁰Hüpoi Iye tüolan-a khongkümpu jeilei tamme wongnange tamlak jingne nang shao shanpa Joab-e ling; hüyange kahtoknyu me toishao üshei shinglak Kahwang shongmokpa kon ngohpu leye ü-nokpu ahngpa me konngao ngohnang.”

²¹Tüophei me ahngpawe Joabte i, “Sha-a leitüoh, Taowe hatüo lingteki; taitüoh, naoshepa Absalom nishe yah yekei.”

²²Joab kahtokte khuhta, hüyange wangshüm hüo, hüyange ahngpawe moimantam; hüyange Joab-e i, “Ahngpawe I shaoshanpawe yoppe tongpu phapu khei, tenyih nang shaoshanpawe ü-nokpu ahngpa, nang sheshao me tao shüpshe tüoteki she shing teki.”

²³Tüokhei Joab yayong hüyange Geshurte tai, hüyange Absalom Jerusalemte woi ye.

²⁴Ahngpawe ngaokeng phawe i, “Absalom inokte leih yene tamtüoh, hüpoi Ite ü-sheta ngene tahtam.” Hüyange Absalom I nokte leihye, hüyange ahngpa sheta ye-nge.

²⁵Sha-a Israel khongkümpu me Absalom kih-e I naoshe meiye wangngoipu yihnoonlak ne ülao ao-o yenangpe ngoh; I yafa mepu I shang shangminte ngoiye, tah tüolak I me hango yenangpe ngoh.

²⁶Hüyange Ime shangmin yeonge jeiye meiye ngoh, hüyange aope tüopa shangmin laowe yeonge yih-e ngailakei, Iye wangpengte ja me shanglinne ngoh yangki. Hüyange hatüo tokke leiwante ahngnok me jonpu tokke heilak tokpu kilogram ni phei nyeiye ngohyangki.

²⁷Absalomte netan lüm, hüyange sheko ja puhtam, yha min Tamar; yha yeonge naoyha meipu sheko ja ne ngoh.

²⁸Tüokhei Absalom Jerusalem me wangpeng ni ngoiye ngoh, hüyange Iye ahngpa sheta ye-nge.

²⁹Hüwante Absalom-e I ahngpa tangte shonne tamne Joab nyik-e shon; hüpoi Joab I tangte yepei; hüyange Iye nishe nishepupa shon, hüpoi I yepei.

³⁰Tüokhei Iye I shaoshanpalante i, “Leihuyah, Joab nok kah tenok phei owe ngohnang, tüome I barley kah ngohnang; tatüoh hüyange tüote vün pahtam tüoh.” Tüokhei Absalom shaoshanpa lan-e kahte vün pah tam.

³¹Hüwante Joab yayong, hüyange Absalom tangte Inok yamme pei, hüyange Ite i, “Hangjingne, nang shaoshanpalan-e ü-kahte vün pahtampu?”

³²Absalom-e Joabte jan, “Leihuyah, hangne tao Geshur mepu yene tampu? Ü-jingne-a tüopa me hi kahtok, ümeipa ne menghah shepu she tonglak nanjingne, nang ahngpa tangte shonlak tüome peikhu she nang tangte ngao shon. ‘Sha-a tüojingne tao ahngpa tangte peine tampha; hüyange üme ümeng ngohma-a, Iye tao toine tamtüoh.’ ”

³³Hüwante Joab ahngpa tangte tai, hüyange Ite i, hüyange Iye Absalom nyik. Tüokhei I ahngpa tangte pei, hüyange ahngpa sheshao me kahtokte khuhta; hüyange ahngpawe Absalom omhüp-e yah.