Read Konyak Naga 2 SAMUEL 15 Bible Online

2 SAMUEL 15 - Konyak Naga bible

2 SAMUEL 15

¹Tüophei me Absalom yoi jingne tongtoi ja hüyange koiponglan, hüyange I sheshao me phetlak kahta deli tüm.

²Hüyange Absalom shonge lüo, hüyange peten lamnyu ünah yekao me yonge süin; hüyange kahta ütam ahngpa tangte ngaophünlak jingne ngao ngaiye peiwante Absalom-e I nyiklak hüyange ilak, “Nang ümpehepa chingnyu mepu?” Aope Iye, “Nang shaoshanpa Israel me tüopa hüyange tüopa chingnyu mepu she ilakei,”

³Absalom-e Ite ilak, “Leihuyah, nange yupuwa meipu hüyange ütingpa ngohnang; hüpoi nang ngao jailak ahngpawe kahta ao-o shonne yenang.”

⁴Tüotokte Absalom-e i, “Kahmük me kahpane tao mengshihma-a hüke ngao ngaipu kahta lili ü-tangte peiye, taowe Ite ngaoting ngao phünpu phahapeih!”

⁵Hangkih tingme aope kahta ütamme Ite yihnoonne wangshüm hüolak jingne owe wenlakei, Iye yoi yak okke ngaiye Ite tükyange hüyange Ite omhüp.

⁶Hüke Absalom-e ahngpa tangte ngao phünlak jingne peipu Israel khongkümpute ling; hüke Absalom-e Israellan mongjang yohyah.

⁷Wangpeng peli üküm ye me Absalom-e ahngpate i, “Taowe nangte yoppe tongnang, Hebron me taowe Youngwanpate hanghepa jan, taowe janpu phalak jingne tao taine tampha.

⁸Hangjingne nang shaoshanpawe Geshur me ngohwante Syria me janpu ja jan hüyange i, ‘Ütingme Youngwanpawe tao Jerusalemte yah yephaküma-a hüwante taowe Youngwanpate yoppe khümlak.’ ”

⁹Ahngpawe Ite i, “Chingmei me taitüoh.” Tüokhei Absalom yayong, hüyange Hebronte tai.

¹⁰Hüpoi Absalom-e Israel üshei yete ngaolan kipalan shonne teiye i, “Numan-e nyawong wüng jaipu phei jamshe, ‘Hebron me Absalom ahngpa ngohnang; she numan-e üngwüntüoh!’ ”

¹¹Absalom phei Jerusalem mepu Iye nanpheng pulan kahta gho ni tai, hüyange iman lanta-akke hango yeteih tüope, hüyange iman-e hango yeshingpe tai.

¹²Aope Absalom-e toidopu phawe ngoh, Iye Davidte konngao phapa, iman chingnyu Giloh mepu Gilolan Ahithophel nyikne shon. Kuhshük toi konkonpuwa wongnange ngai, hüyange Absalom phei kahta ünyei jalun.

¹³Ngaolan kipa ja David tangte peiye i, “Israellan mongjang Absalom pheite taiteki.”

¹⁴Hüwante Jerusalem me Iphei ngohpu I shaoshanpalante David-e i, “Yayongtüoh, hüyange teman phette taihah; hüke yelingma-a teman jingne Absalom mepu yinlak ken yenang; Iye teman mamshe kemyüowe ngohyalak yang, hüyange teman tangme ümengpa yüowe ngohshao me, hüyange yanglow phei chingnyuwa toishao me, mamshe taihah.”

¹⁵Ahngpa shaoshanpa lan-e ahngpate i, “Leihuyah, ü-nokpu ahngpawe hangheke taisho phalakei, hatüo linglak nang shaoshanpalan tümyange ngohnang.”

¹⁶Tüokhei ahngpa, hüyange I pheite Inok noksa khongkümpu yayonge tai. Hüyange ahngpawe nok yomlak jingne phongphenyu pen shaha tüoh.

¹⁷Ahngpa yayong hüyange Ipheite kahta lili woi; hüyange taiwante nok ükümpa me iman lak.

¹⁸I shaoshanpalan khongkümpu I phin me linne tai; hüyange Cherethlan khongküm, hüyange Pelethlan khongküm, hüyange Gath mepu I pheite woipalan gho wok khongkümpuwa ahngpa sheshao me linne tai.

¹⁹Hüwante ahngpawe Githlan Ittai te i, “Nang toman phei hangne taipu? Leih yetüoh, hüyange ahngpa phei ngohtüoh; hangjingne nanga yinhu, hüyange numan kahtok mepu jange teipu ja ngohnang.

²⁰Nang menyih hei pei, hüyange tao-o ümpeyete tainang yeshingpe ngohnang puta tenyih taowe toman phei nango wa ne tamlak a? Leihyetüoh, hüyange nang phei nang jeiheinaolan woiyange yetüoh; hüyange Youngwanpawe yepopu yayeng hüyange monghümpu hüotam tüoh.”

²¹Hüpoi Ittai ahngpate jan, “Youngwanpa ngohtepuwe, hüyange ü-nokpu ahngpa ngohtepuwe ümeken me ü-nokpu ahngpa ngohlakei, lilakne jeyapoi yejema-a üyin me ngohlak ne jeyah, tüoken me nang shaoshanpa ngohlak.”

²²David-e Ittaite i, “Hüma-a meiteki, taitüoh, linne taitüoh.” Tüokhei Githlan Ittai linne tai, Iphei ngohpu iman kahta khongkümpu phei hüyange üjoilan khongkümpu tai.

²³Kahmük khongkümpu kahta khongkümpuwe linne taiwante, iman üngwünne shap; hüyange ahngpawe Kidron shaoyin linne tai, hüyange kahta lili phaonyu jong yekaote linne tai.

²⁴Abiathar ong, hüyange leihuyah, üne-o Zadok pei, Levilan khongkümpu phei, Kahwang ghonu yahyange pei; hüyange chingnyu mepu kahtalan linne man ongküm man ongküm iman-e Kahwang ghonu ang ngohyangki.

²⁵Hüwante ahngpawe Zadokte i, “Kahwang ghonu yahyange chingnyute leihyetüoh. Kahwang sheshao me tao shüpshe tüoma-a, Iye tao leih-e yetamphalak hüyange Iye tüopa-a hüyange I ngohjing üte yahphalak.

²⁶Hüpoi Iye üte, ‘Ü-mongmeipu nangme yenang’ she ima-a, leihuyah, tüome tao ngohnang, I sheshao me hanghe meiye teih hatüo üte lingne tamtüoh.”

²⁷Üne-o ahngpawe Zadok ngengpate i, “Leihuyah, chingnyute chingmei me leihyetüoh, nang hüyange Abiathar, nangha ni phei nangha Ahimaaz, hüyange Abiathar üha Jonathan.

²⁸Leitüoh, tao phaonyu jong yengpah jing me nang mepu üte shingne tampu ngao manye manye tanne ngohküning.”

²⁹Tüokhei Zadok hüyange Abiathar niye Kahwang ghonuwa Jerusalemte leih yahye; hüyange iman tüome ngoh.

³⁰Hüpoi David Olive Kahtangte ong, I ongwante shapjang shappe, yakeng me hüyange I shang büangyange ong, hüyange Iphei ngohpu kahta lili iman shang büangyange iman ongwante shapjang shappe ong.

³¹David-e Absalom phei kon ümeng konne teihpalan phei Ahithophel omme ngohnang she shingne tam. Hüwante Davidte i, “O Kahwang, taowe nangte yoppe tongnang, Ahithophel juteih-a ngapa ne menge tamtüoh.”

³²Aope David kahtang üshang, Kahwang khümjing nyoite pei, leihuyah, Archlan Hushai I pongte I phakshaoh hityange hüyange I shang me kahtok phoyange pei.

³³David-e Ite i, “Nang ü-phei taima-a, nanga üjingne hangki yih ja ne menglak.

³⁴Hüpoi chingnyute leih yema-a, hüyange Absalomte, ‘O ahngpa taowa nang shaoshanpa ne menglak; üshongpe tao nangpa shaoshanpane ngoh yangki, tüokhei sha-a tao nang shaoshanpa ne menglak,’ she ima-a, hüwante nange üjingne Ahithophel taitam tangme okpu ngelak.

³⁵Zadok hüyange Abiathar ngengpalan nang phei yenang a? Tüokhei hangheyin nange ahngnok mepu jailakei, hatüo Zadok hei Abiathar ngengpa nite itüoh.

³⁶Leihuyah, iman hayim ni iman phei ngohnang, Ahimaaz, Zadok üha, hüyange Jonathan, Abiathar üha; hüyange iman kaiye nange hangheyin jailakei üte shingne tampu oklak.”

³⁷Tüokhei David shümpa Hushai, chingnyute leihyepu Absalom Jerusalemte ongpu phei jamshe pei.