Read Konyak Naga 2 SAMUEL 16 Bible Online

2 SAMUEL 16 - Konyak Naga bible

2 SAMUEL 16

¹Aope David kahtang üshang üjingha linne taiye ngoh, Mephibosheth shaoshanpa Ziba, I pongte gado nipet ja shotjing angyange anbung ütoi gho ni, wuwünglick üjep gho ja, jüo me ngaipu pelick üjep gho ja, hüyange wuwüngti meisho tük ja khakmaawe yahpei.

²Ahngpawe Zibate i, “Hangne nange tüolan-a yahpeipu?” Zibawe jan, “Gadolan-a ahngnok kahtalan shotlak jingne, anbung hüyange jüo pelicklan-a naoshelan-e hahlak jingne, hüyange wuwüngti-a aoyin phao me yengleye nyaipalan jingne ngohnang.”

³Ahngpawe tonge i, “Hüyange nangnokpu Saul üha Mephibosheth üme ngohnangki?” Zibawe ahngpate i, “Leihuyah, I Jerusalem me ngohnang; hangjingne Iye i, ‘Tenyih Israel nokphonge üpa ahngching üte leih phakülak.’ ”

⁴Hüwante ahngpawe Zibate i, “Leihuyah, Mephibosheth jing khongkümpuwa sha-a nang jing ngohnang.” Hüyange Zibawe i, “Taowe wangshüm üyong hüonang; nang sheshao me jinte tao shüpshe ngene tampha, ü-nokpu ahngpa!”

⁵Aope David ahngpa Bahurimte pei, Saul nok mepu noksa kahta ja ngai, aohi min Shimei, Gera üha ne ngoh yangki; hüyange I peiwante Iye yelakpe phoiwüm.

⁶Iye Davidte longe shüp, hüyange David ahngpa shaoshanpa lante-o shüp; hüpoi kahta khongkümpu hüyange wongnangpu kahtalan khongküm David yaknya yakjah yeme neikonne ngoh yangki.

⁷Shimei Iye phoiwüm wante i, “Taitüoh, taitüoh, nang iy shaipu kahta, yahlak yenangpu kahta!

⁸Nange Saul jing ahngpa shotjing yah, Inok noksa iy shaipu khongküm nang tangme Youngwanpawe phuh hahteki; hüyange Youngwanpawe ahngchinga nangha Absalom yak me phateki. Leihuyah, nang mahlakpa nang tangme ngohnang; hangjingne nang iy shaipu kahta ngohnang!”

⁹Hüwante Zeruiah üha Abishai ahngpate i, “Nang Üyongpa, hangne tüopa kuiha mange ü-nokpu ahngpa phoiwümpu shi? Tüoye me tao wenshih nüng, hüyange I shang langkü ning!”

¹⁰Hüpoi ahngpawe i, “Numan Zeruiah hayim, numan phei taowe hanghe linglak shi, Youngwanpawe Ite ngaotampu jingne phoiwümpu ne mengma-a, ‘David phoiwümne tamtüoh,’ hüma-a, ‘Nange hangne hüke ling,’ she aohiye ilak?”

¹¹David-e Abishai hüyange I shaoshanpalan khongkümpute i, “Leihuyah, üha, ao ü-sea mepu yu, Iye ü-üyin yamnang; hüma-a Benjaminlan hatüowe hangke jam ünyei yelingne! I hüke ja tüotüoh hüyange Ite phoiwümne tamtüoh; hangjingne Youngwanpawe Ite hüke lingne tam.

¹²Aoweshing Youngwanpa ü-shaoshi tangme leilak, hüyange tenyih üte phoiwümpu jingne Youngwanpawe ümeiye üte leih pha ne ok.”

¹³Tüokhei David hüyange I kahtalan lamme taiwante, kahtang jaye kao me Shimei Ite phoijang phoiye, hüyange long shüpjang shüppe, hüyange kahmakke phujang phuwe tai.

¹⁴Ahngpa, hüyange Iphei ngohpu kahta khongküm, towe nyaiteiye Jordan ngoi; hüyange tüome I nying nyingke toloimei.

¹⁵Sha-a Absalom hüyange Ipheipu kahta lili, Israel kahtalan, hüyange I phei Ahithophel, Jerusalemte ong.

¹⁶Aope Archilan Hushai, David shümpa Absalom tangte pei, Hushaiye Absalomte üngwünne i, “Ahngpa jinlaowe ngohtüoh! Ahngpa jinlaowe ngohtüoh!”

¹⁷Absalom-e Hushaite i, “Hatüowa nang shümpate nange kenkü a? Hangne nange nang shümpa phei yetaipu?”

¹⁸Hushai Absalomte i, “Yeje, hüpoi Youngwanpawe aohipa hüyange tüopa kahtalan-e, hüyange Israel kahta khongkümpuwe leye ngohnang, tao I jingne menglak, hüyange Iphei tao ngohlak.

¹⁹Üne-o nishe, taowe aote shaoshanlak? Iha sheshao me taowe shao yeshanlak a? Taowe nangpa sheshao me shaoshanpuke, hüke nang sheshao me tao ngohlak.”

²⁰Hüwante Absalom-e Ahithophel te i, “Nange teihpu yahkei; sha-a teman-e hanghe linglak shi?”

²¹Ahithophel Absalomte i, “Nangpa phongphe nyulan aoyin Iye nokyomlak jingne tüoh, iman tangte ongtüoh; hüyange shitüoh; hüyange Israel khongkümpuwe nange nangpa phei teinuwe ngohnang she jailak, hüyange nang phei ngohpu khongküm yak wongnange ngailak.”

²²Tüokhei iman-e Absalom jingne ahngnok noktok me nyenok wetam; hüyange Absalomwe Israel khongkümpu sheshao me Ipa phongphe nyulan phei onge shi.

²³Tüolan nyih hipak me Ahithophel phapu ngaowa Kahwang ngao me teishin yange ngaopuke ngoh yangki; hüke David hüyange Absalom imni moiniye Ahithophel ngaowa iyesheye ngoh yangki.