Read Konyak Naga 2 SAMUEL 17 Bible Online

2 SAMUEL 17 - Konyak Naga bible

2 SAMUEL 17

¹Tüophei me Ahithophel-e Absalomte i, “Sha-a taowe kahta haja penme ni le shih nüng, hüyange tao yayongnüng, hüyange teyamuh David pheite jange taihah.

²I towe nyaiye ngohwante hüyange yak wong yenangpe ngohwante taowe I tangme peilak, hüyange I nyam ne tamlak; hüyange I phei ngohpu kahtalan yanne kümlak, hüyange taowe ahngpa shaha toilak;

³hüyange kahta lili taowe nang tangte nyemnya nyu yoi nyemthepa tangte peipu ke woiye peilak. Nange kahta ja hei üyin yamnang, hüyange kahta lili chingmei me ngohlak.”

⁴Henge tampu we Absalom hüyange Israel lwngmei khongküm mongmei ne tam.

⁵Hüwante Absalom i, “Archlan Hushai te-o nyik kei, hüyange Iye ilak hanghe ngohyapeih teman-e jaihuhah.”

⁶Aope Hushai Absalom tangte pei, Absalom Ite i, “Hüke Ahithophel ngaowe shoteki; Iye Ipuke teman-e linglak heiya, yejema-a nange-o ngaotehu.”

⁷Hüwante Hushai Absalomte i, “Tüopa ünma-a Ahithophel nangte ngaopuwa yeshu.”

⁸Hushai i, “Nange shingnang nangpa hüyange I kahtalan wong üyong pheipu kahtalan ngohnang, hüyange kahko me shapnyu yoi ha nyieye yah taiteiye ngohpu shapnyu ja leye iman ngaiye ngohnang. Tüotokte jam, nangpa-a wehok me naomei; hüyange kahtalan phei I-a yaning yengohlak.

⁹Leihuyah, shaa-o I yoi nying nyingke longsa ja me, yejema-a ülao ken ja me lowe ngohnang. Hüyange aope üwangpane hokwante kahta ütam toilakei, aohipawe hatüo jailakei ilak, ‘Absalom pheite woipu kahtalan yomepu toiteki.’

¹⁰Hüwante hüke wongnangpu naomei, ao mongjang yengkong mailang leye ngohnang, nyampuwe lanshe limahlak; hangjingne Israel khongkümpuwe nangpa-a wong üyong pheipu kahta she shing, hüyange Iphei ngohpalan-o wong nangpu kahtalan ngohnang.

¹¹Hüpoi taowe teihpuwa hatüo, ükhong üngang yengching nah mepu pheih kih, Dan mepu hüke Beersheba ngoiye Israel khongkümpu nang tangte jemne tamlak, hüyange nange woiyange shapjute tailak.

¹²Hüke nyoijing ja me I ümeken me hüolakei teman I tangme peilak, hüyange nyai kahtokte yütpu kih-e yeshingpe I tangme yütlak; hüyange I hüyange Iphei ngohpu khongkümpu teman-e ja nehoi yetüohlak.

¹³Chingnyu ja te ong mah ma-a, hüwante Israel khongkümpuwe tüopa chingnyute wu jonyange peilak, hüyange teman-e kahjee yete, hüke longphan ja nehoi tüome yetüohpe shuiye lailak.”

¹⁴Absalom hüyange Israel kahta khongkümpuwe i, “Hushai juteih-a Ahithophel juteih phei shemeiki.” Hangjingne Youngwanpawe Ahithophel juteih ümei-a ye-okpu ngetamlak ne lingtam, tüokhei Youngwanpawe Absalom tangme ümengpa yahpeilak.

¹⁵Hüwante Zadok hei Abiathar ngengpalante Hushai i, “Hüpake hüyange hüke Ahithophel-e Absalom hüyange Israel lwngmeilante juteih pha; hüyange hüpake hüyange hüke taowe juteih phayangki.

¹⁶Sha-a tüojingne mamshe shontüoh, hüyange Davidte itüoh, ‘Teya phaonyu jong lamtien me lakke tahngoh, hüpoi hangke nyoiweih linge-o linne taitüoh; hüke yelingma-a ahngpa hüyange kahta khongküm lünge mahlak.’ ”

¹⁷Jonathan hüyange Ahimaaz En-rogel yengtuh me tanne ngoh yangki; shaoshannyu jawe taiye hüyange imante iye tam-e ngoh yangki; hüyange iman-e taiye David ahngpate iye tam-e ngoh; hangjingne iman chingnyute ongpu ye-ngetamlak wongpong.

¹⁸Hüpoi nyihja naha jawe iman nge, hüyange Absalomte i; tüokhei imni moini mamshe taimah, hüyange Bahurim me nok ja te pei, ao yengnung ja inok nokshao me ngoh; hüyange imni tüome ongemah.

¹⁹Tüopa nok shekonyuwe yengnungte küplak yahpuwe küppe tam, hüyange tüopa tangme nünge yhawe tah yam; tüokhei hüke lingpu tüopa jeng aowe-o hango yeshing.

²⁰Aope Absalom shaoshanpalan nokme ngohpu shekonyu tangte pei, iman-e i, “Ahimaaz hei Jonathan ümeken me ngoh nangki?” Hüyange shekowe imante i, “Iman shaoyin kaiye taiteki,” hüyange aope iman-e yam hüpoi yetüo, iman Jerusalemte leihye mah.

²¹Iman taitephei me, imni yengnung mepu ngai, hüyange tai hüyange David ahngpate i; hüyange imniye Davidte i, “Numan yayong tüoh, yeng kaiye mamshe taitüoh; hangjingne nang phei tüi-e Ahithophel-e hüke kon phateki.”

²²Tüokhei David hei Iphei ngohpu kahta khongküm yayong, hüyange iman Jordan kaiye tai; wangngai shaoma-a Jordan kaiye yetaipu iman ja nehoi yenangpe ngoh.

²³Aope Ahithophel Iye juteih phapu yeyah she nge, Iye yoi gado me shotjing tüm, hüyange imchingte ye mah, hüyange Iye yoinok meimei-e tümmetawe ang, hüyange I nying nyingke üngme phin; hüyange I li, hüyange Ipa mangjong me mu.

²⁴Israel kahtalan khongkümpu phei Absalom Jordan yeng kaishaoma-a David-a Mahanaim ching ngoiteiye ngoh.

²⁵Sha-a Joab nanleiye wetaipalan woilak jingne Absalom-e Amasa angtam. Amasa-a Ishmaellan kahta ja min Ithra ngoh yangki, Iye Nahash yhala Abigail yah, yha-a Joab ünyu Zeruiah ünao ne ngoh yangki.

²⁶Israel hüyange Absalom Gilead kahmük me lakjing ling.

²⁷Aope David Mahanaimte pei, Ammonlan Rabbah mepu Nahash üha Shobi, hüyange Lodebar mepu Ammiel üha Machir, hüyange Gileadlan Barzillai Rogelim mepu peiye hüo.

²⁸Iman-e shinlenglan, yankhonglan, hüyange longtük, wheat tah, barley tah, hahying, wanyangpu pelick, phenglick, hüyange phengkong,

²⁹zahtai jelo hüyange yaoyüp hüyange nyee hei mahu ükhong mepu üyao, David hüyange I phei ngohpalan hahlak jingne yahpei; hangjingne iman-e i, “kahtalan phaonyu jongme nyaowe leye towenyaiye hüyange yengleye ngohnang.”