Read Konyak Naga 2 SAMUEL 18 Bible Online

2 SAMUEL 18 - Konyak Naga bible

2 SAMUEL 18

¹Ahngpa David-e Iphei ngohpu kahtalan iyelei, hüyange iman tangme haja woipa hüyange gho woipa angyange ükhong ükhong tam.

²Hüyange David-e wetaipalan shon, meitam lüm yo me ja Joab phangme, meitam lüm yo me ja Joab ünao Zeruiah üha Abishai phangme, hüyange meitam lüm yo me ja Githlan Ittai phangme shon. Hüyange ahngpawe kahtalante i, “Tao-o ü-nying nyingke numan phei tailak.”

³Hüpoi kahtalan-e i, “Nanga yetailak. Hangjingne toman pheitte taima-a, iman-e toman jingne hango yeteihlak. Toman tangkhüw lima-a, iman-e toman jingne hango yeteihlak. Hüpoi nanga toman haja pen phei nehoi shenyeipu; tüokhei chingnyu mepu nange toman tangte jampu shonpupa shemeilak.”

⁴Ahngpawe imante i, “Numan sheshao me hanghe shemeipupa ngohnang hatüo taowe linglak.” Tüokhei wetaipalan ükhong gho gho hüyange haja haja taiwante ahngpawe peten shongme yong.

⁵Hüyange ahngpawe Joab, Abishai hüyange Ittai lante ngaokhüm phawe i, “Üte shüpsheye naoshe Absalomte shüpshe phei jon shih.” Hüyange kahta khongkümpuwe Absalom jeng ahngpawe woipalante ngaokhüm phapu jai.

⁶Tüokhei wetaipalan ükhonge Israel phei tüi-e kahko te pei; hüyange shapjuwa Ephraim phao me hok.

⁷Tüome Israel kahtalan David shaoshanpalan-e yemeipe naowetam; hüyange tüonyih üngang toi, kahta haja da mahtam.

⁸Shapjuwa kahmük khongkümpu yete yan, hüyange tüonyih me yanglow phei-a phaome kahta üngang mahtam.

⁹Absalom David shaoshanpalan phei hüolak ne ngai; hüyange Absalom lwngkoi me ongyange ngoh, hüyange I lwngkoi-a longkhampee üyongja, ükoi ngütshüppe ngohpu yete phette taiwante, hüyange I shang longkhampee me mongjüonge pitte mah, hüyange I wang hei kahtok nipa me jhotyange tüoh, I phangme lwngkoi-a taikhan tai.

¹⁰Hatüowa David kahta jawe nge, hüyange Joabte i, “Leihuyah, taowe Absalom longkhampee ja me jhotyange nge!”

¹¹Ite ipu kahtate Joab-e i, “Hang, nange I nge! Hangne hüwante nange I kahtokte ünne yeyeih? Taowe nangte khüm ü-oun pen hüyange shienghit ja phahah shepu!”

¹²Hüpoi kahtapawe Joabte i, “Ü-yak me khüm ü-oun haja ja nange shümne tamyapoi, taowe ahngpa üha phei tüi-e ü-yak yehünglak; hangjingne toman-e jaiye ahngpawe nang hüyange Abishai hüyange Ittai te ngaophawe i, ‘Üte shüpsheye naoshepa Absalom yintamtüoh.’

¹³Hüke yejeyapoi, taowe I üyin phei tüi-e konmeng konne ngohma-a, (hüyange ahngpa mepu hango lowe yenang) hüwantepa-a nang nangnying nyingke tokphei me hei yongyange taowa yeyinkülak.”

¹⁴Joab i, “Taowe nang phei hüke hipak yewinlak.” Hüyange Iye I yak me ngoulow lüm jon, hüyange Absalom longkhampee me üyin me ngohwante muh Absalom mongjang me lütte tam.

¹⁵Hüyange Joab ngouyang jonpa, naoshelan pen-e Absalom neikon hüyange Ite yak-hüng, hüyange I toi.

¹⁶Hüwante Joab-e nyawong wünglak jingne ngaokeng pha, hüyange wetaipalan ükhong Israelte jange taipu mepu leihye; hangjingne Joab-e iman tük.

¹⁷Iman-e Absalom mang yahpei, hüyange phaonyu jong me kahkook üyong ja me yeitam, hüyange I tangme long üngang phonge tüoh; hüyange Israel khongküm kahta lili yoi yoi nokte phette yan.

¹⁸Sha-a Absalom-e I üyin ngohwante I jingne ahngpa kahjee me shongnyu ja linge yonge tüoh; hangjingne Iye i, “Tao ümin teihtüowe angne netan naha yenang.” Iye shongnyuwa I min me nyik, hüyange hatüo tenyih ngoiye “Absalom Shongnyu” she nyik nang.

¹⁹Hüwante Zadok üha Ahimaaz i, “Tao sha-a ahngpa tangte ngaolan yah-e hüke Youngwanpawe I wepalan wong mepu I yintam teki she ilak jingne phette taishih ning.”

²⁰Joab-e Ite i, “Nange tenyih ngaolan yah yetailak; nange ülao nyih ja me ngaolan yah tai ne ok, hüpoi tenyih-a nange ngaolan hango yahyetailak; hangjingne ahngpa üha liteki.”

²¹Tüophei me Joab-e Kushlanpate i, “Taitüoh, ahngpate nange hanghe nge itüoh.” Kushpawe Joab sheshao me ümmekhüm, hüyange phette tai.

²²Hüwante Zadok üha Ahimaaz nishe Joabte i, “Hanghe peilakeih peikei, tao-o Kushpa pheite phet shihning.” Hüyange Joab i, “Ngaolan jingne-a nange hango küw yetüolak she shingyange nang hangne phetlak, ü-ha!”

²³“Hanghe peilakeih peikei, Iye i, tao phetlak.” Tüokhei Iye Ite i, “Phettüoh.” Hüwante Ahimaaz Jordan kahjee lam yekaote phet, hüyange Kushpa shaolei.

²⁴Sha-a David peten nipa me shotte ngoh, hüyange weyompa-a peten noktok jant yeme ong, hüyange aope Iye mükshaoh-e leiye tei, hüyange lei, Iye kahta ja I shaha phetpu nge.

²⁵Yompawe nyik hüyange ahngpate i, hüyange ahngpawe i, “I shaha ne mengma-a, I ju me ngaolan ümei kiyange ngohnang.” Hüyange I she-o she-o she pei.

²⁶Tüophei me yompawe ülao kahta ja phette yepu nge; hüyange yompawe peten mepupate nyik hüyange i, “Leihuyah, ülao ja-o I shaha phetnangpu!” Ahngpawe i, “Iye-o ngaolan yahpeinang.”

²⁷Yompawe i, “Taowe leipuma-a üwangne phetpupa-a Zadok üha Ahimaaz phetpu lenangki.” Hüyange ahngpawe i, “I kahta ümei, hüyange ngaolan ümei phei peinang.”

²⁸Hüwante Ahimaazwe ahngpate wennetam, “Khongküm meiye ngohnang.” Hüyange Iye ahngpa sheshao me I sheta kahtokte khuh tayange i, “Youngwanpa nang Kahwang moimanpupa mengtüoh, aowe ü-nokpu ahngpa phei tüi-e yak nopalan phünne pha!”

²⁹Ahngpawe i, “Naoshepa Absalom meiye ngohya?” Ahimaaz jan, “Joab-e aope nang shaoshanpa shon, taowe moppu üyong ja nge, hüpoi hanghe yeih taowe yeshing.”

³⁰Ahngpawe i, “Shejaitepha, hüyange tüome yongtüoh.” Tüokhei I yan hüyange yepope yong.

³¹Hüyange leihuyah, Kushpa pei; hüyange Kushpawe i, “Ü-nokpu jingne ngaolan ümei! Hangjingne Youngwanpawe tenyih nang yak me nang phei tüi-e yongpu wong khongküm mepu phünne phateki!”

³²Ahngpawe Kushpate tong, “Naoshepa Absalom meiye ngohya?” Hüyange Kushpawe i, “Ü-nokpu ahngpa wepalan, hüyange ümengpa jingne nang phei tüi-e yongpalan khongkümpute tüopa naoshe kih-e ngohtam tüoh.”

³³Hüwante ahngpa yeonge mongmeng, hüyange peten ütangye tüpte ong, hüyange shap; hüyange I ongwante, Iye i, “O üha, Absalom üha, üha Absalom! Nang nanleiye taopahi lihah shepute, O Absalom üha, üha!”