Read Konyak Naga 2 SAMUEL 19 Bible Online

2 SAMUEL 19 - Konyak Naga bible

2 SAMUEL 19

¹“Leihuyah ahngpa shapnangki hüyange Absalom jingne mang shap nangki,” she Joabte shingne tam.

²Tüokhei tüopa nyih me okpu ngepuwa kahta khongkümpu jingne mang shappu nyih ne meng; hangjingne tüopa nyih me kahtalan-e i, “Ahngpawe yoi ha jingne mongmenge shappu nyih ngohnang.”

³Shapju me kahtalan-e phette taiwante wüowe ngohpu kih-e kahtalan-e tüopa nyih-a chingnyute yelangmanpe ong.

⁴Ahngpawe yoi sheta büang; hüyange ahngpawe ngao üyong ngaiye üngwün, “Üha Absalom, O Absalom, üha, üha!”

⁵Hüwante Joab ahngnokte ong, hüyange Ite i, “Tenyih nange nang shaoshanpalan khongküm wüopuwe sheta büangne tamteki, aoyinne tenyih nang üyin, hüyange hayimlan hüyange yhalalan hüyange nang shekonyulan hüyange nang phongphe nyulan üyin yintam,

⁶hangjingne nangte nupalante nange ken hüyange nangte kenpalante nange nunang. Hangjingne woipalan hüyange shaoshanpalan nang sheshao me hangne-o yeje she tenyih nange meimei-e shingne tamteki; hangjingne tenyih taowe hatüo nge oknang, hüke Absalom üyin ngohshih ma-a hüyange toman khongkümpu liteiye ngohshih ma-a, hüwante nang mongmeilak.

⁷Sha-a tüojingne yayong tüoh, taiye nang shaoshanpa lante toloimeine tam-e ngaotüoh, hangjingne Youngwanpawe taowe jieng jepnang, nang yetaima-a, teya nang phei kahta ja nehoi yengoh lak. Hüyange hatüowa nang jingne nang naoshewan hipak mepu sha-ate ngoiye nang tangme ümeng peipu; khongkümpu phei shemeng pupa ne menglak.”

⁸Hüwante ahngpawe yayong, hüyange Iye peten me shot. Hüyange kahta lilite i, “Leihuyah, ahngpa-a peten me shot-e ngohnang.” Hüyange kahta lili ahngpa tangte pei. Sha-a Israel kahta lili yoi nokte phette yanteiye ngoh yangki.

⁹Israel jat khongküm, moilan jemyange mop ngaiye i, “David ahngpawe teman wepalan yak mepu teman yin, hüyange Philistialan yak mepu teman yintam; hüyange sha-a I Absalom mepu phette taiyange kahmük-a tüoh.

¹⁰Hüpoi Absalom aohi teman tangme teman-e minnga phowe le, shapjume liteki. Sha-a tüojingne, hangne David ahngpa nishe yah yelak jeng ütamme ye ngangpu?”

¹¹Israellan moppu ngaolan David ahngpa tangte pei, hüyange ahngpawe tüopa ngaolan Zadok hüyange Abiathar ngengpalan tangte shon, “Judah lwngmeilante itüoh, ‘Hangne ahngpa inokte yahyelak jeng Israel khongkümpuwe ngaopu ahngpa tangte peiteiye ngohnang, numan pahi ükümpa ne mengpu?

¹²Numan ü-jeihei naolan, numan ü-waan hüyange ü-mei hüma-a hangne ahngpa leih yahyelak jingne numan ükümpane mengpu?’

¹³Hüyange numan-e Amasate itüoh, ‘Nang ü-waan hüyange ü-mei ne yejepu a? Sha-a me peiye Joab nanleiye sha-a me peiye ü-wetaipalan ükhong woipa ja ne nang yemengküma-a Kahwange üte hüke, hüyange üne-o ünyei nehoi lingne tamtüoh.’ ”

¹⁴Hüyange Iye Judah kahta khongkümpu mongjang kahta ja kih-e woiye pei ok; tüojingne iman-e ahngpa tangte ngaolan shon, “Leih yekei, nang hüyange nang shaoshanpalan khongküm.”

¹⁵Tüokhei ahngpa Jordan te leihye. Hüyange taiye ahngpa pongte hüyange Jordan kaiye ahngpa-a woiye peilak Judah kahtalan Gilgalte pei.

¹⁶Gera üha Shimei, Benjaminlan, Bahurim mepu Judah kahtalan phei David ahngpa phei hüolak mamme yayong.

¹⁷Hüyange Iphei Benjamin kahta haja ja ngohyangki. Hüyange Saul nok shaoshanpa Ziba Iphei hayim pen me nga hüyange I shaoshanpalan da, mamme tam-e ahngpa sheshaote Jordante lai;

¹⁸Ahngpa noksalan yahyelak, hüyange Iye hanghe meinang she teihnang hatüo linge tamlak jingne pei. Hüyange Gera üha Shimei, I Jordan kaiye peiwante ahngpa sheshao me ümme khüm.

¹⁹Hüyange Iye ahngpa te i, “Ü-nokpuwe üte ümeng tah tükpha yejema-a ü-nokpu ahngpawe Jerusalem tüohpu nyih me nang shaoshanpawe hangke ümeng ling hatüo tahteih tüopha; ahngpawe hatüo mongme khah-e tah nang.

²⁰Hangjingne nang shaoshanpawe taowe ünu omyangki she shing; tüojingne, leihuyah, ü-nokpu ahngpa pongte Joseph nokphong khongkümpu mepu tao üwangpa ne tenyih tao peinang.”

²¹Zeruiah üha Abishai yong hüyange jan, “Tüopa jingne Shimei li ne tamlakyang, hangjingne Iye Youngwanpawe minnga phowe lepupa phoiwümne tamyangki.”

²²Hüpoi David i, “Numan Zeruiah hayim, numan tenyih ü-wepalan kih-e menglak, hüke taowe numante hangling lak? Tenyih Israel ütam li ne tamlak a? Hangjingne taowe tenyih Israel tangme ahngpa she taowe yeshingpu a?”

²³Hüyange ahngpawe Shimei te i, “Nang yelilak.” Hüyange ahngpawe Ite jiengjeppu pha.

²⁴Saul ühu Mephibosheth ahngpa pongte yu; ahngpa yanne taipu nyih mepu I yinne leih yepu nyihte ngoiye, Iye yoi yate yenamyeno, ye-i-ma-a I juminte yelei, ye-i-ma-a I nyemo yeshao.

²⁵Hüyange Iye aope ahngpa pongte Jerusalem mepu yu, ahngpawe Ite i, “Mephibosheth, hangne nang ü-phei yetaipu?”

²⁶Iye jan, “Ü-nokpu, O ahngpa, ü-shaoshanpawe tao lowe tam; hangjingne nang shaoshanpawe Ite i, ‘Tao ahngpa phei taine tao shotlak gado ja tümtüoh,’ Hangjingne nang shaoshanpa yafaipa.

²⁷Iye nang shaoshanpa ü-nokpu ahngpate lowelamne tam. Hüpoi ü-nokpu ahngpa Kahwang shongmokpa leye ngohnang; tüojingne nang sheshao me meipupa ja lingtam tüoh.

²⁸Hangjingne üpa noksalan-a khongküm noknokpu ahngpa sheshao me lilaklan ne hei wange ngohnang; hüpoi nang shaoshanpa aoyin nang khao me hahnang iman yo me angtam yangki. Tüojingne shaaji ahngpate üne-o üngwünlaka üme shupu ngohlak a?”

²⁹Ahngpawe Ite i, “Hangne nang jeng nange üne-o ngaopu shi? Taowe i, nang hüyange Ziba nangniye Saul jing moth tamme yahlak.”

³⁰Hüyange Mephibosheth ahngpate i, “Oh, ü-nokpu ahngpa nang yinne ye-e ngohtepuwe üjingne wangpu, Ite khongküm yahne tamtüoh.”

³¹Sha-a Gileadlan Barzillai Rogelim mepu lai; hüyange I ahngpa phei I Jordan kaiye lüngetamlak jingne tai.

³²Barzillai yeonge wutepu kahta, hüke wangpeng detet ngoiteiye ngoh; hüyange Iye ahngpate I Mahanaim me ngohwante hahying pha; hangjingne I yeonge hakpa ne ngoh.

³³Ahngpawe Barzillai te i, “Nang ü-phei jamme kei, hüyange taowe nangjingne Jerusalem me namnowe tamlak.”

³⁴Hüpoi Barzillai ahngpate i, “Tao ahngpa phei Jerusalem te onge oklakne, tao üne-o jin hangshin laowe ngohlak?

³⁵Tao tenyih wangpeng detet ngohnang; ümeng ümei taowe shinge oklak a? Nang shaoshanpawe Iye hanghe hah yejema-a Iye hanghe yingnang hatüo jüppe nyüopu oklak a? Netanlan hem lokpu ngaowüng yejema-a sheko hem lokpalante taowe üne-o jaipu oklak a? Hüma-a hangne nang shaoshanpa-a ü-nokpu ahngpa jingne hangki yih ünyei ja ne menge tamlak?

³⁶Hüke yihnoonpu üyong tüolak taowe yewang. Nang shaoshanpa, ahngpa phei Jordan kaiye ütenhapu mongme lünge tampha ning.

³⁷Chingmei lamlinge nang shaoshanpa leih ye ne tamkei, tüome tao ü-chingnyu me, üpa hei ünyu mangjong phinme lipu oklak. Hüpoi hatüome nang shaoshanpa Chimham ngohnang; I ü-nokpu ahngpa phei taine tamtüoh, hüyange I jingne nangte hanghe yin meiye teih hatüo lingtam tüoh.”

³⁸Ahngpawe jan, “Chimham ü-phei tailak, hüyange taowe I jingne hanghe nang sheshaome meiye teih hatüo linglak; hüyange nange üte linge tamhupu khongküm taowe nang jingne linglak.”

³⁹Tüophei me kahta lili Jordan kaiye tai, hüyange ahngpa-o kaiye tai; hüyange ahngpawe Barzillai omhüp, hüyange I moimantam; hüyange I yoi ngohjingte leihye mah.

⁴⁰Tüokhei ahngpa Gilgal kaiye tai, hüyange I phei Chimham omme kaiye tai; hüyange Judah kahtalan khongküm, hüyange üne-o Israellan tangkhüw puwe ahngpa-a shomme woipei.

⁴¹Leihuyah, Israellan khongküm ahngpa tangte pei, hüyange ahngpate i, “Hangne teman jeiheinao Judahlan-e nang kuh taipu, hüyange ahngpa hüyange Inok noksalan, Jordan kaiye, hüyange Iphei David noksalan woi peipu?”

⁴²Hüyange Judahlan khongkümpuwe Israellante jan, “Hangjingne ahngpa-a toman phei puhpaipu toman owe ngohnang: hüma-a hangjing üne tüopa jengme numan mongshih ngaiye ngohpu? Ahngpa jing toman-e hahtampu a? Yejema-a Iye tomante hünghao phapu a?”

⁴³Hüpoi Israellan-e Judah lante jan hüyange i, “Ahngpa me toman meitam numan phei pen me nyeiye ngohnang, hüyange üne-o numan phei toman ünyei ngohnang; hüma-a hangne toman phoitampu? Toman ahngpa leihyene ngaopu toman üwangpa ne yeje pu a?” Hüpoi Judahlan ngaowa Israellan ngao phei shewong she ngoh yangki.