Read Konyak Naga 2 SAMUEL 2 Bible Online

2 SAMUEL 2 - Konyak Naga bible

2 SAMUEL 2

¹Tüophei me David-e Youngwanpate tonge i, “Judah chingnyu ütam tangte tao onghah heiya?” Hüyange Youngwanpawe Ite jan-e i, “Ongtüoh.” Hüyange David i, “Tao ümpehepate onglak?” Iye i, “Hebronte.”

²Tüokhei David Hebronte ong, hüyange üne-o I shekoni Jezreel sheko Ahinoam, Carmellan Nabal tüohpu Abigail woiyange ong.

³David, I phei ngohpu kahta lili yoi noksalan phei yahyange ong; hüyange iman Hebron chingnyu neikonpu me ngoh.

⁴Hüyange Judah kahtalan pei, hüyange tüome Judah nokphong tangme ahngpa ne menglak jingne iman-e David minnga phowe tam. Hüyange iman-e David te i, “Saul mang muwe tampalan-a Jabesh-gilead kahtalan.”

⁵Hüyange David-e ngaolan kipalan Jabesh-gilead te shon hüyange imante i, “Numan-e numan nokpu, hüke Saulte tüopa iyeshepu hüopu, hüyange I mang muwe tampu jingne Youngwanpa mepu numan moiman tüoh!

⁶Sha-a numante Youngwanpawe monghümpu hüyange yayeng hüotamshih! Hüyange numan-e tüopa lingpu nanjingne taowe-o numante tüopa yayeng leihphalak.

⁷Sha-a tüojingne, numan yak wongnangyah, hüyange numan mongyong yah! Hangjingne numan ahngpa Saul liteki, hüyange Judah nokphonge iman tangme ahngne menglak jingne üte minnga photeki.”

⁸Sha-a Saul wetaipalan ükhong woipa, Ner üha Abnerwe Saul üha Ishbosheth yahpeiye ngoh yangki, hüyange Mahanaim te I woi pei.

⁹Hüyange Iye Gilead tangme, Ashuritlan tangme Jezreel tangme, Ephraim tangme hüyange Israel khongkümpu tangme I ahngne mengetam.

¹⁰Saul üha Ishbosheth Iye Israel tangme ahngne menge wangwante wangpeng deli ngoh yangki, hüyange Iye wangpeng ni ahngne meng. Hüpoi Judah nokphonge David pheite woi.

¹¹Hüyange Hebron me Judah nokphong tangme David ahngne menge ngohpu hipak-a wangpeng nyit phei me lekeng wok.

¹²Ner üha Abner, hüyange Saul üha Ishbosheth woipalan, Mahanaim mepu Gibeonte ong.

¹³Hüyange Zeruiah üha Joab, hüyange David shaoshanpalan ong hüyange iman-e Gibeon shamyeng phinme hüo; hüyange iman ükhong ja shamyeng jayekao me, hüyange ükhong ja-a shamyeng jayekao me she shot.

¹⁴Abnerwe Joabte i, “Taowe nangte tongnang, naoshelan yongne tamtüoh hüyange teman sheshao me ngouyang phei iman wonne tamtüoh.” Joab janne i, “Meiteki.”

¹⁵Hüwante iman yayong hüyange i-jang iye wenne yong, Benjamin nokphong hei Saul üha Ishbosheth jingne penme ni, hüyange David hei shaoshanpalan jingne penme ni.

¹⁶Hüyange iman kahta liliye yoi shümpa shangme tük, hüyange yoi shümpa hempate yanglow-e teimet; tüokhei iman moilan jamshe toitayange li. Tüokhei tüopa kahmük hanghepa Gibeon me ngohnang tüopa nyoite “Yanglow kahjee” (Helkath-ha-zzurim) she nyik.

¹⁷Hüyange tüopa nyih me shapjuwa meiyange wanne ngoh; hüyange Abner, hei Israellan David shaoshanpalan sheshao me ye-okpu nge.

¹⁸Hüyange Zeruiah üha naoshe lüm-a tüome ngoh yangki; Joab, Abishai, hüyange Asahel. Sha-a Asahel meishitok phetpu shinne phette okke ngohyangki.

¹⁹Hüyange Ashelwe Abner pheite jange woi; hüyange Abner pheite jangwante Iye yakjahye ye-i-ma-a yaknyayete yelüp.

²⁰Hüwante Abnerwe tokphei yete lei hüyange i, “Hatüowa nang a Asahel?” Hüyange Iye jan, “Hatüowa tao.”

²¹Abnerwe Ite i, “Üte tahjangkei, nang yakjahyete yejema-a yaknya yete lüptüoh, hüyange nange naoshelan yomepu ja tüktüoh, hüyange nange I ngouyang yahtüoh.” Hüpoi Asahelwe Ipheite jangpu mepu yelüp.

²²Hüyange Abnerwe nishe Asahelte i, “Ü-pheite nang yejangpe leihye tüoh; hangjingne taowe nang kahtokte toitai lakshi? Hüma-a nangjei Joab te taowe hangke ü-sheta hüolak?”

²³Tüoyangpoi Asahel-e yelakpe jange woi; tüokhei Abnerwe yoi tokphei yeme I seanyute ngoumette tüppe tam, hüyange tokphei yeme lüowe ngai; hüyange I tüome toita, hüyange I ngohjing me li. Hüyange Asahel toitawe lipu nyoi me jange peipalan khongküm yepope yong.

²⁴Hüpoi Joab hüyange Abishai niye Abner pheite jange tai; hüyange Gibeon phao lamte taipu Giah sheshao me ngohpu Amman kahtang iman-e ngoiwante wanghe nyip.

²⁵Hüyange Benjaminlan iman nying nyingke jamshe Abner shongte jem, hüyange ükhong ja ne meng, hüyange kahtang ja me yong.

²⁶Hüwante Abnerwe Joabte nyik hüyange i, “Yanglow phei jinte teman hokke ngohlak a? Ükümne-a khah külak she nange yeshingpu a? Hangshin me nange kahtalante iman jeiheinao jange phetpu mepu leih yetüoh she nange yengaotampe ngohlak?”

²⁷Joab-e i, “Üyin Kahwang min me taowe jieng nang, nange yengao shihma-a ü-kahtalan-e numante ngainapte ngoiye jange woihah shepu!”

²⁸Tüokhei Joab-e nyawong wüng, hüyange kahta lili yepope yonge ngoh, hüyange shaaji Israel pheite jange yetai, yejema-a shaaji yewoi.

²⁹Abner hüyange I kahta khongkümpu tüoya Jordan kahjee kailin, hüyange Jordan yengyin kai. Ünenap Mahanaimte pei.

³⁰Hüyange Abner pheite jange taipu mepu Joab leihye; hüyange kahta lili Iye jamshe jemne tam-e iye leiwante, David shaoshanpalan kahta penmetu hüyange Asahel yenangpe ngohyangki.

³¹Hüpoi David shaoshanpa lan-e Benjamin hüyange Abner kahtalan gho lüm phei me dewok toiyange ngoh yangki.

³²Iman-e Asahel mang nowe yahpeiye, Bethlehem me Ipa mangjong me mu. Hüyange Joab hüyange I kahtalan wangnyak phapan kem, hüyange Hebron me iman-e wangngaine tam.