Read Konyak Naga 2 SAMUEL 20 Bible Online

2 SAMUEL 20 - Konyak Naga bible

2 SAMUEL 20

¹Sha-a Benjamin ja, Bicri üha, ühak yekohpu kahta ja min Sheba ngoh yangki; hüyange Iye nyawong wünge tam, hüyange i, “Toman David me meitam hango yenang, Jesse üha me toman hango meitam yenang, kahta lili yoi nyenok yamtüoh, O Israel!”

²Tüokhei Israellan khongküm David mepu yanne tai, hüyange Bicri üha Sheba pheite woi; hüpoi Judahlan-a mongjüonge ahngpa pheite Jordan mepu Jerusalemte woiye ong.

³Aope David yoi nok Jerusalemte ye; hüyange nokte paotong ne tüohpu phongphe nyulan pen moilan David-e yahngai, hüyange nokja me yompalan phangme ang, hüyange iman jingne hahying namnowe tam, hüpoi iman tangte I aope-o ye-ong. Tüokhei iman lipu nyihte ngoiye wamnyune menge tampuke iman küpyange ang.

⁴Hüwante ahngpawe Amasate i, “Nyih lüm mong me Judah kahtalan tüome nyik-e jemtüoh, hüyange nang omme tüome ngohtüoh.”

⁵Tüokhei Amasawe Judah nyikne tai; hüpoi hipak itpu nyih me I shonteiye ngoh.

⁶David-e Abishaite i, “Sha-a Bicri üha Shebawe Absalom phei ünyei shemeng she temante linglak; I nying nyingke neikonyange ngohpu chingnyu lante onge shaoshi ngaiye tamkülak yang, nang nokpu shaoshanpalan woiyange I jange taitüoh.”

⁷Tüokhei Abishai pheite, Joab hüyange Cherethlan hüyange Pelethlan, hüyange wongnangpu kahta khongkümpu tai; iman-e Jerusalem mepu Bicri üha Sheba jange tai.

⁸Aope iman Gibeon me ngohpu long üyong phinme ngoh, iman phei hüone Amasa pei. Sha-a Joab wehok-o tümyange ngoh, hüyange tüopa tangme shienghit, I yangleplak me yanglow ja leapyange ngoh, hüyange I sheshao yete wenwante hatüo yei.

⁹Joab-e Amasate i, “Nangphei meiye ngohyah, ü-jeiheinao?” Hüyange Joab-e Amasa jumin me I yakjahye-e Ite omhüp ne tük.

¹⁰Hüpoi Amasawe Joab yak me yanglow ngohpu ye-nge; tüokhei Joab-e Ite sea-me mette tam, hüyange nishe manmetpe I seatük kahtokte shaohta, hüyange I li. Hüwante Joab hüyange Inao Abishai Bicri üha Sheba jange tai;

¹¹Hüyange Joab kahta jawe Amasa shongme yong, hüyange i, “Aohipawe Joab meinang she teih, hüyange aohipawe David jingne ngohnang, I Joab pheite woiyah.”

¹²Amasa ütuh me yoi iy tangme lüpshüppe ngoh yangki. Hüyange shongte owe wenpu ütam-e I ngeye lak; hüyange aope kahtapawe kahta lili lakpu nge, Iye Amasa lamkengnyu me ütuh mepu kahkote yahlai, hüyange I tangme inkhek jawe yüohtüoh.

¹³Aope I lamkeng mepu yahtei, kahta lili Joab pheite Bicri üha Sheba jange tai.

¹⁴Shebawe Israel nokphong khongküm linne Bethmaacahlan Abel tangte tai; hüyange Bicrilan khongkümpu jem, hüyange Ipheite woiye tai.

¹⁵Hüyange Joab phei ngohpu kahta khongkümpu pei hüyange Bethmaacah me Ite neikon; chingnyute onglak jingne iman-e kah shokke daowe inne ling, hüyange hatüowa yomtep phei tinge yong, hüyange jantpenyu toitailak jingne iman-e kahtok shaowe ngoh.

¹⁶Hüwante konnangpu sheko ja tüopa chingnyu me ngoh, hüyange yhawe chingnyu mepu nyik, “Jaikei! Jaikei! Joabte itüoh, ‘taowe nang phei ngaolakei tüome wenkei.’ ”

¹⁷I yha shongte owe wen; hüyange shekonyuwe i, “Nang Joab a?” Iye jan, “Tao Üja.” Hüwante yhawe Ite i, “Nang shaoshannyu ngaolan jaikhu.” Hüyange Iye jan, “Taowe jaipha ning.”

¹⁸Hüwante yhawe i, “Üshongwante hüke ipu ngohyangki, ‘Abel me hei imante konngao tongne tamtüoh.’ Hüyange hüke iman-e toine menge ling.

¹⁹Israel me chingmei hüyange monghümpu yo me tao-o ja ngohnang. Nange chingnyu ja hanghepa Israel me nyuyong ja ngohnang hatüo mahtamlak jingne yamnang; hangne nange Youngwanpa jing mothlei-a lünge mahlak?”

²⁰Joab jan-e i, “Taowe lünge mahlak yejema-a mahtamlak-a ngao nehoi ngaone yetamhu!

²¹Hatüo üting yeje. Hüpoi Ephraim kahtang kahmük me kahta ja, min Bicri üha Shebawe, David ahngpa phei tüi-e yak noteki, I hei lantampha, hüyange taowe chingnyu mepu sheang tephaning.” Hüyange shekowe Joabte i, “Leihuyah, I shang jantpe kaiye nowe shüpphalak.”

²²Hüwante shekowe yha konhei ngao khongkümpu jonne kahta lili tangte tai. Hüyange iman-e Bicri üha Sheba shanglang, hüyange hatüo Joabte nowe shüp. Tüokhei Iye nyawong wüng, hüyange iman chingnyu mepu yoi nokte kahta lili yanmah. Hüyange Joab Jerusalemte ahngpa tangte leihye.

²³Sha-a Joab Israel wetaipalan ükhong üshei tangme woipa ne ngoh; hüyange Jehoiada üha Benaiah Kerethlan hüyange Pelethlan woipane ngoh;

²⁴hüyange Adoram toilingpalan (poonhah shei shaipu) tangme nokpu; hüyange Ahilud üha Jehoshaphat nyanne angpa ne ngoh yangki;

²⁵hüyange Sheva yaknyanpa ne ngohyangki; hüyange Zadok hüyange Abiathar ngengpalan ngoh yangki;

²⁶hüyange üne-o Jair mepu Ira, David jingne ngengpa ne ngoh.