Read Konyak Naga 2 SAMUEL 22 Bible Online

2 SAMUEL 22 - Konyak Naga bible

2 SAMUEL 22

¹Ao Youngwanpawe David wepalan yak khongkümpu mepu, hüyange Saul yak mepu yintam, tüopa hemngao tüopa nyih me David-e Youngwanpate ngaowe lok:

²Iye i, “Youngwanpa-a ü-longnyu, ü-yomtep hüyange tao yintampupa.

³Ü-Kahwanga ü-longnyu, ao me tao lonang, I-a ü-ree hüyange ü-yinye lakpa üwong, ü yomtep hüyange tao lojing. I-a ü yinye tampa, Iye tao shaoshi yateng mepu yintam nang.

⁴Taowe Youngwanpate nyik, hüyange ü wepalan mepu Iye tao yin tam. Youngwanpa min yongtüoh!

⁵“Lilakpa yinmok lanne tao neikon yange ngoh, yephünpu wangyei ümenge üte shüm.

⁶Mahlakpa wengtuh-e ü neikon yange ngoh, hüyange mangjonge üjingne tün tünyange ang.

⁷“Ü shaoshipu me taowe Youngwanpate nyik; Ü-Kahwangte taowe jamlak jingne nyik. I jing khümjing me Iye ü-ngaowüng jai, hüyange taowe jamlak jingne üngwünpu I nasate pei.

⁸“Hüwante kahtoknyu po hüyange nin; wang yajenthlan po hüyange mokh, hangjingne Kahwang mongshih ngaiye ngohyangki.

⁹I nateangsa mepu vünkhuh ngai, hüyange I ju mepu hahwinlak vün, vünhan phihlangpu phei I mepu loonge ngai.

¹⁰Iye wangdang hitne tam, hüyange lai; I yaphang me wangphom ünyak üjei ngoh yangki.

¹¹Iye cherub me shotyange hüyange puwe shokke ta; I wangyang yangteng tangme kemme pei.

¹²Iye yoi nying nyingke wangnyak üyonge yüohne tam, yeng shaha pheipu jeilehpu wangphom-e I neikon yange;

¹³I sheshao me wang phihlangpu mepu vün han loonge ngaipu ngoh.

¹⁴Hüwante Youngwanpawe wangmepu wangkhong tam, hüyange Ütahpa Kahwang mepu ngaowüng ngai.

¹⁵Iye lahhanlan kep, hüyange I jing wepalan yanne tam; wangphih-langne tamme Iye iman phette taine tam.

¹⁶Yengching ükong ükeng me ngaine tam, hüyange kahtoknyu yongjinga büangpu hango yenangpe, hüke aope Youngwanpawe yoijing wepalante teetam, hüyange I mongshih ngaipuwe üngwün.

¹⁷“Ütangpa mepu Youngwanpawe shonne taiye Iye tao yah; Yeng ülu mepu Iye tao shüiye yah.

¹⁸Ü-wongnangpu wepalan mepu Iye tao yin, üte nupalan mepu yintam; hangjingne iman üjingne jamloi wongnange ngohyangki.

¹⁹Aope tao shaoshipu yafün me ngoh, iman-e üte shüm, hüpoi Youngwanpawe tao yinne angyangki.

²⁰Wengtuh mepu Iye tao yintam, Iye tao yin, hangjingne Iye üte mongmei.

²¹“Ü-üjaopa phei phinne Youngwanpawe üte khintak pha; Ü-yak jaowe ngohpu phei phinne Iye üte moiman tam.

²²Hangjingne taowe Youngwanpa lamme kem, hüyange ü-Kahwang mepu tao yanne yetai;

²³Taowe I jing ngaokhümlan khongkümpu jon; I jing ngaokeng lante taowe win yejaipe yengoh.

²⁴I sheshao me tao ümeng phalak ne yenangpe ngoh she Iye shing, hüyange taowe ümeng linglak mepu yanne ngoh yangki.

²⁵Tüojingne Youngwanpawe ü-üjaopa phei phinne khintak pha, hangjingne üme ümeng yenangja she Iye shing.

²⁶“O Youngwanpa, aoyinne nangte monghüm nang, imante nange monghüm nang; hüyange aoyin khakshuwe ngoh imante lanshe meiye hüonang.

²⁷Aoyin jaosheye ngoh imante nange-o jaosheye ngohnang, hüpoi aoyin yemeipa lanne ngoh, iman phei nanga wepa

²⁸Aoyin innyaipu phei ngoh, nange iman yinne tam, hüpoi aoyin otayapeih iman nange nyaikhaine tamnang.

²⁹Üting, nang ü-vüntik ngohnang, O Youngwanpa; hüyange ü-Kahwange ü-wangnyak-a wangngai tamphalak.

³⁰Ü-wepalante shümlak jingne nange üte wong pha; hüyange iman-e meipe latyangpulan tangme okpu ngelak üngan wong pha.

³¹Tüopa Kahwang I toishaolan-a hangshin wangngoi, I ngaolan-a hangshin monghümlak pa! I phangme lopalan üshei jingne I-a ree kih-e ngohnang.

³²“Youngwanpa shaha Kahwang ngohnang; teman yinlak tienne okpuwa Kahwang shaha.

³³Tüopa Kahwang ü-lojing wongnangpa, Iye ü-kempu lamnyu yinne linge tamnang.

³⁴Iye ü-ya-a meishi üyha ha ya leye linge tam; hüyange Iye kahtang ütangpame yinne tam-e angtam nang.

³⁵Shapju jingne Iye üte thrimlei phanang; tüo kaiye wong shenangpupa lahkung taowe jonne oknang.

³⁶O Youngwanpa, nange üte yom hüyange tao yinne tam, hüyange nange jampuwe tao üyongne menge tam.

³⁷Nange tao phowe yahteilak mepu tükke ang, hüyange tao aope-o yeine yetam.

³⁸Taowe ü-wepalan jange tei, hüyange imante naowe tam; hüyange iman manmahtam manmahtam tao aope-o yelak.

³⁹Iman yelao oklakne taowe iman lüngetam, hüyange iman kawintam nang; iman ü-yaphang me toitawe ngoh nang.

⁴⁰Hangjingne shapju jingne nange üte wongnang puphei shienghit hittam, hüyange ü-wepalan tangme okpupa nge ne tam.

⁴¹Nange ü-wepalan ü-tangte iman tok shanne tam, aoyinne üte nu, taowe iman mahtam.

⁴²Iman-e jamlak yamme lei, hüpoi yintamlak ne ao-o yenangpe ngoh; iman-e Youngwanpate üngwün, hüpoi imante Iye yejan.

⁴³Taowe iman kahmak ansoo ne menge tam-e shüt, Chingyang sham kih-e taowe iman paikhoih tam, hüyange iman yanne tam.

⁴⁴“Nange üne-o ü-kahta teih-okpu tao yintam; nange tao jatlan üshangne menglak angetam; taowe yeshingpu kahtalanne shaapa-a ü-shaoshanne tam.

⁴⁵Yinpalan-e üte khümme peine tam; aope iman-e ü-mepu jai, iman-e winjaipu ngoh.

⁴⁶Yinpalan iman mongpai mah, hüyange iman nying nyingke lowe ngohpu nyoilan mepu nin ninshe ngaitam.

⁴⁷“Youngwanpa üyin ngohnang, hüyange ü-longnyu moimanpa ne mengpha; hüyange üyinyepu longnyu ü-Kahwang yonge tampha;

⁴⁸Iye ü-wepalan tangme üte okpupa pha; Iye jatlan-a ü-yaphang me peine tamyangki:

⁴⁹hüyange tao wepalan mepu woi yahtam nang. O Youngwanpa, nange ü-wepalan tangme okpu ngene tamnang; hüyange ümeng kahtalan mepu tao yintam nang.

⁵⁰“Tüokhei, O Youngwanpa, jat yo me taowe nangte minyongpu pha nang, hüyange nang min jingne minyongpu loklak.

⁵¹Kahwange yoijing ahngpate yintampu üyong Iye phanang, hüyange Iye minnga phopupate, Davidte, hüyange I ülite jintepu jingne yayeng shüpshe hüonang.”