Read Konyak Naga 2 SAMUEL 23 Bible Online

2 SAMUEL 23 - Konyak Naga bible

2 SAMUEL 23

¹Jesse üha David-a kahta ja aohipa Kahwange üyongne linge tam, Jacob Kahwange aohipa ahngne le, hüyange aowe Israel jingne yeonge meipu hem linge ngai. Hatüolan-a David-e ükümne ngaopulan ngoh nang

²“Youngwanpa yaha ü-kaiye ngao, I ngaowa ü-yi me ngohnang.

³Israel Kahwange ngaoyangki, Israel longnyuwe üte ngao; Ahngpa aowe ngaotingpa me wanglam lam yapeih, aowe Kahwangte nyampu me wanglam lamyapeih;

⁴I-a shomme wangphom yenangpe wanghe hepu ke, wailak tephei me hüng phihlange tampu wanghe ke ngohnang.

⁵Hüyange tüojing üne Kahwange ü-huhayim lante moiman tamlak, hangjingne Iye ü-phei jintepu jingne jiengjeppu ja linge tam, aope-o yephünlak teijanpu ja, aope-o yejeileilak janpu ja linge tam. Taowe lengpu khongkümpuwa halan; taowe okpu ngepuwa tüolan ne menglak, hüyange Kahwange ütingpa me tüolan-a peine tamlak.

⁶Hüpoi Kahwang yeshingpu kahtalan-a khongkümpu moiye winyang phei huh leye ngohnang: hangjingne aowe-o imante yakkenge yeletlak.

⁷Imante jonpu kahtawe yoi nying nyingke yan yejema-a ngou jonlak yang; tüolan-a jaosheye jakke tamlak.”

⁸David phei ngohpu ütahpa nyahponglan min tüolan ngoh nang: Josheb Basshebeth Tahchemonlan ja, lüm yo me üjengpa ja ne ngoh; Iye ghotet phei tüi-e I ngou no hüyange shapju ja me iman lanshe toi.

⁹Ütahpalan kahta lüm yo me Iphei loipupa-a, Ahohi üha Dodo, Iha Eleazar ngohyangki. Shapju hoklak jingne Philistialan jemme ngohwante, hüyange Israellan tokpheite shinne yewante I hüyange David-e iman kaiye tien.

¹⁰I yayong hüyange I yak towe nyai-e manlak manlak, hüyange yanglow me I yak nyeakyange manngai manngai Iye Philistialan lange tai; hüyange tüonyih Youngwanpawe okpu üyong okke tam; hüyange I pheite kahta toiye ngohpalan mepu toinan khoklak jingne hei Israellan woi.

¹¹Lümshepupa-a Haralan Agee üha Shammah ngoh yangki. Philistialan Lehi me, phengwu maawe ngohpu kahmük ja me jamshe jem; hüyange Israel kahtalan-a Philistialan mepu phette tai.

¹²Hüpoi Iye kahko hotan me yong, hüyange hatüo tien, hüyange Philistialan toi; hüyange Youngwanpawe okpu üyongja pha.

¹³Hüyange tahyahlak hipak oteiye naomei ütahlan delüm yo mepu naoshe lüm Adullam longsa, ümeken me David ngoh, tüo nyoite lai, hüwante Philistialan wetaipu ükhong Rephaim kahjee me lakke ngoh.

¹⁴Hüwante David-a meipe latyangpu kahtang me ngoh, hüyange Philistialan ükhong jawe Bethlehem omme yahteiye ngoh.

¹⁵Hüyange David-e yoonge teihyange i, “O ütamme nehoi Bethlehem yeng peten shongme ngohpu üte yingne phashih phang!”

¹⁶Hüwante naomeilan kahta lüm-e Philistia lakjing lüowe tai, hüyange peten shongme ngohpu Bethlehem yeng shao, hüyange hatüo yah, hüyange David tangte yahpei. Hüpoi Iye hatüo mepu yeying; yinghah shepu nanleiye Iye tüopa-a dopu ja ne Youngwanpate shokke tam.

¹⁷Hüyange Iye i, “O Youngwanpa, taowe hatüo aope-o yeyinglak! Hatüo yingma-a tüopa jingne üyin phünne phapalan iy yingpu ne mengkülak!” Tüokhei Iye tüopa mepu yeying. Tüolan-a mongyongpu naomeilan lüm-e lingpu toishao ngohnang.

¹⁸Sha-a Zeruiah üha Joab ünao Abishai-a “Delüm yo me üjengpa ne ngohyangki.” Hüyange Iye yoi ngou gho lüm phei tüi-e no hüyange iman toi, hüyange delüm yo me ütahpa ne meng.

¹⁹I-a delüm yo me ütahpa ne ngoh, hüyange iman woipa ne meng; hüpoi I-a “Naoshe lüm ütah ne mengpu shinne yemeng ok.”

²⁰Hüyange Jehoiada üha Benaiah, Kabzeel mepu, wongnangpu kahta, toi üyong lingpu kahta ja ngoh; Iye Moablan Ariel hayim naomei ni toi. Iye üne-o lai hüyange yi yeipu hipakne ngohwante yengkong mailang ja kahko me toi.

²¹Hüyange Iye Egypt lan kheyongpu kholang ja toi. Egyptpawe I yak me ngou ja ngoh; hüpoi Benaiah wongjoi ja hei jonyange lai, hüyange Egyptpa yak mepu ngou nyieyeyah, hüyange tüopa kahta yoi ngouwe muh toitam.

²²Tüolan-a Jehoiada üha Benaiahwe ling, hüyange naomeilan “Delüm” yo me ja ne ngoh.

²³Delüm yo me I-a ütahpa ja ne ngoh, hüpoi naoshe lüm ütahne mengpu shinne pa-a yemeng ok. David-e I-a I yompalan yo me üjengpa ne ang.

²⁴Delüm yo mepu ülaolan-a hüke: Joab ünao Asahel, Bethlehem mepu Dodo üha Elhanan;

²⁵Harod mepu Shammah, hüyange Elika;

²⁶Pelet mepu Helez, Tekao mepu Ikkesh üha Ira;

²⁷Anathoth mepu Abiezer, Hushah mepu Mebunnai;

²⁸Ahoh mepu Zalmon, Netophah mepu Maharai;

²⁹Netophah mepu Baanah üha Heleb, Benjaminlan Gibeah mepu Ribai üha Ithai;

³⁰Pirathon mepu Benaiah, Gaash kahjee mepu Hiddai;

³¹Arabah mepu Abialbon, Bahurim mepu Azmaveth;

³²Shaalbon mepu Eliahba, Harar mepu Jashen hayim Jonathan, Shammah,

³³Hararilan üha Shammah, Hararilan Sharar üha Ahiam,

³⁴Maacah mepu Ahasbai üha Eliphelet, Gilo mepu Ahithophel üha Eliam,

³⁵Carmel mepu Hezro, Arab mepu Paarai,

³⁶Zobah mepu Nathan üha Igal, Gad mepu Bani,

³⁷Ammon mepu Zelek, Zeruiah üha Joab ngouyang jonpa Beeroth mepu Naharai,

³⁸Jattir mepu Ira, hüyange Gareb,

³⁹Hitlan Uriah. Khongkümpu sheiyange nyahpong ütahlan delüm me nyit ngoh yangki.