Read Konyak Naga 2 SAMUEL 24 Bible Online

2 SAMUEL 24 - Konyak Naga bible

2 SAMUEL 24

¹Üne-o Israel phei tüi-e Youngwanpa mongshih ngai, hüyange Iye iman phei tüi-e David hengetam yange i, “Taitüoh, Israel hüyange Judah shangtoi iyelei tüoh.”

²Tüokhei ahngpawe nyahponglan woipa Joabte ngaokeng pha: “Nang pheipu woipalan yahyange taitüoh, Israel jat khongkümpu te ngoiye, Dan mepu Beersheba ngoiye taitüoh, hüyange taowe kahta shangtoi shinglak nanjingne iyelei tüoh.”

³Hüpoi Joab-e ahngpate i, “Sha-a Youngwanpa nang Kahwange kahtalan jalunne tamshih, iman hangshin ngohlakei ngohpoi; gho ngoiye, hüyange ü-nokpu ahngpa mükke hatüo ngene tamtüoh: Hüpoi hangne ü-nokpu ahngpawe tüopa linghuwe teihpu?”

⁴Hüpoi ahngpa ngaowe Joab hüyange woipa naomeilan tangme okpu nge. Tüokhei Joab hüyange woipa naomeilan ahngpa shongmepu Israel kahtalan shangtoi ilak jingne tai.

⁵Iman-e Jordan kai, hüyange Aroer mepu wang, hüyange kahjee me ngohpu mepu, Gad yekao hüyange Jazer yekaote tai.

⁶Tüophei me iman Gileadte pei, hüyange Hitlan kahmük Kadesh te pei; hüyange iman Dante pei, hüyange Dan mepu iman-e neikonne Sidonte tai.

⁷Hüyange meipe latyange ngohpu Tyre hüyange Hivitlan chingnyu hüyange Kananlan chingnyu üshei te pei; hüyange üküm ne iman Judah heyekao me Beershebake tai.

⁸Hüke kahmük khongkümpute ngoiye iman tai, lekeng tu phei me nyih da shepu üküm nyih iman Jerusalemte ye.

⁹Hüyange Joab-e ahngpate kahta shaijempu shangtoi pha; Israel me yanglow jonpu wongnangpu lakh tet ngohyangki, hüyange Judah kahta lakh nga ngoh yangki.

¹⁰Hüpoi David kahtalan shangtoi iyang phei me I yoi mongjange Ite lüt. Hüyange David-e Youngwanpate i, “Taowe hanghe ling tüopa me taowe ünu üyong omyangki; hüpoi sha-a, O Youngwanpa, taowe nangte yoppe tongnang nang shaoshanpa ünu ümeng yah teitepha, hangjingne taowe yeonge pienne ngapa toi ling yangki.”

¹¹Aope David napning shinlüo, Youngwanpa ngao David jing hipa Gad I tangte peiye i,

¹²“Taitüoh hüyange David te itüoh, ‘Hüke Youngwanpawe inang, Taowe nangte toilam lüm phanang; iman yo me ja letüoh, hümme taowe nangte hatüo linglak.’ ”

¹³Tüokhei Gad David tangte pei hüyange Ite shingne tamme hüyange Ite i, “Nang kahmük me seanyao yengle wangpeng lüm (lai ütamme wangpeng nyit she ngelak) nang tangte peine tamlak heiya, yejema-a nang, nang wepalan-e jangwante lekeng lüm phette tailak, yejema-a nang kahmük me nyih lüm leamdak ngaine tamlak? Sha-a nange teih nyüotüoh hüyange tao shonne tampa tangte hanghe janpu phalak teihtehu.”

¹⁴Hüyange David-e Gad te i, “Tao shaoshi üyong me ngoh nang; sha-a teman-e Youngwanpa yak me yeihah; hangjingne I yayeng shüpshe üyong ngoh nang; hüyange tao kahta yak me yeine tahtam.”

¹⁵Tüokhei shom mepu hipak itpute ngoiye Youngwanpawe leamdak shon; hüyange tüome Dan mepu Beersheba ngoiye Israel kahta haja denyit li.

¹⁶Hüyange aope Youngwanpa shongmokpa Jerusalem yekaote mahtamlak jingne I yak no; Youngwanpawe ümengpa mepu I mong lüppe ye, hüyange kahta mahtampa Kahwang shongmokpate i, “Hülan wangteki; shaapa-a nang yak tükke angtüoh.” Hüyange Youngwanpa shongmokpa Jebuslan Araunah tahnoijing shong me ngoh.

¹⁷David-e kahtalan mahtampu shongmokpa nge hüyange Youngwanpate i, “Leihuyah, taowe ünu jonyangki, taowe yemeipe lingyangki; hüpoi tüolan nyeeha lan-e iman-e hanghe lingpu? Chingmei lamlinge nang yak ü-phei tüi-e hüyange tenok phei tüi-e hüngtüoh.”

¹⁸Tüonyih muh Gad, David tangte pei, hüyange Ite i, “Ongtüoh, Jebuslan Araunah tahnoijing tangme wümjong ja lingtüoh.”

¹⁹Tüokhei Gadwe ngaowe tampu ngaome, Youngwanpa ngaowe tampuke I ngao jaiye David ong.

²⁰Aope Araunahwe leiye tei, hüyange ahngpa hüyange I shaoshanpalan I yekaote wenne nge; hüyange Araunah ong, hüyange ahngpa sheshao me I sheta kahtokte khuhyange ümmekhüm.

²¹Hüyange Araunahwe i, “Ü-nokpu ahngpa hanghe jingne nange nang shaoshanpa tangte peipu?” David-e jan-e i, “Youngwanpate wümjong ja linge tamlak jingne nang mepu tahnoijing shaklak tüome kahtalan tangte peipu leamdak meimahlak, jingne tao peinang.”

²²Hüwante Araunahwe Davidte i, “Ü-nokpu ahngpawe I sheshao me hanghe mei nge, hatüo yayah, hüyange phatüoh; jakke dolak jingne mahu, hüyange tahte yeihpu toinan hüyange mahu jingne hanna hatüo lengjong lei yahtüoh.

²³Tüolan khongkümpu, O ahngpa, Araunahwe ahngpate phanang.” Hüyange Araunah ahngpate i, “Youngwanpa nang Kahwange nange toidopu yahtamshih!”

²⁴Hüpoi ahngpawe Araunahte i, “Yeje, hüpoi taowe hatüo nang mepu ümee ja phawe shaklak; hüke yejema-a taowe jajangjawe shaapa-a Youngwanpa Ü-Kahwangte jakke dopu yephalak.” Tüokhei David-e tahnoijing hüyange mahu üponglan-a khüm ükhüw denga phawe shak.

²⁵Hüyange tüome David-e Youngwanpate wümjong ja ling, hüyange jakke dopu hüyange chingmei dopulan pha. Iye yoppe tongpu Youngwanpawe jaiyah; hüyange Israel mepu leamdak yan.