Read Konyak Naga 2 SAMUEL 3 Bible Online

2 SAMUEL 3 - Konyak Naga bible

2 SAMUEL 3

¹Saul hüyange David noksa nipa me wehok hipak laowe ngoh, hüyange David wong shenang shenang she ngai, hüpoi Saul noksa wong shemah shemah she mah.

²Hebron me Davidte hayimlan puhtam; hüyange Iha jeiyongpa-a Amnon, Jezreellan Ahinoam üha;

³hüyange nishepupa-a Carmellan Nabal tüohpu wamnyu Abigail mepu Chileab; hüyange lüm shepupa-a Geshur ahngpa Talmai yhala Maacah üha Absalom;

⁴hüyange peli shepupa-a Haggith üha Adonijah; hüyange nga shepupa-a, Abital üha Shephatiah;

⁵hüyange wok shepupa-a David sheko Eglah mepu Ithream. Tüolan hayim khongküm Hebron me Davidte puhtam.

⁶Aope Saul hüyange David noksa nipa me wehokpu ngoh, Saul noksa mepulan yo me Abner I nying nyingke wongnange ngai.

⁷Sha-a Saul phongphenyu ja min Rizpah, Aiah yhala ngoh yangki; hüyange Ishbosheth-e Abnerte i, “Üpa phongphenyu tangte nang hangne taipu?”

⁸Hüwante Ishbosheth ngao me Abner yeonge mongshih ngai hüyange i, “Tao Judah jing kuiha shang a? Tenyih taowe Saul noksa, I jeiheinaolan hüyange I shümpalante yayeng hüoyangki, hüyange David yak me nang phünne yepha; tüoyangpoi nange tenyih-a tüopa sheko jeng üte ümeng phanang.

⁹Sha-a ngaoleih ne menge yengaima-a Kahwange Abnerte hüke lingtam tüoh, hüyange Youngwanpawe hanghe Davidte jiengjep hatüo taowe I jingne yeling okma-a, üne-o ünyei-o lingtam tüoh;

¹⁰Saul noksa mepu ahngchinga jeileilak, hüyange David ahngpa shotjing Israel hüyange Judah tangme, hüke Dan mepu Beersheba ngoiye linglak!”

¹¹Hüyange Ishbosheth-Abnerte ülao ngao ja nehoi yejan ok, hangjingne Iye Ite yeonge nyam.

¹²Abnerwe ngaolan kipalan Hebron me ngohpu David tangte shonne i, “Kahtok hatüowa ao jing? Ü-phei nange teijanpu ja yahtüoh, hüyange leihuyah, Israel khongkümpu nang tangte yahpeilak ü-yak nang phei ngoh nang.”

¹³David-e jan-e i, “Meinangki; Taowe nang phei jiengjeppu ja anglak; hüpoi ülam ja taowe nang mepu wongpongne mengnang; hatüowa üwangne nange Saul yhala Michal woiye ü-phei hüone peiwante, manpei manpei, nang ü-sheta ye-ngelak.”

¹⁴Hüyange David-e ngaolan kipalan Saul üha Ishbosheth tangte shonne i, “Ü-sheko Michal ao jingne taowe Philistialan jupeng üjusho gho ja yhamee pha, yha üte ye ne tampha.”

¹⁵Hüyange Ishboshethwe shon, hüyange yha netanpa Patiel, Laish üha mepu yha woiye tai.

¹⁶Hüpoi yha netanpa yha taiwante shappe woi, hüyange yha pheite Bahurim ngoiye woi. Hüwante Abnerwe Ite i, “Leih yetüoh,” hüyange I leihyemah.

¹⁷Hüyange Abnerwe Israel lwngmeilan phei ngaowe i, “Lintepu hipak lili me numan tangme ahngne menglak numan-e David yam.

¹⁸Sha-a hüma-a hatüo lingtüoh, hangjingne Youngwanpawe David jeng hüke ngaowe i, ‘Ü-shaoshanpa David yakke Philistialan yak mepu hüyange iman wepa üshei yak mepu taowe ü-kahta Israel yinlak.’ ”

¹⁹Abnerwe üne-o Benjamin nokphonglan nasa me ngao; hüyange Abnerwe Hebronte taiye David nasa me Israel hüyange Benjamin nokphong khongkümpuwe lingpu meilak yangshe ipu khongküm i.

²⁰Aope Abner David tangte Hebronte Iphei kahta da woiyange pei, Davidte Abner hüyange Iphei peipu kahtalante mo tümme tam.

²¹Hüyange Abnerwe Davidte i, “Tao yayong shih ning, hüyange Israel khongküm ü-nokpu ahngpa tangte woijemlak, tüome nang phei iman-e jiengjeppu linglak, hüyange nang yaha-e yah-hupu khongkümpu tangme nange ahngne mengpu oklak.” Tüokhei David-e Abner shonne tei; hüyange I chingmei me tai.

²²Hüyange leihuyah, David shaoshanpalan, Joab phei chinghahne taipu mepu pei, hüyange iman phei nyieyeyahpu toinan nangjange yahpei; hüpoi Abner-a David phei Hebron me yenangpe ngoh; hangjingne Iye I shonne teiyange ngoh, hüyange I chingmei me taiteiye ngoh.

²³Aope Joab hüyange Iphei ngohpu wetaipalan ükhong leihye ngoh, iman-e Joabte i, “Ner üha Abner ahngpa tangte pei, hüyange Iye I shonne teiteki, hüyange I chingmei me taiteki.”

²⁴Hüwante Joab, ahngpa tangte pei, hüyange i, “Nange hanglingpu? Leihuyah, Abner nang tangte pei; hangne nange I shonne teipu, hüyange I-a hüke hei hangne taine tampu?

²⁵Ner üha Abner-a nange shing, nang lowelamlak jingne, hüyange nang tai ongpu, hüyange nange lingpu khongkümpu shinglak jingne I pei.”

²⁶Aope Joab David mepu ngai, Iye Abner tokpheite ngaolan kipalan shon, hüyange iman-e I Sirah yengnung mepu leihye woi ye; hüpoi David-e hatüo yeshing;

²⁷Hüyange aope Abner Hebronte leihye, Joabwe I lamnah yeme I phei jünge ngaolak üne peten yete woilai, hüyange tüome Ite sea me lütte tam, tüoken me li. Joab ünao iy shaipu jingne li.

²⁸Hüyange phei me hatüo David jaiwante Iye i, “Tao hüyange ü-ahngchinge, Ner üha Abner iy mepu jintepu jingne Youngwanpa sheshao me ünu ye-ompe ngohnang.

²⁹Hatüo Joab shang tangme, hüyange Ipa noksa khongkümpu tangme yeitamtüoh; hüyange Joab nokphong me püm mepu yünpu, yejema-a ngonpa ja, yejema-a wongjoi me neangyange ngohpu ja, yejema-a yanglow phei lipu ja, ye-i-ma-a hahying toinanpu ja ye-ompe tahngoh tam!”

³⁰Tüokhei Joab hüyange Inao Abishai imniye Abner toi, hangjingne Iye imni ünao Asahel Gibeon wehok me toi.

³¹Hüyange David-e Joab hüyange I phei ngohpu kahta khongkümpute ngaokeng phawe i, “Numan nyemo hittüoh, hüyange monnye intüoh, hüyange Abner mang jingne shaptüoh.” Hüyange David ahngpawe mangsheng paipalan pheite woi.

³²Hüyange iman-e Hebron me Abner mang mu; hüyange ahngpa ngao ngaiye shap; hüyange kahta lili shap.

³³Hüyange ahngpawe Abner jingne mang shappe i, “Ngapa kahta lipu kih-e Abner hangne lipu?

³⁴Nang yakme shayange ye-ang, yejema-a nang ya me yanwuwe yephin, ümenglan sheshao me kahta ja toitapuke nang hüke toita.” Hüyange nishe kahta khongkümpuwe shap.

³⁵Hüyange kahta liliye wanghe üne-o ngohwante David yohkah-e uhyingtamlak jingne ngang; hüpoi David-e jiengjeppe i, “Wanghe mannyippute taowe hahyingte jepma-a, yejema-a ülam ja hahma-a, Kahwange üte hüke, yejema-a ünyei nehoi lingtam tüoh!”

³⁶Hüyange kahta liliye hatüo shinge pei hüyange tüowe kahtalan mongmeine tam.

³⁷Tüokhei kahta liliye hüyange Israel khongkümpuwe tüonyih-a Ner üha Abner toilaka ahngpa mepu yeje she shing.

³⁸Hüyange ahngpawe I shaoshanpalante i, “Numan-e tenyih Israel me ahngha ja hüyange woipa üyong ja toitapu nyih ngohnang she yeshingpu a?

³⁹Hüyange minnga phowe lepu ahngpa ja ne jeyapoi tenyih tao wong yenangpe ngohnang; hüyange Zeruiah hayim tüolan kahta ü-sheshao me yakphei teilük puphei ngohnang. Youngwanpawe ümeng lingpalan te yoi toishao phei phinne küw tüone tamtüoh.”