Read Konyak Naga 2 SAMUEL 4 Bible Online

2 SAMUEL 4 - Konyak Naga bible

2 SAMUEL 4

¹Aope Saul üha Ishbosheth-e Hebron me Abner liteki she jai I yak wong yenangpe ngai, hüyange Israellan khongkümpu mokh-e ngoh yangki.

²Hüyange Saul üha Ishbosheth ükhong tangme woipa ne ngoh yangki; sheja min Baanah, hüyange japa min Rechab, Beerothlan Rimmon üha, Benjamin hayim mepu ne ngoh yangki. Hangjingne Beeroth-o Benjamin me omme ngoh.

³Hüyange Beerothlan Gittaimte phette tai, hüyange tenyih te ngoiye tüome yinhune menge ngohnang.

⁴Sha-a Saul mepu üli ne, Jonathan me yafai tephei netan naha ja ngoh. Aope Saul hei Jonathan lipu jeng Jezreel mepu ngaolan pei, I wangpeng nga naha ne ngoh yangki; hüyange I puhnyu (naopuhnyu) paiyah yange phette tai; hüyange yha phette taine mamwante haowe ta, hüyange yafaipa ne meng. Hüyange I min Mephibosheth ngoh yangki.

⁵Hüyange Beerothlan Rimmon hayim Rechab hei Baanah tai, hüwante wanghe langpu me Ishbosheth, I heeitam hahju me toloimeiye ngohwante, Inokte pei.

⁶Tafün shongme wheat tah leye sheko ja ngoh, hüyange yha mükngoih shong, hüyange nyaiye shimah. Tüokhei Rechab hei Baanah ümongte linne ong.

⁷Ümong te imni ongwante imni Ishbosheth shipu tüpte ong, ümeken me I meimeiye shiteiye ngoh, hüyange I toi. Hüyange imniye I ünglang, hüyange shangyah yange Jordan kahjee kaiye wangnyak phapan tai.

⁸Hüyange iman-e Ishbosheth shang David tangte Hebronte yahpei; Hüyange imniye ahngpate i, “Nang üyin yampupa nang wepa Saul üha Ishbosheth shangte leihuyah; hüyange tenyih ü-nokpu ahngpa, Saul hüyange I ülite Youngwanpawe phuh hahteki.”

⁹Hüpoi David-e Rechab hei Inao Baanah Beerothlan Rimmon ühalante jan, hüyange imante i, “Youngwanpa üyin me ngohtepuwe, aowe ü-yaha wepa üshei mepu yin!

¹⁰Aope shejawe, ‘Leihuyah, Saul liteki,’ she ngaolan ümei yah peinang she teihyange i; taowe Ite jon, hüyange Ziklag me I toi, hatüowa I ngaolan ümei jingne küw tüopu ngoh yangki!

¹¹Kahta ümenglan-e ümeng yenangpu kahta yoi noksa yoi shinleng me ngohwante toipuma-a hangke ünyei ne pahi menglak shi! Taowe sha-a nang yak mepu I iy yekanglak a?”

¹²Hüyange David-e yoi jing naoshelante ngaokeng pha, hüyange iman-e imnitoi, hüyange iman-e yak hei ya tehwin, hüyange imni-a Hebron yengnung nah me jhotte tüoh. Hüpoi iman-e Ishbosheth shang yah, hüyange hatüo Hebron me Abner mangkoksa me mu.