Read Konyak Naga 2 SAMUEL 6 Bible Online

2 SAMUEL 6 - Konyak Naga bible

2 SAMUEL 6

¹David-e nishe Israel leyangpulan kahta khongkümpu haja delüm jemne tam.

²David-e yayonge hüyange Iphei ngohpu kahta khongkümpu phei Judah mepu Baalah te, tüomepu Kahwang üjao ghonu yah onglak jingne tai, tüopa-a ngangpupa Youngwanpa ao Cherubim tangme shot-e ngohnang I min me nyik.

³Iman-e Kahwang ghonu tongtoi üla ja me ang, hüyange kahtangme ngohpu Abinadab nok mepu kiye ngai; hüyange Uzzah hüyange Ahio, Abinadab hayimlan-e tongtoi üla-a woi.

⁴Kahwang ghonu phei, hüyange ghonu shaote Ahio kem.

⁵Kongkilahha, kongki ümtük, pheamkao, pekok, hüyange yankok, kongki ülam khongkümpu phei David hüyange Israel nokphong khongkümpuwe Youngwanpa te yihnoonne I sheshao me mongmei hem lok-e wüng.

⁶Aope iman Nacon tahnoijing ngoiye pei, hüwante mahu üponglan yashah hüo, hüyange Uzzahwe yoi yak ngaiye Kahwang ghonute jon.

⁷Hüyange Youngwanpawe Uzzah tangme mongshih ngai hüyange tüome püohpu jingne toitam; hüyange tüome I Kahwang ghonu shongme li.

⁸David mongshih ngai, hangjingne Youngwanpawe Uzzah tangme mongshih ngaiye paiye tam hüyange Iye tüopa kahmükte Perezuzzah she tenyih ngoiye nyiknang.

⁹Tüonyih-a David Youngwanpate yeonge nyam, hüyange Iye i, “Youngwanpa ghonu taowe hangke ü-phei yahteilak?”

¹⁰Tüokhei David-e Youngwanpa ghonu David chingnyute yah yepeihu; hüleima Gathlan Obed-Edom nokyekao te Iye jeileiye woi tai.

¹¹Youngwanpa ghonu Gathlan Obed Edom nok me lekeng lüm ngoh; hüyange Youngwanpawe Obed Edom, hüyange Inoksa khongkümpu moimantam.

¹²David ahngpate hatüo shingne tamme i, “Kahwang ghonu ngohpu jingne Youngwanpawe Obed Edom noksa, hüyange I jing khongkümpu moiman tamteki.” Tüokhei David tai hüyange Obed Edom nok mepu Kahwang ghonu yah ngai, hüyange David chingnyute hoongli mongongpu phei yahye.

¹³Hüyange aope Youngwanpa ghonu paipalan ya-kai wok kemme wange ngoh David-e lakne tamyange mahu üpong ja hüyange panne angpu üha ja she toido.

¹⁴David-e Youngwanpa sheshao me I wong üsheiye polok; hüyange David ngengpa phakshaoh shaha shaohyange ngohyangki.

¹⁵Tüokhei David hüyange Israel nokphong khongkümpuwe langphenge, hüyange nyawong wünge Youngwanpa ghonu yah ong.

¹⁶Youngwanpa ghonu yahyange David chingnyute ongwante, Saul yhala Michal tawo mepu leiye tei, hüyange David ahngpa Youngwanpa sheshao me homme tükke hüyange polokpu nge; hüyange yhawe yha mongjangme Ite yaoweletam.

¹⁷Iman-e Youngwanpa ghonu yah ong, hüyange David-e tüopa jingne nyenok weyange ngohpu ümongme tüopa anglak nyoi me tüoh; hüyange David-e Youngwanpa sheshao me jakke dopu hüyange chingmei dopu pha.

¹⁸Aope David-e jakke dopu hüyange chingmei dopu shoyapeih, Iye kahtalante Ngangpupa Youngwanpa min me moimantam.

¹⁹Hüyange kahta üshei yo me, hüke Israel bangha khongkümpu yo me, netante hüyange shekote, kahta lilite anbung japong, mei oun japong, hüyange wulickwan Iye pha. Tüophei me kahta lili yoi yoi nokte yantai.

²⁰David-e yoi noksalante moiman phatamlak jingne leihye. Hüpoi Saul yhala Michal David pongte yu hüyange i, “Tenyih Israel ahngpa hangke müktishiwa-e ngoh, ao tenyih yoi nying nyingke yoi shaoshannyu lan sheshao me, yeje jepulan yewüope yoi nying nyingke pümkeng ngohpuke ükengme ngoh yangki!”

²¹David-e Michalte i, “Youngwanpa sheshao me tao poloknang, aowe Youngwanpa kahta Israel tangme, tao woipa ne menglak, nangpa hüyange Inok noksa khongkümpu tangme tao le-ngai; tüokhei taowe Youngwanpa sheshao me hoongli mongonglak.

²²Tüopa phei shenyei she tao nuwetamlak ne ngohlak, hüyange taowe polokwante nulakpa ne ngohlak; hüpoi nange ipu shaoshan nyulan iman sheshao me tao minyong ngampai pu phei ngohlak!”

²³Hüyange Saul yhala Michal yha lipu nyihte ngoiye naha yenangpe ngoh.