Read Konyak Naga 2 SAMUEL 7 Bible Online

2 SAMUEL 7 - Konyak Naga bible

2 SAMUEL 7

¹Sha-a aope ahngpa yoi nok me tüm tayange ngohne wang, Youngwanpawe I neikonne ngohpu wepalan mepu toloimeipu pha.

²Hüwante ahngpawe Nathan hipate i, “Sha-a leihuyah, tao cedar phei wepu nok ja me ngohnang, hüpoi Kahwang ghonuwa nyenok phang ja me ngohnang!”

³Nathan-e ahngpate i, “Taitüoh, nang mongjang me linghuwe ngohpu khongküm lingtüoh; hangjingne Youngwanpa nang phei ngohnang.”

⁴Hüpoi tüoya muh Youngwanpa ngao Nathan tangte pei, hüyange i,

⁵“Taitüoh hüyange ü-shaoshanpa David te itüoh. ‘Hüke Youngwanpa inang; üte khümjing ja wetamlak pa-a nang yeje.

⁶Hangjingne Israel kahtalan Egypt mepu Taowe woiye ngaipu nyih mepu, hüke tenyih te ngoiye Tao nok ja me jeman ngoh, hüpoi nyenok ja me kemme peiyangki.

⁷Üshei yeme ümeken nyoi me Tao Israel kahtalan phei kem, Taowe Israel nokphong üshei phei, aoyinte Taowe ü-kahta Israel paolak jingne ngaophawe tam, imante, “Hangne numan-e üte cedar phei nokja yewetampu? she Taowe ye i.” ’

⁸“Tüokhei sha-a hüke nange ü-shaoshanpa David te ilak, ‘Hüke ngangpupa Youngwanpawe inang, Ü-kahta tangme, Israel tangme, nang woipa ne menglak nanjingne, hahnyoi mepu, nyeehalan phei woipu mepu Taowe nang yah;

⁹hüyange nang ümpeyekaote tai Tao nang phei ngoh, hüyange nang sheshao mepu nang wepa khongkümpu lange win; hüyange kahtoknyu me ngohpu üyonglan min kih-e Taowe nang min üyong ne linge tamlak.

¹⁰Hüyange ü-kahta Israel jingne Taowe nyoijing ja lelak, hüyange iman deiye tüohlak, tüome iman ngohjing nyoi ngohlak, hüyange shaaji yepolak; yejema-a üwangpu kih-e, ümengpa hayimlan-e iman shaoshi ne yetamlak;

¹¹hüke ü-kahta Israel tangme kahpalan phawe tampu nyih me peiye; hüyange nang wepa üshei mepu Taowe nang toloimei ne tamlak. Tüo tokte üne-o Youngwanpawe nangte nok ja wetamlak she Youngwanpawe inang.

¹²Aope nang nyih kümme peilakeih, hüyange nang payimlan phei shilakei, Taowe nang phei me nang mepu üli ngaitamlak, hanghepa nang püm mepu ngailak, hüyange Taowe I ahngching linglak.

¹³Iye ü-min jingne nok ja welak, hüyange Taowe I ahngching ahngpa shotjing jin jintepu jingne linglak.

¹⁴Tao Ipane menglak, hüyange I ü-ha ne menglak. Aope Iye ünu jonlakei, Taowe I kahtalan shengshaohwe, hüyange kahtalan-e shütpuwe shangne tamlak.

¹⁵Hüpoi Saul aohipa mepu Taowe ü-shüpshe yahtei, hüyange nang sheshao mepu winpu kih-e pa-a, ü-shüpshe I mepu yeyanlak.

¹⁶Nenok hüyange nang ahngching nang sheshao me jintepu jingne wongnange ngohlak; nang ahngpa shotjing jintepu jingne linglak.’ ”

¹⁷Tüolan ngao khongkümpu kih-e hüyange tüolan itpu ngaolan kih-e, hüke Nathan-e David te ngaowe tam.

¹⁸Hüwante David ahngpa nyenokte ong hüyange Youngwanpa sheshao me shot; hüyange Iye i, “O Youngwanpa Kahwang, nange tao teshinne woiye peilak üne tao aoshi hüyange tenok noksa-o hanghe shi?

¹⁹Hüyange O Youngwanpa Kahwang, nang sheshaoma-a üne-o hatüowa üjoiha ja hei; hüpoi üne-o nange nang shaoshanpa nok jeng ngoikülak hipak laolünge ngohlak jeng ngaoteki; hüyange hatüowa kahta hangke, hüke, O Youngwanpa Kahwang!

²⁰Hüyange David-e üne-o hanghe ünyei nangte ipu oklak? Hangjingne nange nang shaoshanpa shingnang, O Youngwanpa Kahwang.

²¹Nang ngaolan jingne, hüyange nang mongjang kih-e, nang shaoshanpate tüopa shingne tamlak, tüopa üyonglan khongküm nange ling.

²²Tüokhei nanga hangshin yongpu, O Youngwanpa Kahwang; hangjingne toman na me jaipu khongkümpu kih-e, nang kih-e ao-o yenang, yejema-a nang tokte kaiye Kahwang hango yenang.

²³Hüyange hanghe jat ja kahtoknyu me nang kahta Israel leye, aoyin Kahwange yoi jingne jat ja ne menglak, yintamlak jingne tai, I min ja ne mengetam lak, nang jingne toi üyong linglak, hüyange nang kahmük jingne nyam nyamshepu toi linglak, nang kahtalan sheshao me hangke nang tangte Egypt mepu jatlan hüyange iman kahwanglan mepu yintam?

²⁴Hüyange nange nang kahta Israel nangjingne jintepu jingne nang kahta ja ne ngohlak ling; hüyange nang, Youngwanpa iman Kahwang ne meng.

²⁵“Hüyange sha-a, O Youngwanpa Kahwang, nang shaoshanpa jeng nange ngaopu ngao, hüyange Inok jeng hatüo jintepu jingne nange mongetam nang, hüyange nange ngaopuke lingtam shih.

²⁶Hüyange nang min jintepu jingne müktishiwa ne tam-e itüoh, ‘Ngangpupa Youngwanpa-a Israel tangme Kahwang;’ hüyange nang shaoshanpa David nok nang sheshao me linglak.

²⁷Hangjingne nang, O Ütahpa Youngwanpa, Israel Kahwang, nang shaoshanpa tangte ütahte ngaiye iyangki, ‘Taowe nangte nok linge tamlak’; tüojing üne nang shaoshanpawe nangte I mongjang me tüopa yoppu yoplak jingne wongnang nang.

²⁸“Hüyange sha-a, O Youngwanpa Kahwang, nang Kahwang ngohnang, hüyange nang ngaolan-a üting ngohnang, hüyange nange tüopa toi ümei hatüo nang shaoshanpate janyangki;

²⁹tüojingne sha-a nang shaoshanpa nok nange namnowe hüyange moimanpha, tüome nang sheshao me hatüo yelakpe ngohlak; hangjingne nange, O Youngwanpa Kahwang, hatüo ngaoyangki; hüyange nang moimanne nang shaoshanpa nok jintepu jingne moiman tampha.”