Read Konyak Naga 2 SAMUEL 8 Bible Online

2 SAMUEL 8 - Konyak Naga bible

2 SAMUEL 8

¹Sha-a ütenja ngohyang phei me David Ahngpawe nishe Philistia lante shüm, hüyange iman nao tamyange hüyange David-e iman yak mepu Methegammah yah.

²Iye üne-o Moablante naowetam, hüyange iman kahtok me toiloi taine tam; hüyange lüm yo mepu ja yinyange ni toi. Tüokhei Moablan David shaoshanpalan ne meng hüyange poon yah pei.

³Üne-o David-e Zobah ahngpa, Rehob üha Hadadezer, I yoi yikeng Euphrates me peiye yah yene taiwante naowetam.

⁴Hüyange I mepu David-e koipong pheipu wetaipalan haja ja phei me gho nyit, hüyange ya me kempu wetaipalan haja da yah; hüyange David-e yoi jing pong tongtoi jingne koipong gho ja angyange ülao lan khongkümpuwa üyung phakke tam.

⁵Aope Damascus Syrialan-e Zobah ahngpa Hadadezerte jamlak jingne nyahponglan shon, David-e imante shüm hüyange Syrialan haja da pheime ni toi.

⁶Hüwante David-e Damascus me we ngohpu Syria me wetaipalan ükhong ang; hüyange Syrialan David shaoshanpa ne meng, hüyange poon yah pei hüyange ümpeyekaote I tai Youngwanpawe David te okpu pha.

⁷Hüyange Hadadezer jing shaoshanpalan-e jonpu hon reelan David-e yah, hüyange tüolan-a Jerusalemte yah pei.

⁸Hüyange Hadadezerwe wanglam lampu Betah hei Berothai chingnyulan mepu, David ahngpawe shakphan yan üngang yahtai.

⁹Aope Hamath ahngpa Toi-e Hadadezer wetaipalan ükhong khongkümpu David-e naoteki she jai,

¹⁰hüwante Toi-e Iha Joram David ahngpa tangte, Ite salam phalak, hüyange I moimantamlak jingne shon hangjingne David-e Hadadezer phei tüi-e hok hüyange Iye nao. Hangjingne Hadadezer I phei wehok-e wepane ngohyangki. Hüyange Joram-e Iphei khüm hei hon, hüyange shakphan yan toinan yahpei;

¹¹David ahngpawe tüolan-a Youngwanpate yoppe khümpu me jonlak jingne ülao jatlan Iye naoyange yahyepu hon hei khümlan phei jam-e phünne phawe jaowetam.

¹²Edom mepu Moab, Ammonlan, Philistialan, Amalek, hüyange Zobah ahngpa, Rehob üha Hadadezer mepu yahpu toinanlan.

¹³Hüyange David leihyewante, Iye Edomlan hüm kahjee me haja penmetet toipu me ünyei ne min ütahte ngai.

¹⁴Hüyange Iye Edom üshei yeme wetaipalan ükhong ang; hüyange Edomlan khongkümpu David shaoshanpalan ne meng. Hüke Youngwanpawe David taipuye üshei me okpu pha.

¹⁵David Israel khongkümpu tangme ahngne meng; hüyange David-e yoi kahta khongkümpu tangme ngaophün hüyange ngaotingpa ling.

¹⁶Hüyange wetaipalan tangme Zeruiah üha Joab; hüyange Ahilud üha Jehoshaphat pungao nyanpa ne ngohyangki;

¹⁷hüyange Ahitub üha Zadok, hüyange Abiathar üha Ahimelech ngengpalan ne ngoh yangki; hüyange Seraiah yaknyanpa ne ngoh yangki;

¹⁸hüyange Jehoiada üha Benaiah Cherethlan hüyange Pelethlan tangme ngoh; hüyange David hayim ngengpa ne ngoh.