Read Konyak Naga 1 AHNGPALAN 1 Bible Online

1 AHNGPALAN 1 - Konyak Naga bible

1 AHNGPALAN 1

¹David ahngpa wupa hüyange I hipak-a lin-e taine wange ngoh yangki; hüyange shaoshanpalan-e Ite inkhek inne tamyapoi Iye üsheam yetüo ok.

²Tüokhei I jing shaoshanpalan-e Ite i, “Nang Üyongpa, ahngpa jingne wangngoipu naoyhaha ja yamtam hah hüyange yha ahngpa shongme ngohlak, hüyange nangte namno ne tamlak. Yha nangphei neak-e shilak hüyange nangte üsheam phalak.”

³Tüokhei iman-e naoyha meipu sheko yha ja Israel neikonpu üshei me yam, hüyange yampu kihpu Shunamlan Abishag she minpu iman-e tüo hüyange yha ahngpa tangte woi pei.

⁴Hüyange yha-a yeonge naoyha mei-e ngoh, hüyange ahngpa phei nok ne menge tam, hüyange yhawe ahngpate paowe tük, hüpoi Iye yha yungkeng yekai.

⁵Sha-a Haggith üha Adonijah yoi nying nyingke yongelüowe i, “Tao ahngne menglak”; hüyange Iye pongtongtoi hüyange koipongpalan hüyange kahta denga I sheshao me phetlak jingne tüm.

⁶Ipawe hangkih tingme-o, “Nange hangne hüke ling?” she ngaowe I mongmengne yetam; hüyange I-o wangengoipu kahta ja ne ngoh, hüyange I Absalom phei me puh.

⁷Iye Zuriah üha Joab hüyange ngengpa Abiathar phei mong ngao i, hüyange iman-e Adonijah pheite woiye Ite jam.

⁸Hüpoi ngengpa Zadok hüyange Jehoiada üha Benaiah hüyange hipa Nathan hei Shimei, hüyange Rei hüyange naomeilan aoyin David phei ngoh, Adonijah pheite yetai.

⁹Hüyange Adonijahwe nyee, mahu hüyange panne angpu yinmoklan, Enrogel jayekao me ngohpu, pu longnyu me toido, hüyange Iye yoi jeiheinaolan khongküm, ahnghalan, hüyange Judah kahta khongküm hüyange ahngpa shaoshanpalan nyik.

¹⁰Hüpoi hipa Nathan, hüyange Benaiah hüyange naomeilan hüyange yoi jeiheinao Solomon Iye yenyik.

¹¹Hüwante Solomon ünyu Bathsheba te Nathan-e i, “Nange Baggith üha Adonijahwe yoi nying nyingke ahngne mengpu jaiyah? Hüyange teman ahngpa David-e hatüo jeng yeshing!

¹²Tüokhei sha-a taowe nangte yoppe tongnang, nang üyin yinlak hüyange nangha Solomon üyin yinlak taowe nangte kon yapha ning.

¹³Taitüoh hüyange ahngpa David tangte ongtüoh hüyange Ite itüoh, ‘Nang Üyongpa, “Üha Solomon-e nang nanleiye ahngne menglak” nange üte lahnyik mongko puphei janlakne yejeshih pu a? Hüma-a hangke iye, Adonijah ahngne menge tampu?’

¹⁴Hüyange Nathan-e paowe i, ‘Nang aope ahngpa phei ngaowe ngohlakei, tao-o nang phei woiye peikülak hüyange nang jeng-a mongte onge ngaowe tamlak.’ ”

¹⁵Tüokhei Bathsheba ahngpa tangte peiye I tüpte ong, hüyange ahngpa yeonge wupa ne ngoh, hüyange Shunam yha Abishag-e ahngpate namnowe ngoh yangki.

¹⁶Bathshebawe ümmekhüm hüyange ahngpate iyeshepu hüo. Hüyange ahngpawe tonge i, “Nang hanghe yahhu pu?”

¹⁷Yhawe Ite i, “Nang Üyongpa, Youngwanpa nang Kahwang min me hüke nang pheima-a üha Solomon ahngne meng ei ja she nange janpu pha.

¹⁸Hüpoi sha-a leihuyah, Adonijah ahngne menge tamteki, hüyange nange tüopa jeng hango yeshingpe ngohnang.

¹⁹Iye mahu, panne angpu yinmoklan, hüyange nyeelan wangman-e toido yangki; hüyange ahnghalan khongkümpu, hüyange ngengpa Abiathar hüyange naomeilan woipa Joab Iye nyik hüpoi Iye nangha Solomonte yenyik.

²⁰Sha-a nang üyongpa, Israel hayimlan-e ü-nokpupa ahngpa I phei me ao ahngpa shotjing me shotlak hatüo imante ine tamlak nangte leiye ngohnang.

²¹Hüke yejema-a, hatüo ngailak, aope ü-nokpupa ahngpa yoi payimlan phei shilakei, hüke tao hüyange üha Solomon ünulan yo me omtamlak.”

²²Leihuyah, aope yhawe üne-o ahngpa phei ngaowe ngoh, hipa Nathan ghonyoite ong ngoi.

²³Iman-e ahngpa te i, “Hipa Nathan leihuyah.” Hüyange aope I ahngpa tangte pei, I sheta kahtok yete khuhta yange Iye ahngpa sheshao me ümme khüm.

²⁴Nathan-e i, “O ahngpa, ü-nokpupawe ‘Adonijah ü-tokphei me anglak hüyange I ü-ahngpa shotjing me shotlak,’ she nange i a?

²⁵Hangjingne I tenyih laiteki hüyange mahu hei panne angpu yinmok hüyange nyee wangman-e Iye toiyange ahnghalan, hüyange naomei woipalan hüyange ngengpa Abiathar Iye nyik; hüyange leihuyah, iman-e I sheshao me hahyinge inang, ‘Adonijah ahngpa jinlaowe ngohyah!’

²⁶Hüpoi nang shaoshanpa tao, hüyange ngengpa Zadok hüyange Jehoiada üha Benaiah hüyange nang shaoshanpa Solomon Iye yenyik.

²⁷Hatüo lili te ü-nokpupa ahngpawe monge yahyange hüyange nange nang shaoshanpalante ü-nokpupa ahngpa shotjing me I phei me ao shotlak hatüo ye-i-tamlak a?”

²⁸Hüwante David ahngpawe jan-e i, “Bathshebate leih yekei she itüoh.” Hüyange yha leihye, I sheshao me yong.

²⁹Hüyange ahngpawe yhate jiengjeppe i, “Wengtuh üshei mepu ü-yaha yintampupa Youngwanpa min me,

³⁰ütingme Youngwanpa Israel Kahwange taowe nangte jiengjeppu ke, ü-phei me nangha Solomon-e ahngne mengyange wanglam lamlak hüyange ü-nanleiye I ü-ahngpa shotjing me shotlak; ütingme tenyih ngaopu kih-e taowe linglak.”

³¹Hüwante Bathshebawe yoi sheta kahtok yete khuhyange ümmekhüm hüyange ahngpate wangshüm hüowe i, “ü-nokpupa ahngpa David üküm yenangpe ngohtüoh!”

³²David ahngpawe i, “Ngengpalan Zadok, hipa Nathan hüyange Jehoiada üha Benaiah ü-tangte nyik kei.” Hüyange iman ahngpa shongte peingoi.

³³Hüyange ahngpawe imante i, “Numan phei numan nokpupa shaoshanpalan woiyah hüyange üha Solomon Ü-lwngkoi me shot tamtüoh hüyange I Gihon te woiye peitüoh;

³⁴hüyange ngengpa Zadok hüyange hipa Nathan ni-e Israel tangme ahngpa ne menglak I minnga phowe letamtüoh, hüyange numan-e nyawong wünge hüke itüoh, ‘Ahngpa Solomon jinlaowe ngohtüoh!’

³⁵Aope I Ü-ahngpa shotjing me shotlak jingne hatüo me leih yelakei, numan-e I shomme yekei. I ü-nanleiye ahngne I menglak, hangjingne Israel hüyange Judah me wanglam lampa ne menglak jingne taowe lepupa-a I ngoh nang.”

³⁶Jehoiada üha Benaiahwe ahngpate jan-e hüke i, “Amen! Ü-nokpu ahngpa nang Kahwang Youngwanpawe hüke ngaine tamshih.

³⁷Hangke ü-nokpu ahngpa phei Youngwanpa ngoh, hüke muh Solomon phei I ngohtüoh hüyange ü-nokpu David ahngpa shotjing phei nehoi I ahngpa shotjing üyongpa ne mengtam shih.”

³⁸Tüokhei ngengpa Zadok, hipa Nathan hüyange Jehoiada üha Benaiah hüyange ahngnok yompalan-e David ahngpa gado me Solomon shotne tam, hüyange Gihon yengpeiwo ngoine I woiye lai.

³⁹Hüyange ngengpa Zadok-e nyenok mepu olive minnga sheng yah hüyange Solomonte minnga phowe tam. Tüophei me iman-e nyawong wüng, hüyange kahta lili-e üngwün-e i, “Ahngpa Solomon jinlaowe ngohtüoh!”

⁴⁰Tüophei me kahta lili I pheite woiye ong, hüyange kahtalan-e mongmeipuwe shengli wüng, hüyange mongongpu üyong puphei iman ngaowünge kahtok-o mokhne tam-e mongmei.

⁴¹Adonijah hei Iphei ngohpalan hahyingpu showe peiwante iman-e hatüo moppu wüng jai. Hüyange aope Joab-e nyawong wüng jai, Iye i, “Hanghe jingne chingnyu me tüopa wünnekapu üyonga ngaipu?”

⁴²Aope I üne-o ngaowe manshope ngaowe ngohyapeih; leihuyah, ngengpa Abiathar üha Jonathan peingoi, hüyange Adonijahwe i, “Ongkei, hangjingne nanga wangngoipu kahta hüyange nangme ngaolan ümei ngohkülak.”

⁴³Jonathan-e Adonijahte jan-e i, “Yeje, hüpoi teman nokpupa Ahngpa Davidte Solomon ahngne mengne tamnang;

⁴⁴hüyange ahngpawe ngengpa Zadok, hipa Nathan, Jehoiada üha Benaiah hüyange Cherethlan hüyange Pelethlan I phei shon, hüyange iman-e I ahngpa gado me shotne tam;

⁴⁵hüyange ngengpa Zadok hüyange hipa Nathan-e I Gihon me ahngne menglak minnga phowe letam; hüyange iman tüomepu hoongli mongonge ong, tüokhei chingnyuwa wünneka nang. Numan-e jaipu ngaowünga hatüo ngohnang.

⁴⁶Solomon, shaapa-a ahngching me ahngpa shotjing me shotnang.

⁴⁷Ünyei ne ahngpa shaoshanpalan-e teman nokpu David ahngpa monghah tamlak jingne peiye, ‘Nang Kahwange Solomon nang min phei shemeipupa ne mengtam tüoh, hüyange nang ahngpa shotjing phei I ahngpa shotjing sheyongpupa ne linge tamtüoh she inang.’ Hüyange ahngpawe yoi nying nyingke shinleng tangme ümmekhüm.

⁴⁸Hüyange ahngpawe-o hüke yoppe i, ‘Ü-mük-e nge-e tenyih ü-ahngpa shotjing me shotne, ü-üli mepu naoshe ja leye aowe pha, tüopa Israel Kahwang Youngwanpa min yongtüoh!’ ”

⁴⁹Hüwante Adonijah yinpalan khongkümpuwe nyam-e yayong hüyange kahta lili yoi yoi lamte taimah.

⁵⁰Adonijah Solomon jingne yeonge nyam hüyange I yayonge yongyange tai, hüyange wümjong üwong me tük.

⁵¹Hüyange Solomonte hatüo ngao i, “Leihuyah, Solomon ahngpate Adonijahwe nyamnang; hangjingne leihuyah, Iye wümjong üwong me tükyange inang, ‘Solomon-e yanglow-e yoi shaoshanpa yetoilak she üte üwangne jiengjeppha.’ ”

⁵²Hüyange Solomon-e jan-e ye, “Iye yoi nying nyingke innyai-e okpu kahta ja she hüo okma-a, I shang mepu shangmin ja nehoi kahtokte yeyeitamlak; hüpoi I me ümengpa ngema-a, I lilak.”

⁵³Tüokhei Solomon ahngpawe shon-e tei hüyange iman-e Adonijah wümjong mepu woiye lai. Hüyange I peiye Solomon ahngpate khuhta yange wangshüm hüo; hüyange Solomon-e Ite i, “Nenokte leih yetüoh.”