Read Konyak Naga 1 AHNGPALAN 10 Bible Online

1 AHNGPALAN 10 - Konyak Naga bible

1 AHNGPALAN 10

¹Aope Sheba ahngyhawe Solomon teehepu jeng jai, tongpu ngao üwan phei yhawe lte tonge toklak jingne Jerusalemte pei.

²Hüyange ükhong üyong ja phei, udh me üpeameipu toilam phei, hon üngang hüyange toinyu long üngang yahyange peiyangki, hüyange aope yhawe Solomon phei hüo, yhawe yoi mongjang me teihngohpu tonglak khongküm Solomonte tonge ngao.

³Solomon-e ahngyhate yhawe tongpu khongküm jan-e i, hüyange I jingne khoih ilak wanpu hango yenangpe ngoh yangki.

⁴Aope Sheba ahngyhawe Solomon konngao nangpu khongküm puphei hüyange Iye wepu nok,

⁵hüyange Iye hahpu khao, hüyange shaoshanpalan khakshuwe angpu, hüyange Ijing üyonglan-e Ite shaoshanpu, hüyange iman müktishiwa nyemo, hüyange I wan jonpalan, hüyange Iye jakke dopu phawante hangke Youngwanpa nokte ong khongkümpu nge, shaaji yhawe hang ngao-o ye-i-okpe yashan-e lakmah.

⁶Tüokhei yhawe ahngpate i, “Ü-kahtalan mepu nang toishaolan hüyange nang konngao jeng ngaolan hanghe taowe jai khakshuwe ngohpu yang!

⁷Hüpoi tao manpei manpei hüyange hatüo ü-mük-e mannge mannge, taowe üting yelakpe ngoh yangki; hüyange leihuyah, tangkhüw nehoi üte ye-iyangpu yang; nang konngao hüyange jalunpu taowe jaipu phei sheloi puyang.

⁸Nang shekonyulan hangshinpu moiman! Hüyange nang shaoshanpalan aoyin nang sheshao me yelakpe yongnang hüyange nang konngao jainang, iman hangshin moiman!

⁹Nang Kahwang Youngwanpa aoheye nangte mongmei nang, hüyange nang Israel tangme ahngne mengetam, Ite minyong tüoh! Hangjingne Youngwanpawe Israel jinte kennang, tüokhei ngaophünlak hüyange ngaotingpa linglak nang ahngne mengetam.”

¹⁰Hüyange yhawe yahpeipu Solomon ahngpate hon kilogram haja peli phei nyeiye, üpeameipu üngang, hüyange toinyu long maawe hünghaone pha. Sheba ahngyhawe Solomon ahngpate üpeameipu üngang phapu shinne ülao mepu Iye yetüo.

¹¹Tüotokte Ophir mepu hon kiyange peipu Hiram yenglin-e juniper pee, hüyange toinyu long üngang yahpei.

¹²Hüyange ahngpawe juniper pee yahpuwe Youngwanpa nok jingne hüyange ahngnok jingne pha, hüyange hemlokpalan jingne kongkilahha hüyange kongki ümtük ne ling. Hüyange tenyih ngoipu mongme juniper pee hükihpu shaaji yepei hüyange ye-ngepe lak.

¹³Solomon ahngpawe yoi ahngnok toinan mepu yhate toinan üngang hünghao ne jajang jawe phapu tokte, Sheba ahngyha te yhawe lengeteipu hüyange hangheyin yhawe yu khongkümpu pha, hüyange yoi kahtokte yayonge yha hüyange yoi shaoshanpalan khongkümpu tai.

¹⁴Sha-a wangpeng ja me Solomon tangte peipu hon kilogram haja da phei me lüm nanjing;

¹⁵pheeileihpalan mepu, pheeinyu leihpalan onge peipulan mepu, hüyange jatlan ahngpalan mepu, hüyange Israel wankam mepu governorlan-e phapu tokte kaiye peipu ngoh yangki.

¹⁶Solomon ahngpawe honne yaopu ree üyong gho ni ling; ree ja ja me hon kilogram nyit nyit nanjing tai.

¹⁷Hüyange Iye hon phei ree sheshoipu gho lüm ling, hüyange ree ja me hon kilogram ni yah ling, hüyange ahngpawe Lebanon phao nok me tüolan-a ang.

¹⁸Üne-o ahngpawe meinyu fa phei ahngpa shotjing üyong ling; hüyange tüopa tangme honne pho.

¹⁹Hüyange ahngpa shotjingte onglaka yafün wok ngoh yangki, hüyange ahngpa shotjing tokphei ye-a mahu shang, hüyange tüngkünyei-e ngohyangki. Hüyange shotjing ünah moini ye me yak ang jing ngoh yangki; hüyange yak angjing me yengkong mailang ni ngoh yangki.

²⁰Hüyange yengkong mailang pen me ni ünahye me hüyange ülao yafün wok tangme yong; tüopa leppu me ülao ahngching hangheme-o yenangpe ngoh.

²¹Hüyange Solomon ahngpa wan khongkümpu honne lingyange ngoh, hüyange Lebanon phao nok me jonpu wan khongkümpu hon shaha phei lingyange ngoh, hüyange khüm phei-a hango lingyange yengoh; hangjingne Solomon ahngpa hipak me hatüowa hangne-o ye-i-pe ngohyangki.

²²Hangjingne Hiram yenglin woipalan ükhong phei Tarshish yenglin woipalan ahngpawe ange ngoh yangki; hüyange wangpeng lüm mongme ja me hon, khüm, meinyu fa, shemeilan hüyange awjeüng yah pei.

²³Tüokhei Solomon ahngpa kahtoknyu me ahnglan üshei phei toinyu nanha hüyange konngao me ütahpa ne ngohyangki.

²⁴Hüyange kahtoknyu me khongkümpuwe Solomonte Kahwange I mongjang me hanghe pha, hatüo jailak jingne yam.

²⁵Iman kahta lili I shongte wangpeng lep iye khüm hei hon toinan, nyemo, yonglah, üpe ümei, koiponglan, hüyange lwngkoi üponglan hünghao yahpei.

²⁶Solomon-e koipong pheipulan hüyange pongtongtoi jamshe aijem, pongtongtoi haja ja phei me gho peli, hüyange koipong pheipulan haja pen me ni Iye Jerusalem me ang, hüyange topulan-a Iye chingnyu phe me yanne angne tam.

²⁷Iye wanglam lampu hipak me Jerusalem me khüm-a longkhoih kih-e jon, hüyange cedar pee-a yengphuk pee phongpu shinne phonge ngoh yangki.

²⁸Solomon-e angpu koiponglan-a Egypt mepu yahpeipu koiponglan ne ngoh, hüyange ahngpa pheeileihpalan-e tüolan-a ükhong ükhong ümee phayange shak.

²⁹Hüyange pongtongtoi ja Egypt mepu khüm gho wok phawe shak-e pei, hüyange koipong ja gho ja phei me denga phawe, hüyange hüke Hit ahngpalan khongkümpuwe hüyange Syrialan ahngpa, khongkümpuwe yoi yoijing-yahpei.