Read Konyak Naga 1 AHNGPALAN 11 Bible Online

1 AHNGPALAN 11 - Konyak Naga bible

1 AHNGPALAN 11

¹Solomon ahngpawe ülao jat shekolan, Egypt ahngpa yhala ao shekonyune yah, yha-o omme, Moab, Ammon, Edom, Sidon, Hitlan sheko te ken.

²Hüpoi tüolan jat shekolan jingne Youngwanpawe Israel lante ngaokeng phawe i, “Numan-e iman yo te ye-ong lakyang, ye-i-ma-a numan mongjang iman kahwang tangte woilak.” Hüpoi Solomon-e tüolan te kenpu üyong ngaiye mah.

³Solomon-e yoi shekonyu ne ahngyhalan gho nyit ngoiye yah, hüyange phongphe nyulan gho lüm ngoh yangki, hüyange I shekonyu lan-e I mongjang yejepu yekaote lüpne tam.

⁴Hangjingne aope Solomon wupa ne meng, yoi shekonyu lan-e I mongjang iman kahwang tangte woi hüyange I mongjang Ipa David kih-e yejepe yoi Kahwang Youngwanpa phei wangengoipu yenangpe ngoh yangki.

⁵Hangjingne Solomon-e Sidonlan kahwang Ashtoreth hüyange Amonlan nulakpa Milcom yekaote yoppekhüm.

⁶Hüyange Solomon-e Youngwanpa sheshao me hanghe yemei hatüo jon, hüyange Ipa David-e lingpu kih-e yejepe; Iye Youngwanpa te ütinglakpu mepu yan.

⁷Tüophei me Solomon-e Moablan nulakpa Chemosh jingne hüyange Ammonlan nulakpa Molech jingne Jerusalem heong yeme ngohpu kahtang me nok yeonge daopu we.

⁸Hüke yoi ülao jat shekonyu khongküm aoyinne sünyet jakke hüyange iman kahwanglan te dopu phahu iman jingne Iye lingetam.

⁹Hüwante Youngwanpawe Solomonte yeonge mongmeng; hangjingne Israel Kahwang ao I tangte ni me ngaiye hüo, tüoyangpoi Youngwanpa mepu I mongjang lüp.

¹⁰Hüyange tüopa jingne Ite ngaophawe ülao kahwang tangte yetailak yang she i; hüpoi Youngwanpawe hanghe ngao pha Iye yejai.

¹¹Tüokhei Youngwanpawe Solomonte i, “Nange hüke shingjang shinge lingtepuwe hüyange nange ü-phei jiengjeppu hüyange ü-nyanpu ngaokhümlan hanghepa Taowe nangte ngaowetam hatüo yejontepuwe nang ahngchinga ütingme Taowe hitte tamlak hüyange nang shaoshanpalante hatüo Taowe phalak.

¹²Tüoyangpoi nangpa David minmei jingne nang hipak me hatüo Taowe yelinglak, hüpoi nangha hipak me hatüo Taowe hitte tamlak.

¹³Hüpoi üne-o taowe ahngching khongkümpuwa yah yeteitamlak, Ü-shaoshanpa David jingne, hüyange Jerusalem hanghepa Taowe leyangki tüopa jingne, nanghate jat ja pha anglak.”

¹⁴Tüokhei Youngwanpawe Edomlan Hadad Solomon phei tüi-e wepa ne menge tam. I Edom me ahngpa mothleipa ne ngohyangki.

¹⁵Hangjingne aope David Edom me ngoh, wetaipalan woipa Joab wehok me toipulan muwe tüolak jingne onge ngoh yangki, hüyange Edom me netan khongkümpu toi.

¹⁶Hangjingne Edom me netan khongküm mantoiküm mantoiküm Joab hüyange Israellan khongküm tüome lekeng wok ngohyangki.

¹⁷Hüpoi Hadad phei Ipa shaoshanpalan Edomlan ütam iman Egypt te phette tai; Hadad hüwante naha ja nehei ngoh yangki.

¹⁸Hüyange iman-e Midian mepu yayonge Parante pei; hüyange Paran mepu kahta ütam woiyange iman Egypt kahtokte ahngpa (Pharaoh) tangte pei, hüyange aowe Ite nok ja, hahying, hüyange Ite kahtok-o pha.

¹⁹Pharaoh mepu Hadadwe monghahpu üyong tüopu jingne yoi shekonyu ahngyha Tahpenes ünao, Hadadte shekonyu ne yahtam.

²⁰Hüyange Tahpenes ünaowe Ite netan naha ja Genubath puhtam, I Pharaoh nok me Tahpeneswe jongne tam, hüyange Pharaoh nok me Ihalan yo me Genubath jamshe jonge ngoh yangki.

²¹Aope Egypt me Hadad-e David yoi payimlan phei shiteki she jai, hüyange wetaipalan woipa ütah Joab liteki she jai, Hadadte pharaoh te i, “Tao ü-kahtokte leih yeshihning.”

²²Hüpoi ahngpawe Ite i, “Hangheye nange üte mong yehahlakne lingpu, hüyange sha-a hangne nange nang kahtokte yehupu?” Hüyange Iye Ite i, “Hango yeje, hüke hei tao yene tamkhu.” Edom ahngpa ne menge Hadad mongjang me ümeng hüyange Israelte khah teihpu ngoh yangki.

²³Hüyange Eliada üha Rezon ao yoi nokpupa Zobah ahngpa Hadadezer mepu phette tai, Kahwange Solomon phei tüi-e wepa ngaine tam.

²⁴Hüyange I wetaipalan ükhong tangme woipa ne menge, yoi kahta I tangte woijem, hüyange aope David-e I pheipulan Zoba me toi, iman Damascuste tai hüyange tüome ngohyange Damascus me ahngne meng.

²⁵Solomon hipak khongkümpu me Hadad-e ümeng lingpu jingne I Israel wepa ne meng, hüyange Iye Israelte nu hüyange Aram tangme ahngne meng.

²⁶Nebat üha Jeroboam, Zeredah Ephraimlan Solomon shaoshanpaja, ao ünyu wamnyu ja min Zeruah ngoh yangki, Iye-o yoi yak ahngpa phei tüi-e hong.

²⁷Hüyange Iye yoi yak ahngpa phei tüi-e hongpu-a hatüo ne ngoh yangki; Solomon-e Millo ling, hüyange yoipa David chingnyu mengpu linge ye.

²⁸Hüyange Jeroboam-a wongnangpu okkeshangpu naoshe ja ne ngoh, hüyange Solomon-e tüopa naoshe kahta-a yeonge linge yahpu kahta she ngeye ok, hüyange Iye Joseph nokphong üshei tangme kangpunan yakjongpa ne menge tam.

²⁹Nyih japu hipak me, Jerusalem mepu Jeroboam yintai-e ngohwante, Shiloh mepu hipa Ahijah, kahko yeme lamko me I shaha ngengpa phakshaoh üla yahyange hüo.

³⁰Aope Ahijahwe Iye yahyange ngohpu ngengpa phakshaoh üla khok-e yah, hüyange üpha penme ni ne tüopa hit.

³¹Hüyange Iye Jeroboamte i, “Nange meitam pen yahtüoh, hangjingne Israel Kahwang Youngwanpawe inang, ‘Leihuyah, Taowe Solomon yak mepu ahngchinga hitamlak hüyange nangte nokphong pen phalak.

³²Hüpoi ü-shaoshanpa David min jingne hüyange Jerusalem min jingne Israel jat khongkümpu mepu lepu chingnyu-a nokphong ja-a Solomon-e yahlak;

³³hangjingne iman-e Tao pemei, hüyange Sidonlan kahwang Ashtoreth, hüyange Moablan kahwang Chemosh, hüyange Ammonlan kahwang Milcom iman-e khüm; hüyange Iye Ü-lamnyu me yekem, Ü-sheshao me shupu yeling, yejema-a Ü-ngaokhüm ye-ang, hüyange yoipa David-e lingpu kih-e yeling.

³⁴Tüoyangpoi Taowe ahngching khongkümpuwa I mepu yeyahteilak; hüpoi ü-shaoshanpa David, aowe ü-nyanpu ngaokhüm hüyange ülinglak ngaokhüm jon, I jingne, Taowe I üyin jin kümme ahngpa ne mengtamlak.

³⁵Hüpoi Ihamepu Taowe ahngchinga yahteilak, hüyange Taowe nangte nokphong pen phalak.

³⁶Hüyange ü-shaoshanpa David-e Jerusalem me ü-sheshao me vüntük ja anglak nanjingne hanghepa Taowe ümin jingne tüoken me angne tam-e le, tüojingne Ihate Taowe jat ja phalak.

³⁷Jeroboam, Taowe nang Israel tangme ahngne menge tamlak, hüyange nang yaha khongkümpuwe yah-hupuke nange yikeng mong khongkümpu me ahnglak hüyange nang Israel tangme ahnglak.

³⁸Hüyange Taowe ngaowe tampu khongkümpu me nange ngao jaima-a, hüyange ü-mükshao me hanghe tingnang hatüo linge hüyange ü-lamnyu me kemma-a, hüyange ü-shaoshanpa David kih-e ü-nyanpu ngaokhümlan hüyange Taowe ngaowetampu angma-a, hüke Taowe nang phei ngohlak, hüyange Taowe David jingne lingetampuke, Taowe nang jingne nok ütingpa me wetamlak, hüyange nangte Israel phalak.

³⁹Solomon ünu jingne Taowe David üli shaoshi ne tamlak, hüpoi jintepu jingne yeje.’ ”

⁴⁰Tüokhei Solomon-e Jeroboam toilak yam, hüpoi Jeroboam yayonge, Egypt ahngpa Shishak tangte Egyptte phette tai; hüyange Solomon manli manli Egypt me ngoh yangki.

⁴¹Sha-a Solomon toishao ülaolan, hüyange Iye lingpu khongkümpu, hüyange I konngao, tüolan toishao khongkümpuwa Solomon laitep me nyanyange yengohpu a?

⁴²Solomon-e Israel üshei tangme Jerusalem me wanglam lampuwa wangpeng deli ngoh yangki.

⁴³Solomon payimlan phei shi, hüyange yoipa David chingnyu me I mu, hüyange yoi ha Rehoboam-e I nanleiye ahng.