Read Konyak Naga 1 AHNGPALAN 12 Bible Online

1 AHNGPALAN 12 - Konyak Naga bible

1 AHNGPALAN 12

¹Rehoboam Shekhemte tai, hangjingne Israellan khongküm Shekhemte I ahng ne menge tamlak jingne peiye ngoh.

²Aope Nebat üha Jeroboam, ao ahngpa Solomon sheshao mepu yinlak jingne Egyptte phette tai, tüopa ngaolan jai, hüyange I Egypt mepu leihye.

³Hüyange Jeroboam phei Israellan ükhong khongküm pei hüyange Rehoboam te hüke i,

⁴“Nangpawe toman lengjeng yeonge yih lingetam; tüokhei sha-a nangpawe hanghe wanputoi lingetam hatüo linge yetüoh hüyange Iye lengjeng yihpu hanghe tomante ki ne tam hatüo taantam tüoh, hüyange toman-e ngaoting iye nang shaoshan ning.”

⁵Iye imante i “Nyihlüm jingne yantüoh hüyange nishe ü-tangte yekei, taowe janpu yahpha ning.” Tüokhei kahtalan yanne tai.

⁶Ahngpa Rehoboam-e lwngmeilan phei juteih yam-e teingao, tüolan lwngmei Ipa Solomon üyin me ngohwante juteih phapalan ne ngoh yangki. “Tüolan ükhongte janlak jingne hanghe juteih numane-o üte phalak shi? She Iye tong.”

⁷Iman-e Ite i, “Nange tüolan kahtalante meijange shaoshan-e tamhuma-a, iman-e tongpute khakshupu juteih ümei phei jan-e yetüoh, hüyange iman-e nanga iyeshepu phei jinte shaoshanlak.”

⁸Hüpoi lwngmei lan-e Ite hanghe i, hatüo Iye winne tüoh, hüyange naoshelan aoyin I phei jamshe jong, hüyange aoyin I sheshaome yong iman tangte tai, iman mepu Iye hengpu yah.

⁹Iye imante i, “Aoyinne üte nangpawe paitampu sheam taanne tamtüoh she inang, imante janlak jingne numane-o üte hanghe kon phalak shi?”

¹⁰Naoshelan aoyin Iphei jamshe jong iman-e Ite hüke i, “Nangphei aoyinne ngao, nange imante hüke itüoh, ‘Nangpawe toman sheam yihtam hüpoi nange taanne tamtüoh’; she ipalante, ‘Ü-yaklan shonha-a üpa shieng phei nehoi shejeipu she itüoh!

¹¹Sha-a üpawe numan sheam yih tampune mengma-a, tüopa me taowe ünyei paowetamlak, hüyange üpawe numante shetwuwe shaoshine tampune mengma-a, taowe numante toshitolaowe shütte tamlak she itüoh!’ ”

¹²Nyih lüm ngohyang phei me Iye imante ngaowe tanpu kih-e, ahngpa Rehoboam tangte Jeroboam hüyange Israel kahtalan khongkümpu leihye.

¹³Ahngpawe lwngmeilan-e ngaowe tampu ngao yeyah hüyange kahtalante yemeipe ngaowe tam:

¹⁴Naoshelan-e henge tampu kih-e Iye hüke ngaowe i, “Üpawe numan tangme yihpu sheam paine tam; taowe tüolan-a üne-o sheloi she kitamlak. Iye numante shütwuwe shüt; taowe numante toshitolao phei shünge tamlak!”

¹⁵Hatüowa Shiloh mepu Ahijah hipa kaiye Nebat üha Jeroboamte Iye ngaowe tampu ngailak jingne Youngwanpa Kahwange mongpu ngohyangki. Tüojingne Ahngpawe kahtalante yejai hüyange iman ngao yeyah.

¹⁶Aope ahngpawe iman ngao yeyah she kahtalan-e nge ok iman-e hüke üngwün: “David me ükong wange hüyange inok noksa phei nyoi peiwante, teman jingne iman-e hanghe linge tam ei? Israel kahtalan, yoi yoi nokte yanhah! Rehoboam-e I yoi jingne minlei yah!” Tüokhei Israel kahtalan yoi nok te yan.

¹⁷Hüpoi Rehoboam Judah yikeng pongme nyoipu Israellan tangme ahngne menge ngoh.

¹⁸Ahngpa Rehoboam-e, toi lingpalan tangme yakjongpa ne ngohpu Adoniram Israellan tangte shon, hüpoi iman-e Ite longe shüppe toi. Hüke ngaipu jingne Rehoboam mamshe Ijing pongtongtoi te onge shot, hüyange shaoyinne Jerusalem te leihye;

¹⁹Tüonyih mepu sha-ate ngoiye Israel ahngching apyekao kahtalan-e David huhayim phei we ne mengnang.

²⁰Aope Israellan khongkümpuwe Jeroboam Egypt mepu leihyeteki she jai, iman-e I shongte ükhong nyik, hüyange Israel üshei tangme I ahngne mengtam. Hüyange Judah nokphong tokte kaiye David nokli pheite woipu ao-o yenangpe ngoh.

²¹Aope ahngpa Rehoboam Jerusalem ngoi, Iye Benjamin hüyange Judah jatlan mepu shemei meipu naomei ütahlan lakh ja detet jamshe nyik-e jem, hokne tailak hüyange apyekao Israel jatlan I phangme angne yah yelak-she Iye teih.

²²Hüpoi Youngwanpawe hipa Shemaiah te i,

²³tüopa ngaolan Ahngpa Rehoboam hüyange Judah hei Benjamin jatlan kahtalante itüoh:

²⁴“Numan pheipu Israellan phei tah hok. Numan khongkümpu yoi yoi nokte leih yetüoh. Hanghe ngaiyangki hatüowa ü-mepu ngohnang.” Tüokhei iman-e Youngwanpa ngao jaiyah, hüyange Jeroboam phei hokne yetaipe nokte leihye.

²⁵Tüophei me Jeroboam-e Ephraim phaotang kahmük me Shekhem ching akyange meipe latte tüm, hüyange tüoken me üten ja nyoi. Tüophei me tüopa tüohyange tai-e Iye Penuel ching akyange meipe latyange nyoi.

²⁶Hüyange Jeroboam-e yoi mongjang me i, “Sha-apu kih ngohma-a David nokli tangte ahngchinga leih yekülak;

²⁷Jerusalem me Youngwanpa nokte tüopa kahtalan-e dolak jingne ongma-a, hüwante tüolan kahta mongjang iman nokpu Judah ahngpa Rehoboam tangte lüplak, hüyange iman-e tao toilak hüyange Judah ahngpa Rehoboam tangte leih yeküm külak.”

²⁸Tüophei me ahngpawe juteih-e nyüo, hüyange hon phei mahu üpong ni yaowe ling, hüyange Iye imante i, “O Israel, numan Jerusalemte yoppe khümlak jingne wangman-e ongyangki, numan Egypt kahtok mepu woiye peipu kahwanglante leitüoh!”

²⁹Hüyange Iye hon mahu üpong ja-a Bethel me angetam, hüyange japa-a Dan me angetam.

³⁰Hüyange tüopa toishao ünu ja ne menge ngai, hangjingne kahtalan-e ja te khümlak jingne Bethel te hüyange japate-o khümlak jingne Dan ngoiye tai;

³¹Iye kahmüoh phe me khümjing we, hüyange kahtalan yo mepu Iye ngengpa lan-o le, hüpoi iman Levi hayim ne yeje.

³²Jeroboam-e lekeng tet shepupa nyih pen me nga shepupa me mo Judahme ngohpu kih-e ngaine tam, hüyange Iye Bethel mepu wümjong tangme onge, Iye yaowelingpu mahu üponglante dopu pha: hüyange Iye ngengpa lan Iye lingpu wümjonglan me yoppe khümlak jingne Bethel me tüoh.

³³Hüyange lekeng tet shepupa nyih pen me nga shepupa me Iye Bethel me wümjong hanghepa ling, tüote ong, tüopa-a Iye yoi mongjang me teihtüopu lekeng me ngoh yangki; hüyange Iye Israel hayim jingne ngaitampu mo ja ling, hüyange toidopu dolak jingne Iye wümjongte ong.