Read Konyak Naga 1 AHNGPALAN 13 Bible Online

1 AHNGPALAN 13 - Konyak Naga bible

1 AHNGPALAN 13

¹Aope Jeroboam dopu pha ne wümjong shongme yongyange ngoh Youngwanpa ngao me hipa ja Judah mepu Bethelte pei.

²Hüyange Youngwanpa ngao me wümjong phei tüi-e hipawe üngwün, hüyange i, “O wümjong, wümjong, Youngwanpawe hüke inang: ‘Leihuyah, Josiah she minyange David nokphong mepu naha ja puhlak; hüyange shedaopu dojing ngengpalan aoyinne nang tangme toido nang iman nang tangme dolak hüyange kahtalan waan nang tangme jaklak.’ ”

³Hipawe tüopa nyih me muh füo ja ngailak i, “Wümjonga menglak, hüyange tüopa tangme ngohpu vünla te-shaitamlak. Hüwante Youngwanpawe ngaoyangki she numan-e shinglak.”

⁴Aope Bethel wümjong phei tüi-e hipawe ngaopu jai, Ahngpa Jeroboam yoi yak nowe hongyange toon-e i, “Tüopa kahta photüoh!” Hüwante mokhshe yoi yak hanghepa Iye hipa phei tüi-e nowe hong, tüopa wan-e mah, hüyange yoi yak-a nishe yoi yekaote shuwe yepu ye-okpe ngai,

⁵Hüyange Youngwanpa ngao kih-e hipawe ngaopuke, wümjong-o khüw meng, hüyange wümjong mepu vünla phunge ngai.

⁶Hüwante Jeroboam Ahngpawe jan-e hipate i, “Ü-yak meiye yelak jingne nang Kahwangte nange ü-jingne yoppe tongpha!” Hüyange hipawe Youngwanpate yoppe tong, hüyange ahngpa yak üshongpu kih-e nishe meiye ngai.

⁷Hüyange Ahngpawe hipate i, “Ü-phei nokte peiye toloimeihah; hüyange taowe nangte nange lingyangpu toishao jingne hünghao phalak.”

⁸Hüpoi hipawe ahngpate i, “Nange nenok jakih-e tange üte phayapoi, tao nang phei yetailak, yejema-a taowe tüopa nyoi me yehahlak hüyange yeyinglak.

⁹Hangjingne Youngwanpawe üte hüke i, ‘Nange hango yehahlak yejema-a yeyinglak, yejema-a hanghepa lam me nang pei tüopa me leih yeyelakyang.’ ”

¹⁰Tüokhei I peiyangpu lamte leih üye, hüpoi ülao lamja me leihye.

¹¹Sha-a Bethel me hipa wupa ja ngoh. Hüyange Iha ja peiye Bethel me tüopa nyih me hipawe hanghe ling khongkümpu hüyange Iye hanghe yin Jeroboam ahngpate i, Ipate tüolan khongkümpu itam.

¹²Iman üpawe imante tong, “I taiwante ümpeyekao lamte taite ei?” Hüyange iman-e Judah mepu peipu hipa ümpeyekao te tai, hüowe tam.

¹³Hüwante Iye yoi hayimlante i, “Ü jingne gado tümtam pha,” Hüyange iman-e I jingne gado tüm-e tam, hüyange I tüome onge shotyange yayong;

¹⁴hüyange hipa pheite tai, hüyange Iye I-a longkhampee shümphang ja me shotte ngohpu nge; hüyange Iye Ite i, “Judah mepu peipu hipa-a nang jeyah?” Hüyange Iye jan, “Tao üja.”

¹⁵Hüwante Iye Ite i, “Kei, ü-phei nokte yehah hüyange jam-e hahying hah.”

¹⁶Hüpoi Judah mepu hipawe i, “Tao nang phei leih yeyelak yejema-a taowe yehahlak, yejema-a tüopa kahtok mepu taowe yeng-o yeyinglak;

¹⁷hangjingne Youngwanpa ngaowe hatüo ü-phei ngao, ‘Nange yehahlak yejema-a tüoken me yeng-o yeyinglak, yejema-a nang ümpeyekao lam mepu pei tüoyekaote leih yeyelak.’ ”

¹⁸Hüwante Bethel mepu hipa wupawe Ite i, “Tao-o nang kihpu hipa ja ngohnang; hüyange wangdang shongmokpa jawe Youngwanpa ngao me üte i, ‘Nenokte nang phei nyik-e yetüoh, hüyange uh-yingtüoh.’ ” Hüpoi hipa wupawe ngaoleih iye nyikpu ne ngohyangki.

¹⁹Tüokhei Judah mepu hipa-a, hipa wupa phei nokte leihye hüyange Iphei jam-e nükhah.

²⁰Hüyange iman hahpu khao me shotte ngohwante, hipa wupa tangte Youngwanpa mepu ngao pei.

²¹Hüyange Judah mepu peipu hipate Iye üngwün-e i, “Youngwanpawe nangte inang; nange I ngao nyingme yeyah hüyange Iye hanghe i tüopa yeling,

²²Ngao jaihah shepu nanleiye, nang leihyeyange Iye nangte tah hah she ngaokeng phapu nyoi me hahying. Tüojingne nanga toilak hüyange nang lipu manga nenok mangjong me yemulak.”

²³Iman-e hahyinge shophei me, Judah mepu peipu hipa leihye tamlak jingne hipa wupawe gado tüm.

²⁴Hüyange aope I tai, lamnyu me yengkong mailang ja hüowe Ite shük-e toi hüyange I mang lamnyu me shüppe tüoh, hüyange gado I shongme yongyange ngoh, hüyange yengkong mailango litepu mang phin me yongyange ngohyangki.

²⁵Hüyange leihuyah, kahta ütam tüopa lamte tai hüyange litepu mang lamnyu me shüpyange nge hüyange yengkong mailango tüophin me yongyange nge. Iman Bethel te leihye hüyange hipa wupa te tüopa iye tam.

²⁶Aope hipa wupa aowe I nyik-e ye tüopa jai Iye i, “Hatüowa hipa aowe Youngwanpawe ngaowe tampu nyingme yeyah! Tüokhei Youngwanpawe Iye ngaoyangpu kih-e linglak jingne I shümme toilak jingne Youngwanpawe yengkong mailang shon.”

²⁷Hüyange Iye yoi hayimlante i, “Ü-jingne gado tümtüoh.” Hüyange iman-e hatüo tüm-e tam.

²⁸Hüyange I ongyange taiwante lamnyu me hipa mang shüpyange nge, hüyange gado hei yengkong mailang ni mang phin me yongyange ngoh; yengkong mailange mang yehah ye-i-ma-a gado-o mayah ne yetam.

²⁹Hipa wupawe manga toonne yahpuwe gado me ki ne tamyange chingnyute yah ye, hüyange shap-e yoonge I mang mu.

³⁰Iye manga yoi nok mangjong me mu, hüyange iman-e I jingne shap-e yoonge “Onyukei, ü-jeihei nao! Onyukei, ü-jeiheinao” she shap!

³¹Hüyange I muyang phei me Iye yoi hayimlante i, “Aope tao lilakei tüopa hipa mujing mangkoksa phei phinne tao-o mutüoh, I waan shong me ü-waan-o angtüoh.

³²Hangjingne Bethel me wümjong phei tüi-e, hüyange Samaria chingnyulan me nokphong khongkümpu phei tüi-e hanghepa Iye Youngwanpa ngao me üngwün khongkümpu khakshuwe ngaikülak.”

³³Tüolan phei me nehoi Israel ahngpa Jeroboam-e yoi ünu lam mepu leih üye, hüpoi nishe üne-o kahtalan yo mepu ngengpalan le; hüyange aoyinne monge teih Iye iman jaowe tam-e ngengpalan le.

³⁴Hüyange Jeroboam ahngching jingne tüopa-a ünu ne meng, hüke jat hei li lange winlak üne hüyange kahtoknyu mepu jaoshe-e mahtamlak ne ngai.