Read Konyak Naga 1 AHNGPALAN 14 Bible Online

1 AHNGPALAN 14 - Konyak Naga bible

1 AHNGPALAN 14

¹Tüopa hipak me Jeroboam üha Abijah dak-e ngai.

²Jeroboam-e yoi shekonyute i, “Yayongtüoh, hüyange Jeroboam shekonyu yang, she yeshing tamlak jingne chingmei lamlinge nang nying nyingke jeilei-e tümyah, hüyange Shilohte taitüoh. Hüyange leihu, tüoken me Ahijah hipa aowe tao tüolan tangme ahngpane menglak she ngao, I tangte taitüoh.

³Nang phei anbung ütoi pen phei awkek an hüyange zahtai jelo shengtak ja yahyange I tangte taitüoh, hüyange Iye nangte naha-a hanghe ne menglak hatüo iphalak.”

⁴Jeroboam shekonyuwe hüke ling; yha yayonge Shiloh te tai; hüyange Ahijah nokte pei. Sha-a Ahijah mük-e ye-nge, hangjingne I wupa ne ngoh.

⁵Hüpoi Youngwanpawe Ahijah te i, “Leihuyah, Jeroboam shekonyu yoi netan halom aohipa daktei-e ngohnang tüopa jeng tonglak jingne peinang: Hüyange Youngwanpawe Ahijahte hangheke ngaolak iye tam.” Aope yha pei ngoi, ülao sheko ja ne lingyange lowelam-e pei.

⁶Hüpoi aope Ahijahwe yha tafün shong ü-o me peipu yawüng jai, Iye i, “Ongyah, Jeroboam sheko, hangne nange eiha sheko ne lowelam nangki? Hangjingne üme nang jingne ngaolan ümeng ngohnangki.

⁷Taitüoh, Jeroboamte itüoh, ‘Israel Kahwang Youngwanpawe hüke inang: “Taowe nang, nang kahtalan yo me yongne tam, hüyange nang kahta Israellan tangme ahngne mengetam,

⁸hüyange David nokli mepu ahngchinga hitte nangte pha; tüoyangpoi ü-shaoshanpa David aowe ü-ngaokhümlan tük-e ang, hüyange aowe yoi mongjang üsheiye Taowe nyinge tampu pheite woi hüyange ü-mükshao me meipu hei ling; I kih-e nang yeje;

⁹Hüpoi nange nang shao me ngoh yangpulan üshei phei nyeiye ümeng ling, hüyange ü-mepu yan-e taiye ülao kahwanglan yaoweling, hüyange Tao mongmengne tam-e nang tokphei me Tao winne tüoh.

¹⁰Tüokhei leihuyah, taowe Jeroboam noksa te ümengpa yah peilak, hüyange Jeroboam mepu netan hayim khongkümpu lange winlak; aoyin küppe ang hüyange Israel me ngohpu khongküm hüke mak moipalan-e mak moiwinpu kih-e Jeroboam noksa mepu jaoshe khongküm manmah manmah moiwinlak.

¹¹Jeroboam noksa mepu aoyin chingnyu me lilakei, kuihalan-e hahlak, hüyange aoyin kahko me lilakei pongkon lan-e hahlak; hangjingne Youngwanpawe hüke ngaoteki.” ’

¹²Sha-a nang yayonge leih yetüoh, hüyange aope nang numan chingnyute yalok-e onglakeih, nangha lilak.

¹³Israellan khongkümpuwe I jingne mang shaplak, hüyange mang mulak; hangjingne Jeroboam noksa me Youngwanpa Israel Kahwange I me hei üjingha monghahpu ngepu jingne I hei mangkoksa te onglak.

¹⁴Üne-o Youngwanpawe Jeroboam noksa tüopa nyih me lange winlak jingne Israel tangme Iye ahngpa ja ngaine tamlak. Hanghe? Üting, hatüo-a sha-a muh!

¹⁵Hangjingne yengnah me ngeihyan popuke Youngwanpawe Israel pone tamlak hüyange tüopa kahtok ümei hanghepa Ipu Ipalante phapu mepu Iye Israel üya me bhei-e pheck-e winlak hüyange iman Euphrates yengyin kaiye yanne tamlak; hangjingne iman-e Youngwanpa mongshih ngaine tam-e Asherah moung kahwang ling.

¹⁶Hüyange Iye Jeroboam ünu jingne Israel phün-e phalak, hanghepa Iye ünu om hüyange tüopa ünu Israelte omne tamlak.”

¹⁷Tüophei me Jeroboam shekonyu yayonge yan, hüyange Tirzahte pei. Hüyange yha nok ngoipu phei jamshe naha-a li.

¹⁸Hüyange Youngwanpa ngaome I shaoshanpa Ahijah hipawe ngaopuke Israellan khongkümpuwe mangshap hüyange muwe tam.

¹⁹Sha-a Jeroboam ahngpawe lingyangpu toishaolan, hangke Iye hok hüyange Iye hangke wanglamlam, leihuyah, tüolan khongkümpu Israel ahngpalan putahpangao laitep me nyanyange ngoh nang.

²⁰Jeroboam ahngpa ja leye wanglamlampu wangpeng da phei me ni ngohyangki, hüyange I payimlan phei shi, hüyange Iha Nadabwe I nanleiye wanglamlam.

²¹Sha-a Solomon üha Rehoboam-e Judah me ahngne meng. Rehoboam aope I ahngne mengyapei, I wangpeng deli me ja ngohyangki, hüyange Iye wangpeng pen me nyit Youngwanpawe Israel jat khongkümpu jingne lepu Jerusalem me yoi min anglak jingne ahngne meng; hüyange Inyu min Ammonlan sheko Naamah ngohyangki.

²²Judah-e Youngwanpa sheshao me hanghe ümeng hatüo ling, hüyange iman payimlan-e lingpu tokte paowe yoi ünuwe Youngwanpa mongshih ngaine tam-e ünu om.

²³Hangjingne iman-e kahtang hüyange peshümphang lili me shedaopupa khümjing hüyange shongnyu hüyange Asherah moung ling.

²⁴Shemengpupa ne netan lili-e tüolan ülao jatlan yoppe khümpu nyoijinglan me üshoyüopu toi ling. Kahmükte Israelan peishao me ngohpu kahtalan Youngwanpawe jange teiyangpu kahtalan-e linghümpu wüolakpa toimeng lili Judah kahtalan-e ling.

²⁵Rehoboam ahngne mengpu wangpeng nga shepupa me Egypt ahngpa Shishak-e Jerusalem phei tüi-e hokne pei.

²⁶Hüyange Youngwanpa nok mepu toinyu nanha hüyange ahngnok me ngohpu toinyu nanha Iye yahtai. Hüke Iye khongküm yahtai, hüyange Solomon-e hon phei lingpu ree khongkümpu omme Iye yahtai.

²⁷Tüokhei Rehoboam ahngpawe tüolan nanleiye shakphan yan phei ree ling, hüyange ahngpa yompalan woipalan yak me peten yomlak jingne phünne pha.

²⁸Khümjing te ahngpa taipu hipak phe me, yompalan-e tüolan ree phei woi, hüyange tüophei me tüolan-a yompalan tüpte leih yepu hipak me yahye-e ngoh yangki.

²⁹Sha-a Rehoboam toishao towe ngohpulan jeng hüyange Iye lingpu khongkümpu, Judah ahngpalan putahpangao laitep me tüolan-a nyanyange yengoh a?

³⁰Rehoboam hei Jeroboam nipa me yelakpe wehokpu ngohyangki.

³¹Hüyange Rehoboam yoi payimlan phei shi, hüyange David chingnyu me yoi payimlan phei mu; (hüyange Inyu min Ammonlan Sheko Naamah ngohyangki), hüyange I nanlei Iha Abijahwe ahngne meng.