Read Konyak Naga 1 AHNGPALAN 15 Bible Online

1 AHNGPALAN 15 - Konyak Naga bible

1 AHNGPALAN 15

¹Sha-a Nebat üha Jeroboam wangpeng pen me tet shepupa Israel tangme ahngne menge ngohwante, Abijahwe Judah tangme ahngne ükong wang.

²Iye Jerusalem me wangpeng lüm wanglam lam; hüyange Inyu min Abishalom yhala Maacah ngohyangki.

³Ipawe üshongpe lingpu ünu me I kem; hüyange Ipu David kih-e yejepe Youngwanpa yoi Kahwang sheshao me yoi mongjang wangengoipu yenangpe ngohyangki.

⁴Hüpoi David min me Youngwanpa I Kahwange I phei me yoiha yonglak jingne Ite Jerusalem hüyange Jerusalem linglak jingne netanha (vüntük) ja pha.

⁵Hangjingne David-e Youngwanpa sheshao me hanghe shunang hatüo ling, hüyange Ite hangheyin linglak jingne I üyin khongkümpu me nyingetam, hüke Hitlan Uriah sheko tokte kaiye, khongküm Youngwanpa nyingme jange Iye ling.

⁶Sha-a Rehoboam hüyange Jeroboam nipa me Abijah wanglam lampu hipak khongkümpu me yelakpe hokpu ngohyangki.

⁷Hüke Abijah toishao khongküm hüyange Iye lingpu, Judah ahngpalan putahpangao laitep me nyanyange ngohnang. Hüyange Abijah hei Jeroboam nipa me hokpu ngohyangki.

⁸Hüyange Abijah Ipayimlan phei shi hüyange I David chingnyu me iman-e I mu, hüyange I nanlei-e Iha Asawe ahngne meng,

⁹Israel ahngpa Jeroboam wangpeng da shepupa wanglam lampu hipak me, Judah tangme Asawe ahngne menge ükong wang;

¹⁰hüyange Jerusalem me Iye wangpeng deli phei me ja ahngne meng. Inyu min Abishalom yhala Maacah ngohyangki.

¹¹Hüyange yoi jing pajeiyong David-e lingpuke Youngwanpa sheshao me hanghe shunang hatüo Asawe ling.

¹²Iye kahmük me ülao jatlan yoppe khümjinglan me netanlan aoyinne üshoyüopu toi ling khongkümpu jange winne küm; hüyange payimlan-e lingpu moung khongkümpu Iye winnetam.

¹³Hüyange üne-o Maacah ahngyha ünyu ne menge ngohpu mepu Iye lakne tam, hangjingne yhawe Asherah jingne nunushepu, moung ja ling, hüyange Asawe tüopa mounga lange win, hüyange Kidron shaoha me hatüo jakke win.

¹⁴Iye kahtang me ülao jatlan-e khümpu nyoilan khongkümpu winne yeteiküm yapoi, tüoyangpoi Asa kenmong I üyinjin küm-e Youngwanpa phei ngaoting iye ngoh.

¹⁵Ipawe Kahwangte jaowe shayange angpu toinan khongkümpu Iye khümjing te yahpeiye ang, tüophei jamme Iye jaowe tampu toinan hon hei khüm, wanlan Youngwanpa tangte yahpei.

¹⁶Hüyange Asa hei Israellan ahngpa Baasha nipa me iman jin küm-e hokpu ngohyangki.

¹⁷Israel ahngpa Baashawe Judah phei tüi-e ong, hüyange Judah ahngpa Asa tangte ao-o onge peine yetamlak jingne Iye Ramah me meipe latte ling.

¹⁸Tüokhei Asa ahngpawe khümjing me toinan angpu nyoi me ngohpu hon hei khüm khongkümpu yah, hüyange ahngnok me ngohpu toinyu nanha khongkümpu yahpuwe tüolan-a yoi shaoshanpalan te pha, hüyange Asa ahngpawe Damascus me ngohpu Aram ahngpa Hezronpa Aram üha Tabrimmon, Iha Benhadad tangte shonne i:

¹⁹“Tümnipa me nangpa hüyange üpa nipa me ngohpu kih-e teishinpu ngohhah; leihuyah, nang tangte taowe hon hei khüm hünghao shonnangpu; sha-a Israel ahngpa Baasha ü-yikengpong mepu taitamlak jingne, I phei teishinpu mepu nang yantüoh.”

²⁰Benhadadwe Asa ahngpawe tongpu nyingme yah, hüyange Israel chingnyulan phei tüi-e I nyahpong ükhong woipalan shonne Ijon, Dan, Abel Beth Maacah, hüyange Chinneroth khongkümpu, Naphtali kahmük khongkümpu phei menge tam.

²¹Aope ahngpa Baashawe hatüo jai, Iye Ramah me nok wepu lak, hüyange Tirzah me ngoh.

²²Hüwante Asa ahngpawe Judah kahtok üshei yeme ngaolan yan; aohi-o towe yetüoh; hüyange iman-e Ramah me ngohpu long, hüyange pekhüw hanghepa-e Baashawe meipe latpu chingnyu weyahpeih khongkümpu yahtai, hüyange Asa ahngpawe tüolan toinan phei Benjamin yikeng pong me Geba hei Mizpah ling.

²³Sha-a Asa lingpu toishao khongküm, hüyange I wong nangpu khongkümpu hüyange Iye lingpu khongkümpu hüyange Iye lingpu chingnyu khongkümpu jeng, Judah ahnglan putahpangao laitep me nyanyange ngohnang. Hüpoi I lwngmei ne mengwante ya me maa-ngaiyange faipa ne meng.

²⁴Hüyange Asa Ipayimlan phei shi hüyange yoi payimlan phei I yoipa David chingnyu me mu; hüyange I nanlei-e yoiha Jehoshaphat ahngne meng.

²⁵Judah ahngpa Asa wanglam lampu nishepupa wangpeng me, Ahngpa Jeroboam üha Nadab Israel me ahngne meng, hüyange Iye wangpeng ni wanglam lam.

²⁶Iye Youngwanpa sheshao me hanghe ünu hatüo ling, hüyange Ipa kempu kih-e kem-e yoi ünuwe Israellan ünu omne tam.

²⁷Ahijah üha Baasha, Issakhar jat mepu, Nadab phei tüi-e lowelampu toi ling; hüyange Baashawe Gibbethon me hanghepa Philistialan jingne ngoh, tüoken me I toi; hangjingne Nadab hüyange Israellan khongkümpuwe Gibbethon chinghah ne yayonge ngoh.

²⁸Hatüowa Judah me Asa Ahngpawe wanglam lampu lüm shepupa wangpeng me ngai. Tüowante Israel me Nadab nanlei-e Baasha ahngne meng.

²⁹I ahngne mengpu phei jamshe, Jeroboam nokphong khongküm Iye toi, Jeroboam jingne üyin me ao-o Iye yetüoh, hüyange Youngwanpawe ngaowe tampuke hanghe Iye Shilohlan I shaoshanpa Ahijahwe ngaowe tam, hüke Iye I mahne tam.

³⁰Hatüokih ngaine ngaipu-a Jeroboam ünulan hangheyin Iye om hüyange hanghe pawe Iye Israellante ünu omne tam, hüyange Iye Youngwanpa Israel Kahwang mongshih ngaine tampu ngoh yangki.

³¹Sha-a Nadab-e lingpu toi hüyange Iye hangheyin ling, tüolan khongkümpu Israel ahngpalan putahpangao laitep me nyan-e ngohnang.

³²Judah ahngpa Asa hüyange Israel ahngpa Baasha iman wongnange wanglam lampu hipak khongkümpu me yelakpe hokpu ngohyangki.

³³Judahlan ahngpa Asawe wangpeng lüm shepupa ahngne mengwante Ahijah üha Baashawe Tirzah me Israel khongkümpu tangme ahngne ükongwang, hüyange wangpeng da phei me peli ahngne meng.

³⁴Iye Youngwanpa sheshao me hanghe ünu hatüo ling, hüyange Jeroboam lam me kem-e hüyange yoi ünuwe Israellan ünu neckne tam.