Read Konyak Naga 1 AHNGPALAN 16 Bible Online

1 AHNGPALAN 16 - Konyak Naga bible

1 AHNGPALAN 16

¹Youngwanpa ngao Hanani üha Jehu tangte Baasha phei tüi-e ngaolak jingne pei,

²“Kahmak mepu Taowe nang yongne tam, hüyange ü-kahta Israel tangme nang ahngne mengetam, hüyange nange Jeroboam lamnyu me kem hüyange ü-kahta Israel ünu omne tam, hüyange iman ünuwe Tao mongmenge ngaine tam;

³tüojingne leihuyah, Taowe Baasha hüyange I noksa jaosheye kootte winlak, hüyange Taowe nenok noksa, Nebat üha Jeroboam noksa kih-e linge tamlak.

⁴Nenok noksa mepu aohipa chingnyu me lilakei, kuihalan-e hahlak, hüyange I jing aoyin kahko me lilakei pongkonlan-e hahlak.”

⁵Sha-a towe ngohpu Baashawe lingpu toi hüyange Iye mongyong puphei lingyangpu toishaolan Israel ahnglan putahpangao laitep me nyan-e yenangpu a?

⁶Baasha yoi payimlan phei shi, hüyange Tirzah me I mu hüyange I ha Elah-e I nanleiye ahngne meng.

⁷Baasha hüyange Inok noksa phei tüi-e Youngwanpa mepu tüopa ngaolan Jehu hipa kaiye pha, hangjingne ima-a Youngwanpa phei tüi-e Baashawe ünu lingpu jingne pei. I sheshao me Jeroboam Ahngpawe lingpu kih-e ünu lingpu shaha jingne Youngwanpa mongshih ngaipu ngaine tampu shaha ne yeje, hüpoi Iye Jeroboam noksalan khongkümpu toiyangpu jingne mongshih ngai.

⁸Judah ahngpa Asawe wangpeng da pheime wok shepupa ahngpu wangpeng me Baasha üha Elahwe Tirzah me Israel tangme ahngne menge wang, hüyange wangpeng ni ahngne meng.

⁹Hüpoi I shaoshanpa Zimri, Ijing tongtoilan jakih-e tangpu tangme woipawe I phei tüi-e toi ling. Aope I Tirzah me Tirzah nokphong tangme ngohpupa Arza nok me yoi nying nyingke jokyange ngoh,

¹⁰Zimri noksate ong, hüyange Ite heap hüyange I toi; hatüowa Judah me ahngpa Asawe wangpeng da phei me nyit she wanglam lampu wang, hüyange I nanleiye ahngne meng.

¹¹Aope Zimri ahngne mengne ükong wang, I ahngpa shotjing me shotpu phei jamshe, Baasha noksa khongkümpu toitam, netan naha ja nehoi Iye yetüoh, yejema-a Inok pheipu yejema-a I shümpalan ja nehoi yetüoh.

¹²Hüke Youngwanpa ngao me ngaowe tampuke Baasha noksa khongküm Zimri-e mahtam, hanghepa Jehu hipawe Baasha phei tüi-e ngao.

¹³Hangjingne Baasha ünu khongküm, hüyange I ha Elah ünu khongküm hanghepa iman-e om hüyange Israel Kahwang Youngwanpa iman, jajang japuwe Youngwanpa mongshih ngaiye mongmengne tam-e Israel ünu neckne tam.

¹⁴Sha-a Elah lingyangpu towe ngohpu toishao hüyange Iye lingpu khongküm Israel ahngpalan putahpangao laitep me nyanyange yengohpu a?

¹⁵Judah ahngpa Asawe wangpeng da phei me nyit shepupa ahngne mengwante, Tirzah me Zimri nyih nyit ahngne meng. Sha-a Israel kahtalan Philistialan phangme ngohpu Gibbethon phei tüi-e jemne tam;

¹⁶hüyange jem-e ngohpu wetaipalan-e jaiye hatüo ngao i, “Zimriwe ahngpa phei tüi-e yong hüyange ahngpate met.” Tüokhei Israellan khongkümpuwe Israel tangme tüopa nyih me Omri, nyahponglan woipa ütah, Israel ahngne tüonyih mengne tam-e ponge tam.

¹⁷Tüokhei Omri-e Iphei Israellan khongkümpu woiyange Gibbethon mepu ong, hüyange iman-e Tirzah neikon.

¹⁸Aope Zimriwe chingnyuwa yahteki she nge; I yoi nying nyingke ahngnoksa te ong, hüyange vünne ahngnok shuwe tam, hüyange tüopa vün me I li.

¹⁹Hangjingne Iye Youngwanpa sheshao me hanghe ümeng hatüo linge Jeroboam lamnyu me kem hüyange ünu hanghe Iye om tüopawe Iye Israel ünu omne tam.

²⁰Sha-a Zimri towe ngohpu toishao hüyange Iye ahngpa phei toktei-e ünu ompu khongküm Israel ahnglan putahpangao laitep me tüolan-a nyanne yengohpu a?

²¹Hüwante Israel kahtalan yo me ükhong ni ne tampu ngai, kahta ükhong jawe Ginath üha Tibni ahngne menge tamlak jingne I pheite woi, hüyange jakih-e tam-e Omri pheite woi.

²²Hüpoi üküm ne aoyinne Omri pheite woi, iman-e okpu nge; Ginath üha Tibni li; hüyange Omri ahngne meng.

²³Judah ahngpa Asa wangpeng delüm me ja shepupa ahngne mengwante Omri Israel tangme ahngne menge wang, hüyange wangpeng pen me ni ahngne meng; üwangpa wangpeng wok mongme Iye Tirah me ahngne meng.

²⁴Shemer she minpu kahta ja mepu Samaria kahtang khüm ükhüw haja wok phayange Iye shak. Omri-e tüopa kahtang jaowe tam, tüome ching linge ngai, hüyange tüopa kahtang tepu üwangpa nokpupa min me tüopate Samaria she minne tam.

²⁵Omri-e Youngwanpa sheshao me hanghepa ünune ngoh tüopa ling, hüyange I sheshao me ngoh yangpulan üshei phei shemeng shepu Iye ling.

²⁶Hangjingne Iye, Nebat üha Jeroboam lamnyu me kem, hüyange I ünuwe Iye Israellan ünu omne tam, hüyange iman peshaote khümpu toishaowe Israel Kahwang Youngwanpa mongshih ngaine tam.

²⁷Sha-a Omri toishao towe ngohpu hanghe Iye ling, hüyange I wong hanghepa Iye hüowe ok, tüolan khongküm Israel ahngpalan putahpangao laitep me nyanyange yengohpu a?

²⁸Omri yoi payimlan phei shi hüyange I Samaria me mu, hüyange Iha Ahab-e I nanleiye ahngne meng.

²⁹Judah ahngpa Asawe wangpeng delüm me tet shepupa ahngne mengpu wangpeng me Omri üha Ahab-e Israel tangme ahngne mengne ükong wang, hüyange Omri üha Ahab-e Samaria me Israel tangme wangpeng da me ni ahngne meng.

³⁰Omri üha Ahab-e Youngwanpa sheshao me hanghe ümeng hatüo I sheshao me ngohyangpu üshei phei shemeng she ünu om.

³¹Nebat üha Jeroboam-e ompu ünu me ngohyange kemlak-a üne-o I jingne yewang she Iye teih; I tai, hüyange Sidonlan ahngpa Ethbaal yhala Jezebel yoi shekonyu ne yah, hüyange Iye Baal tangte taiye shaoshan-e Ite khüm.

³²Iye Samaria me Baal jingne khümjing we, I jingne wümjong ling, hüyange hatüowa khümjing me tüoh.

³³Iye Asherah kahwanglan linge ang, hüyange Ahab-e Israel Kahwang Youngwanpa mongmenge tamlak ne üshongpu Israel ahngpalan phei shenyei she ling.

³⁴I hipak me Bethellan Heilwe Jerikho ling, Iye yoi halom Abiram mahne tam-e nokjing linge wang, hüyange petenlan-a yoi ha ükümpa Segub mahne tam-e linge ye; hüyange tüopa-a Nun üha Joshua-e Youngwanpa ngao ngaopu kih-e ngai.