Read Konyak Naga 1 AHNGPALAN 17 Bible Online

1 AHNGPALAN 17 - Konyak Naga bible

1 AHNGPALAN 17

¹Sha-a Tishbilan Elijah ao Gilead me ngoh, Iye Ahab Ahngpate i, “Taowe aohipa shaoshan, tüopa Israel jing üyin Kahwang Youngwanpa min me taowe nangte inang, sha-a me peipu ünepupa wangpeng ni ye-i-ma-a lüm mongme taowe kei tüoh she man i, man i, nyai jeyah wai jeyah ye yütlak.”

²Tüophei me Elijah te Youngwanpa ngao pei,

³“Tüomepu yayong tüoh, hüyange heong yete taitüoh, hüyange Jordan heong yeme Cherith yengyin ü-o me nang nying nyingke lowe ngohtüoh.

⁴Nange yengyin mepu yinglak, hüyange tüome nangte uhyinglak jingne Taowe khawanglante ngaowe tamyangki.”

⁵Elijahwe Youngwanpawe ngaowe tampu ngao nyingme yah hüyange taiye Cherith yengyin me ngoh.

⁶Khawanglan-e, mei hüyange an shomme hüyange ünpong me Ite yahpeitam, hüyange Iye yengyin mepu yeng ying.

⁷Hüpoi ütenja ngohyange wai yekeipu jingne yengyin-a eamah.

⁸Hüwante Youngwanpa mepu ngao I tangte pei,

⁹“Sha-a yayongtüoh, hüyange Sidon ü-o me ngohpu Zarephath chingte ongtüoh, hüyange tüome ngohtüoh. Leihuyah, tüome ngohpu wamnyu ja te Taowe nang tamlak jingne ngaoyangki.”

¹⁰Tüokhei Elijah yayonge Zarephath te tai, hüyange aope Iye chingnyu pejong ngoi, leihuyah, wamnyu ja tüoken me han moiye ngohyangki, hüyange Iye yhate nyik-e i, “Chingmei lamlinge taowe yinglak jingne yeng üjingha peitam khu.”

¹¹Hüyange yhawe hatüo yahpeilak jingne taiye ngohwante, Iye üne-o yhate nyik hüyange i, “Nang yakpoih ja, hahlak an-o yah peikei.”

¹²Hüpoi yhawe jan-e i, “Youngwanpa nang Kahwang üyin me ngohtepuwe taowe hatüo inang, ü-yak me an hango yenang; ü-yak me ngohpu khongkümpu-a wongtük me hahlak yakpoih ja hei ngohnang hüyange shengtak me minnga üjingha hei ngohnang; hüyange leihuyah tao tüome peipuwa han üjingha moi yahyange nokte yelak hüyange üha tomni jingne tüopa yangkanglak. Hatüowa tomni jingne ükümpa hahyingpu ne menglak hüyange tomni-a nyaoweleye lilak.”

¹³Elijahwe yha te i, “Mong tahshang; yetüoh hüyange nange ipuke lingtüoh, hüpoi üwangne üte an üjingha lingtampha; hüyange hatüo üte yahpeitam pha, hüyange phei me nang hüyange nangha jingne lingtüoh.

¹⁴Hangjingne Israel Kahwang Youngwanpawe hatüo hüke inang, ‘Tao Youngwanpawe kahtoknyute wai manshon manshon nang wongtük ükengme yengohlak, yejema-a minnga shengtak ükengme aope-o yengohlak.’ ”

¹⁵Hüwante wamnyu leihye hüyange Elijahwe ngaowe tampuke ling, hüyange yha, Elijah hüyange yha noksa nyih nangjange hahyinge ngoh;

¹⁶Elijahwe Youngwanpa ngao me ngaowe tampuke wongtük hüyange minnga shengtak aope-o ükengne yemeng.

¹⁷Hüyange nyih ütenja linyang phei me, wamnyu üha dak; I shekhai shekhai she khai-e dak-e ta, hüyange ükümne li shon.

¹⁸Hüwante Yhawe Elijahte i, “O Kahwang kahta, Ü-phei tüi-e nange hanghe lingnangki? Ü-ünu teihtüo tamlak jingne nang ü-tangte pei, hüyange üha li ne tampu a?”

¹⁹Hüyange Iye yhate i, “Nangha üte yahkei.” Hüyange Elijahwe yha yak me pai ngohpu naha yah pai, hüyange I ngohpu ütangpa tüpte yah in, hüyange I yoi shinleng me angetam.

²⁰Tüophei me Iye üngwün-e yop, “O Youngwanpa, Ü-Kahwang, hangne nange hükihpu yejelakpa tüopa wamnyute lingpu? Yhawe shüpshe hüowe üte paowe tük, hüyange sha-a nange Iha li ne tam!”

²¹Hüyange Iye lüm me nahate nyengyange, Youngwanpate üngwün-e i, “O Youngwanpa Ü-Kahwang, tüopa naha yaha I tangte leihye ne tamshih she taowe yop nang!”

²²Elijah ngaowüng Youngwanpawe jai, hüyange naha yaha nishe I tangte leihye hüyange I yange ye.

²³Hüyange Elijahwe naha-a yah pai, hüyange Inyu tangte üphangpa tüpte yah lai hüyange yhate i, “Leihuyah, nangha üyin me ngohnang!”

²⁴Tüokhei shekonyuwe Elijah te i, “Nang Kahwang kahta she taowe shingnangki, hüyange nang ju me Youngwanpa ngao-a üting ngohnang.”