Read Konyak Naga 1 AHNGPALAN 18 Bible Online

1 AHNGPALAN 18 - Konyak Naga bible

1 AHNGPALAN 18

¹Nyih nangjange linyang phei me, helei yangphei me wangpeng lüm shepupa me Elijah tangte Youngwanpa ngaolan peiye i, “Nang Ahab tangte taiye hüotüoh, hüyange taowe kahtoknyute wai shonlak.”

²Tüokhei Ahab phei yoi nying nyingke hüolak jingne Elijah tai. Sha-a Samaria me seanyao yenglepu jamloi she ngoh.

³Ahngnok tepu nokpu ne ngohpupa Obadia te Ahab-e nyik. (Sha-a Obadiawe Youngwanpate yeonge nyam;

⁴hüyange hüke ngoh, aope Youngwanpa hipalan Jezebel-e toi, Obadiawe hipalan gho ja woi, hüyange iman denga nga longsa me lowe tüoh, hüyange imante nük hei yeng phawe pao.)

⁵Hüyange Ahab-e Obadia te i, “Teman taihah hüyange kahtok me yengpeiwo lili hüyange yengyin lili me phaohüng ngoh-e teman koiponglan hei lwngkoilan üyin anglakne ngohyashi leihah. Aoweshing teman yinmoklan ja nehoi yemahpe yinne ok.”

⁶Tüokhei iman yo me kahmük-a tamyange tüopa kaiye tailak jingne yayong, hüyange Ahab-o ükenja te tai, hüyange Obadia-o üken jayete tai.

⁷Hüyange Obadia lam me kem-e ngohwante, leihuyah mokhshe Iye Elijah hüo, hüyange Iye I shing hüyange Iye sheta kahtokte khuhta, hüyange i, “Nanga ü-nokpu Elijah a?”

⁸Iye jan-e i, “Hatüowa tao; taitüoh hüyange nang nokpupate itüoh, ‘Leihuyah, tüome Elijah ngoh nangki.’ ”

⁹Hüyange Iye i, “Nang shaoshanpa Ahab yak me phünne phayange, toiye tamlakne taowe hanghe ümeng omme ngohnang shi?

¹⁰Youngwanpa nang üyin Kahwang min me taowe jienge inang, jat yejema-a ahngching ja nehoi yetüohpe ü-nokpupawe nang yam; hüyange iman-e aope ‘I tüome yenang’ she i, iman-e nang yetüo she Iye jat hüyange ahngchinge jiengjep.

¹¹Hüpoi sha-a nange üte inang, ‘Taitüoh, nang nokpupate itüoh, “Leihuyah tüome Elijah ngohnang!” ’

¹²Hüyange tao nang mepu taipu phei jamshe, taowe yeshingpe Youngwanpa yahawe yeshingpu nyoi jate nang yahteima-a, hüyange aope taowe Ahab tangte taiye ngaolakei, hüyange Iye nang tüome ye-nge ma-a, Iye tao toilak. Teihtüoyah nang shaoshanpawe naha memuh Youngwanpate nyam-e leye khümme peinang.

¹³Taowe hanghe ling hatüo ü-nokpupate yengaotam a? Aope Jezebel-e Youngwanpa hipalan toi, taowe Youngwanpa hipalan gho ja iman denga nga longsa me küwe angyange yeng hüyange an phei uhyinge tam-e ang.

¹⁴Hüma-a sha-a nange inang, ‘Taitüoh, nang nokpupate itüoh, “Leihuyah, Elijah tüome ngohnang” ’; Iye tao toikülak.”

¹⁵Elijahwe i, “Ütahpa Youngwanpa ao sheshao me tao yongnang, I min me taowe jannang, tenyih tao ütingme ü-nying nyingke ahngpa phei hüolak.”

¹⁶Tüokhei Obadia Ahab phei hüolak jingne leihye hüyange Ite i, hüyange Ahab-e Elijah phei hüolak jingne tai.

¹⁷Aope Ahab-e Elijah nge, Ahab-e Ite i, “Israel shaoshi ne tampupa-a nang tüome ngohnang no!”

¹⁸Iye jan, “Taowe Israel shaoshine yetam, hüpoi nang hüyange nangpa noksawe Youngwanpawe ngaowe tampulan pemah hüyange nange Baal pheite woi.

¹⁹Tüokhei sha-a shontam tüoh hüyange Israellan khongkümpu Carmel kahtang me hüyange Jezebel, khao me hahpalan Baal hipalan gho peli phei me denga, hüyange Asherah hipalan gho peli ü-tangte jemne tamtüoh.”

²⁰Tüokhei Ahab-e Israel hayim khongkümpu tangte shonne tei hüyange hipalan khongküm Carmel kahtang me jemne tam.

²¹Hüyange kahtalan tangte Elijah owepei hüyange i, “Numan-e tüopa juteihpu ülam ni me hangshinne ngohlak shi? Youngwanpa-a Kahwangne mengma-a, Ipheite woiyah, hüyange Baal ne mengma-a Ipheite woiyah.” Hüyange kahtalan-e Ite ngao ja nehoi yejan.

²²Hüwante Elijahwe kahtalante i, “Youngwanpa hipa tao, hüke ü-shaha towe ngohnang; hüpoi baal hipa gho peli phei me denga ngohnang.

²³Sha-a mahu üpong ni yahpeikei, hüyange iman-e iman jingne mahu üpong ja lene tamtüoh, hüyange hatüo khoihnyai-e tehyange han tangme hetamtüoh, hüpoi vün pahne tahtam, hüyange taowe mahu üpong ja-a hüke linglak, hüyange han tangme hetamlak hüpoi vün yepah tamlak.

²⁴Tüophei me Baal kahwang hipalan-e iman kahwangte yopne tamtüoh, hüyange taowe Youngwanpate yoplak, hüyange Kahwang aohipawe vün kaiye janlakei, I-a Kahwangne menge tamtüoh.” Hüyange kahta khongkümpuwe jan-e i, “Hatüo shunang.”

²⁵Hüyange Elijahwe Baal hipalante i, “Hüke numan üngang ngohtepuwe üwangne numan-e numan jingne mahu üpong ja leyah, hüyange hatüo tümtüoh, hüpoi vün tahyo, numan kahwang min me yoptüoh.”

²⁶Tüokhei imante phapu mahu üponga iman-e yah, hüyange iman-e hatüo tüm, hüyange shom mepu heeitam hahju ngoiye iman-e Baal min me üngwün-e yoppe i, “O Baal, tomante jaipha.” Hüpoi ngaowüng ja nehoi yenang hüyange hango yejan. Hüyange iman-e lingpu wümjong neikonne polok-e üngwün.

²⁷Hüyange heeitam hahju nanjing me Elijahwe imante haiye tam, hüyange i, “Wongnange üngwüntüoh, shewün she yoptüoh! I-a kahwang ja muh! Aoweshing I-a nyihning mang mange ngohne ok yejema-a I nying nyingke nyailüm meiye ngohne ok, yejema-a aoweshing I yintai teiye ngohne ok! Yejema-a I shiteiye ngohne ok, tüokhei numan-e Ite loitamlak yang!”

²⁸Hüyange iman-e wongnange üngwün, hüyange iy manngai manngai yang hüyange nyit-ha phei iman wanglam kih-e pümtangta te wette tüppe üngwün.

²⁹Aope heeitam hahju linne tai, ünshao te ngoiye nehoi iman-e üngwün; hüpoi ngaowüng ja nehoi yenang yejema-a aowe-o imante iye yeteih.

³⁰Tüokhei Elijahwe kahtalante i, “Ü-shongte owe jemkei;” hüyange kahta üshei I shongte jem. Hüyange Iye Youngwanpa wümjong menge ngohpuwa linge ye.

³¹Hüyange Elijahwe Jacob hayim nokphong shang toi phei shuwe long penme ni toonne pei, ao tangte Kahwang ngao peiye i, “Israel-a nang min me ngohlak.”

³²Hüyange tüopa long phei Iye Youngwanpate khümlak wümjong linge ye, hüyange yeng litre penme peli nyüppu okke neikonne Iye yengsho shao.

³³Hüyange hanna üyin shinne phonge ang hüyange mahu üponga tehkhoih hüyange han tangme ang. Hüyange Iye i, “Yengtük peli yenge maawe tamtüoh, hüyange jakke dopu wümjong hüyange han tangte shok-e tamtüoh.” Iman-e hüke ling.

³⁴Hüyange Iye i, “Hüke ni me shinne lingtüoh, hüyange iman-e nishe-o ling.” Hüyange Iye i, “Lümshe shinne lingtüoh;” hüyange iman-e lümshe-o ling.

³⁵Tüokaiye wümjong khongkümpu me yeng yünne ta, hüyange yengsho-a yenge maa.

³⁶Hüyange ünpong toidopu hipak me Elijah hipa wümjong shongte owe wen hüyange i, “O Youngwanpa, Abraham, Isaac hüyange Jacob Kahwang, tenyih nang shaoshanpawe tüolan khongkümpuwa nang ngao kih-e taowe lingnang, hüyange Israel me nanga Kahwang she shingne tamtüoh.

³⁷Üte janpha, O Youngwanpa, üte janpha, hümme nakshih tüolan kahtawe nanga üyongpa she shinglak, O Youngwanpa, Üyongpa Kahwang, hüyange nange iman mongjang nang shongte yah-ye-tamlak.”

³⁸Hüwante Youngwanpa vün shon, hüyange wümjong long, han, kahmak hüyange yengsho me ngohpu yeng khongkümpu eawah-e hahshu.

³⁹Aope kahtalan-e tüopa nge, iman-e kahtokte khuhtawe i, “Youngwanpa-a Kahwang, Youngwanpa-a Kahwang!”

⁴⁰Elijah-e ngaophawe i, “Baal hipalan photüoh, iman ja nehoi taine tahtam!” Kahtalan-e iman khongkümpu pho, hüyange Elijahwe iman-a Kishon yengyinte woiye lai, hüyange iman tüoken me toi.

⁴¹Tüophei me Elijahwe Ahab ahngpate i, “Sha-a yetüoh hüyange hahying tüoh, hangjingne wai wangman-e keilak ngaowüng taowe jainang.”

⁴²Tüokhei Ahab-e hahyinglak jingne ong, hüwante Elijah Carmel kahtangte ong hüyange Iye kahtokte khuhtawe yoi sheta yatuh nipa me pit.

⁴³Hüyange Iye yoi shaoshanpate i, “Sha-a yayongtehu, hüyange yengching yekaote leihu.” I taiye leiyange i, “Hango yenang.” Hüyange Elijahwe taiye leilak jingne nyit me Iphei ngaowe i.

⁴⁴Nyit shepupa leih yewante lye i, “Kahta yaktok shinne yengching yekao mepu wangphom ngaipu tokte kaiye taowe hango ye-nge.” Hüyange Elijahwe yoi shaoshanpate ngaowe i, “Taitüoh hüyange Ahab Ahngpate I jing tongtoite tümme tawe shottüoh hüyange waikeiye I lam mantienpe nokte yetüoh she itüoh.”

⁴⁵Ütenjapu mongme, wangphom hüyange wangyange wangyekao nyak-e ngai, hüyange wai üyong kei. Ahab I jing tongtoite ong hüyange Jezreel ngoine leihye.

⁴⁶Youngwanpa üngan wong Elijah tangme pei; hüyange Iye yoi shiengme inkhek hityange Ahab shaote Jezreel lam paowe phette ngoi.