Read Konyak Naga 1 AHNGPALAN 19 Bible Online

1 AHNGPALAN 19 - Konyak Naga bible

1 AHNGPALAN 19

¹Elijahwe lingpu khongküm hüyange Iye hipalan hangke yanglow phei toi khongkümpu Ahab-e yoi shekonyu Jezebelte i.

²Hüwante Jezebel-e Elijah tangte ngaolan kipaja shonne i, “Taowe nang üyin-a ngainyih hakih tingme iman yo me sheja kih-e yelingtam okma-a, kahwanglan-e üte ünyei-o lingtam tüoh.”

³Hüwante Elijah nyam, hüyange I üyin yinlak jingne yayonge phette tai, hüyange Judah kahtok Beershebate peiye yoi shaoshanpa tüome tüoh.

⁴Hüpoi Iye yoi nying nyingke nyih ja lam me phaonyu jongte tai, hüyange lyailick pee shümphang ja me shot, hüyange I nying nyingke lilak jingne tonge i, “Sha-a hatüo shaaji wangteki, O Youngwanpa, Ü-üyin yahtei tüoh, hangjingne taowa ü-nyupalan phei shemeipu ne yeje!”

⁵Hüyange I lyailick pee shümphang me shi, hüyange leihu, mokhshe wangdang shongmokpa jawe Ite powe i, “Lüotüoh hüyange hahtüoh.”

⁶Hüyange Iye neikonne lei, hüyange leihuyah, I shangtang me vün me kange lingpu an hüyange yengtük ja ngoh; hüyange Iye hatüo hahying yange nishe shi ye.

⁷Wangdang shongmokpa nishe peiye Ite poyange i, “Lüotüoh hüyange hahtüoh, hangjingne nangjingne kemlak-a jamloi laonang.”

⁸Hüyange I lüoyange hahying hüyange tüopa hahpu wonge nyih deli hüyange pha deli Kahwang kahtang Sinai te kempu okke ong.

⁹Hüyange I longsa ja me peiye tüome pümlak jingne ngoh, hüyange leihuyah, mokhshe Youngwanpa ngao I tangte peiye Ite i, “Elijah, nang tüome hang lingpu shi?”

¹⁰Hüyange Iye i, “Youngwanpa Kahwang jing ngengpalan jingne üte yeonge müktak, hangjingne Israel hayim khongkümpuwe nang phei jiengjeppu pemeiyange, nangte khümjing wümjonglan hüyange yanglow phei nang hipalan toi, hüyange hüke tao ü-shaha hei tüoh hüyange iman-e ü-üyin-o yahlak jingne yamnang!”

¹¹Youngwanpawe Ite i, “Taitüoh hüyange Youngwanpa sheshao me kahtang me yongtüoh.” Tüophei me leihuyah, Youngwanpa linne tai, hüyange wangyang üyong peiye kahtanglan-a khüw-e tam, hüyange Youngwanpa sheshao me longlan-a paikhoih, hüpoi Youngwanpa wangyang me yenangpe ngoh; wangyang phei me minwe lei, hüpoi minwe me-o Youngwanpa yenangpe ngoh;

¹²hüyange minwe phei me vün pei, hüpoi vün me-o Youngwanpa yenangpe ngoh. Hüyange vün phei me ngaowüng üjinghapu ja pei.

¹³Aope Elijahwe hatüo jai, I yoi inkhek phei yoi sheta lümyange yu, hüyange longsa üjupong me yong, hüyange leihuyah, I tangte ngaowüngja peiye i, “Elijah, nang tüome hanglingpu shi?”

¹⁴Iye jan-e i, “Youngwanpa Kahwang jing ngangpalan jingne üte yeonge müktak, hangjingne Israel hayim khongkümpuwe nang phei jiengjeppu pemeiyange, nangte khümjing wümjonglan hüyange yanglow phei nang hipalan toi; hüyange hüke tao, ü-shaha hei tüoh hüyange iman-e ü-üyin-o yahlak jingne yamnang.”

¹⁵Youngwanpawe Ite i, “Nang lamte leih-e Damascus wanwüng jengte yetüoh hüyange aope nang chingnyu ngoilakei, Aram tangme ahngne menglak jingne Hazael minnga phowe letüoh;

¹⁶hüyange Israel tangme ahngne menglak jingne nange Nimshi üha Jehu minnga phowe letüoh; hüyange Abelmeholah lan Shaphat üha Elisha nang nanleiye hipa ne menglak nange minnga phowe letüoh.

¹⁷Hüyange Hazael yanglow mepu yinpu kahta-a Jehuwe toilak, hüyange Jehu yanglow mepu yinne okpu kahta-a Elishawe toilak.

¹⁸Tüoyangpoi Taowe Israel me Baal kahwang sheshao me yekhümpulan hüyange Ite ju yehüppulan haja nyit ü-jingne yinne angtamlak.”

¹⁹Tüokhei Elijah tüomepu yayong, hüyange Shaphat üha Elisha ao mahu üpong ükhong pen me ni phei hüyange iman ükümpa pen me ni shepupa phei kah hok-e ngohwante I nge, hüyange Elijahwe I shongte wenne I jing inkhek Ite yüohtam.

²⁰Hüwante Elishawe mahu üponglan-a tüohyange Elijah pheite phette wenne i, “Taowe ü-pa hüyange ü-nyute omhüplak jingne taowe nangte yoppe tongnang; tüophei me hei nang pheite woiküning.” Elijahwe Ite jan-e i, “Leih yetüoh, taowe nangte yetien!”

²¹Tüophei me Elisha Iye woipu mahu üponglan phei leih ye, hüyange tüolan-a toi, hüyange mahu tongtoi lan-a han ne jakke mei yang. Hüyange Iye mei-a kahtalante pha, hüyange iman-e mei-a hah. Tüophei me I tai hüyange Elijah phei Ite jampongpa ne kem.