Read Konyak Naga 1 AHNGPALAN 2 Bible Online

1 AHNGPALAN 2 - Konyak Naga bible

1 AHNGPALAN 2

¹Aope David lilak hipak owe pei, Iye yoiha Solomonte nyik hüyange nyüoweleipu pha.

²“Tao phomphang wanglam, lamnyute taine oteki. Wong nangyah, hüyange nang nying nyingke kahta ja she hüoyah;

³hüyange Youngwanpa nang Kahwang nang phei angyah. I lamnyu me kemtüoh hüyange Iye nyan-e angpu ngaokhüm, I jing ngaokhüm, linglak ngaokhümlan hüyange I sakilan, Mosa ngaokhüm me nyanpuke, nange hangheyin linglakei, hüyange nang nying nyingke nang ümeken me tailakei tüoken me jalunlak jingne nange tük-e angtüoh.

⁴Hüke Ü-jeng ngaowe tampu Youngwanpawe I ngao hüke iyangpu ütahte ngaitamlak, ‘Nang huhayimlan-e yoi kenmong khongkümpuwe hüyange yoi yaha üsheiye ngaotingpa me ü-sheshao me kemlak, iman toishao me mong phalak, Israel ahngpa shotjing me shotamlak nang ye-okpu ye-ngetamlak’ she Youngwanpawe inang.”

⁵“Zeruiah üha Joab-e üte hanghe ling hatüo-o ünyei nange shing; Israel wetaipalan naomei ni te Iye Ner üha Abnerte hanghe ling hatüo-o, hüyange Jether üha Amasa ao Iye toi, hüyange chingmei hipak me wehokpu iy shai, hüyange I shieng me hityange ngohpu shienghit me, hüyange I ya me shom-e ngohpu yashomme hatüo hokpu iy shah.

⁶Tüokhei nang konhei ngaowe hüopuke lingtüoh, hüpoi I shangshaotei-e chingmei me mangjongte tahyutam.

⁷Hüpoi Gilead mepu Barzillai hayimte yayeng hüotüoh, hüyange nang khao me hahyingpalan ne iman mengtam tüoh; hangjingne tao nangjei Absalom mepu phette taiwante, iman-e üte iyeshepu üyong phayangki.

⁸Hüyange leihuyah, Gera üha Shimei Bahurim mepu Benjaminlan aowe tao Mahanaim tangte taipu nyihme üte khah-e phoiwüm, I nang phei ngohnang, hüpoi I ü-phei Jordan me hüolak jingne lai, hüyange taowe Youngwanpa min me jiengjeppe i, ‘Taowe nang yanglow-e li ne yetamlak.’

⁹Sha-a I me ümeng yenangshe pa-a tahteih, hangjingne nang konnangpu kahta; hüyange nange Ite hanghe linglak hatüo shinglak, hüyange nange I shangshao tepuwa iy phei mangjongte teine tamtüoh.”

¹⁰Tüophei me yoi payimlan phei David shi, hüyange David chingnyu me I mu;

¹¹David-e yoi Israel tangme ahngpuwa wangpeng deli ngohyangki; Hebron me Iye wangpeng nyit ahng, hüyange Jerusalem me Iye wangpeng delüm me lüm ahngne meng.

¹²Tüokhei Ipa David ahngshotjing me Solomon shot, hüyange I ahngching yeonge monge lingeye.

¹³Hüwante Haggith üha Adonijah Solomon ünyu Bathsheba tangte pei. Yhawe i, “Nang chingmei me peipu jeyah?” Iye i, “Chingmei me peinang.”

¹⁴Üne-o Iye i, “Taowe nangte ngaolak ülam ja ngoh nangki.” Yhawe i, “Ngaotehu.”

¹⁵Iye i, “Ahngchinga üjing she nange shing, hüyange üte ahngne menge tamlak Israel kahta khongkümpuwe üte leiye ngoh, hüpoi ahngchinga leihteki hüyange ü-nao jingne mengteki; hangjingne hatüowa Youngwanpawe mongpu ja ngoh yangki,

¹⁶hüyange sha-a taowe nangte ülam ja tong nang; üte min she tah ipha.” Yhawe Ite i, “Ngaotehu.”

¹⁷Iye i, “Nang ngaote Iye yelankülak she taowe shing nang; tüokhei Shunamlan Abishag ü-sheko ne menglak phatüoh she nange Solomon te ngaowe tamlak jingne taowe tongnang.”

¹⁸Bathshebawe jan, “Yeonge meiteki; taowe nang jingne ahngpa phei ngaolak.”

¹⁹Tüokhei Bathsheba Adonijah jingne ahngpa Solomon phei ngaolak jingne tai. Hüyange ahngpawe yayonge yha phei hüolak jingne yong hüyange I nying nyingke yha sheshao me ümme khüm hüyange yoi ahngpa shotjing me shot, hüyange yoinyu shotlak jingne shotjing ja pha hüyange yha I yakjah yeme shot.

²⁰Hüwante yhawe i, “Taowe nangte ülam üjoiha ja tonghu nangki, üte min she tah i.” Hüyange ahngpawe yha te i, “Onyu tongtüoh, taowe nangte min she min i.”

²¹Yhawe i, “Shunamlan Abishag-a nangjei Adonijah shekonyu ne phashih.”

²²Ahngpa Solomon-e Inyute jan-e i, “Adonijah jingne Shunamlan Abishag nange hanghe ne tongpu? Nange ahngchingo omme Ite phalak jingne üte tonghah shepu! Hangjingne I-a üjeijoi, hüyange I yekao me ngengpa Abiathar hüyange Zeruiah üha Joab ngohnang!”

²³Hüwante Solomon ahngpawe Youngwanpa min me jiengjeppe i, “Iye tüopa tongyangpu nanjingne taowe Adonijah te I üyin phawe shakne yetamma-a Kahwangpawe üte shütte li ne tamtüoh!

²⁴Sha-a tüokhei Youngwanpa aowe tao lingetam hüyange üpa David shotjing me tao shotne tam hüyange aowe üte noksa ja pha, I üyinme ngohtepuwe, taowe jienge inang ütingme tüopa nyih memuh Adonijah li ne tamlak!”

²⁵Tüokhei Solomon ahngpawe Jehoiada üha Benaiah shonnetei, hüyange Iye Adonijah toine tam.

²⁶Ngengpa Abiatharte Solomon ahngpawe i, “Nang nang kahmük Anathoth te yetüoh, hangjingne nang lilak wangnang. Hüpoi taowe nang shaapa-a li ne yetamlak, hangjingne üpa David sheshao me Youngwanpa Kahwang Üjao Ghonu nange pai, hüyange üpa shaoshipu üshei me nango shaoshi ngohyangki.”

²⁷Tüokhei Solomon-e Abiathar Youngwanpa ngengpa ne menglak mepu jange tei, hüke Shiloh me Eli noksa jingne Iye ngaopu Youngwanpa ngao ütahte ngai.

²⁸Aope ngaolan-a Joab tangte pei, hangjingne Joab-e Absalomte yejam yapeyoi, Iye Adonijahte jam. Hüyange Joab Youngwanpa nyenokte onge lo, hüyange wümjong üwong me tük.

²⁹Aope Joab Youngwanpa nyenok me onge loteki hüyange leihuyah, I wümjong lengjong me ngohnang she Solomon ahngpate i. Hüwante Solomon-e Jehoiada üha Benaiah shonne i, “Taitüoh, hüyange I shu-yei-tamtüoh.”

³⁰Tüokhei Benaiah Youngwanpa nyenokte pei-e Ite i, “Ahngpawe hüke inang, yekei.” Hüpoi Iye i, “Min, tao tüome lilak.” Hüyange Benaiahwe nishe ahngpa tangte ngaolan yah peiye, “Joab-e hüke inang hüyange Iye üte hüke jan she i.”

³¹Solomon ahngpawe Ite jan-e i, “Joab-e hangke i hüke lingtam tüoh, hüyange üpa nok mepu hüyange ü-mepu hango saki yenangpe Joab-e eiha iy shaipu yahteilak nanjingne I toitüoh hüyange mutüoh.

³²Youngwanpawe I iy-a I shangtang me angtamlak, hangjingne, üpa David-e hango yeshingpe Iye Iphei nehoi shemeipu hüyange shejaopu kahta ni yanglow-e toi; Ner üha Abner, Israel wetaipalan mepu naomei, hüyange Jether üha Amasa, Judah wetaipalan mepu naomei toi.

³³Tüokhei iman iy Joab shangtang me ngohlak hüyange Ihu Iha shangtangme jinte ngohlak, hüpoi David hüyange Ihuhalante hüyange Inokphong hüyange I ahngpa shotjing me Youngwanpa mepu jinte üküm yenangpu chingmei ngohlak.”

³⁴Tüokhei Jehoiada üha Benaiah Youngwanpa nyenokte ong hüyange Joab toiyangki, hüyange I-a imching me phao üko me muwe tam.

³⁵Hüyange ahngpawe Jehoiada üha Benaiah wetaipalan ükhong tangme Joab nanleiye woipane mengetam. Hüyange ahngpawe ngengpa Abiathar nanleiye ngengpa Zadok I shotjing me shotne tam.

³⁶Hüyange ahngpawe Shimei nyikne shonne Ite i, “Nange Jerusalem me nang jingne nok ja wetüoh, hüyange tüome ngoh tüoh, hüyange hanghe ngailakei ngaiyapoi tüopa nyoi mepu tahtai.

³⁷Hangjingne hanghepa nyih me nange Kidron yengyin kaiye tailakei, nange hatüo meimei-e shingyah, nang ütingme lilak hüyange nang mahpu iy-a nang shangtang me ngohlak.”

³⁸Hüyange Shimei ahngpate jan-e i, “Nange hanghe i, meinangki; ü-nokpu ahngpawe ipuke, nang shaoshanpawe jonlak.” Tüokhei Shimei Jerusalem me hipak nangjange laowe nyoi ngoh.

³⁹Hüpoi wangpeng lüm küm-e peiwante, Gath ahngpa Maacah üha Achish tangte Shimei rhapa ni phette tai. Hüyange iman-e Shimeite i, “Leihuyah, nang rhapalan-a Gath me ngohkülak.”

⁴⁰Shimei yayonge I yoi gado tümyange Achish tangte yoi rhapa yam-e Gathte tai, hüyange yoi rhapa ni Gath mepu woi ye.

⁴¹Aope Shimei Jerusalem mepu Gathte taiyange nishe leih yeteki she Solomonte i;

⁴²ahngpawe shongshonpa shonne Shimei nyik-e Ite i, “Youngwanpa minme taowe nangte jiengjeppe tam-e hüyange nang lakne tam-e; ‘Shingyah, aope nyih me nange Jerusalem mepu tai onge ngohlakei nang ütingme lilak she ye-i a?’ Hüyange nange üte i, ‘Nange hanghe i meinangki; taowe jailakei.’

⁴³Hüma-a hangne nange Youngwanpa jiengjeppu hüyange nangte ngaowetampu ü-ngao khakshuwe ye-angpu?”

⁴⁴Ahngpawe üne-o Shimeite i, “Nange üpa David sheshao me lingpu, nang mongjang me lowe angpu ümeng üshei nange shing nang, tüokhei Youngwanpawe nang ümengpa-a nang shangtang me ki tamlak.

⁴⁵Hüpoi Iye Solomon ahngpa moiman tamlak, hüyange David ahngpa shotjing Youngwanpa sheshao me jinte üküm yenangpe wongnange ngohlak.”

⁴⁶Tüokhei ahngpawe Jehoiada üha Benaiah te ngaokhüm pha, hüyange I taiye Ite met hüyange I toi. Tüokhei shaapa-a ahngchinga Solomon yak me lanshe nüngneilak yenangpe onge mahyangki.