Read Konyak Naga 1 AHNGPALAN 20 Bible Online

1 AHNGPALAN 20 - Konyak Naga bible

1 AHNGPALAN 20

¹Aram ahngpa Benhadadte I jing nyahponglan ükhong khongkümpu woijem, hüyange Iphei ahngpa delüm me ni, hüyange koipong hei tongtoilan ngohyangki; hüyange Iye onge Samaria chinghahlak jingne neikon, hüyange tüopa phei tüi-e hok.

²Hüyange Israel Ahngpa Ahab tangte chingnyute Iye ngaolan kipalan shonne Ite i, Benhadadte hüke inang,

³“Nang jing hon hei nangjing khüm a üjing, nangjing shekonyulan hüyange nanghalan hüyange hüke shemeipulan khongkümpuwa üjing.”

⁴Israel ahngpawe jan-e i, “Nange ipukih-e O ahngpa, ü-nokpupa, üme nangpu khongküm nangjing.”

⁵Ngaolan kipalan nishe peiye i, Benhadad-e hüke inang, “Taowe ütingme nang tangte hüke iye shon, nangjing shekonyulan hüyange nanghalan khongkümpu üte phünne phalak;

⁶sha-a tüoyangpoi, ngainyih hakih tingme taowe ü-shaoshanpalan shonlak, hüyange iman-e nenok hüyange nang pheipulan noksa hüyange nang mük me hangheyin meipu ngoh, tüolan-a iman-e pom-e iman yak me yahlak hüyange iman-e tüolan-a yahtailak.”

⁷Hüwante Israel ahngpa-e kahmük me lwngmei khongkümpu nyik-e jem hüyange i, “Tüopa kahtawe hangke ümeng yamnang hatüote leiye angyah she taowe yoppe tongnang, hangjingne Iye ü-shekonyulan, hüyange ü-halan, hüyange üjing hon hei khüm jingne shon, hüyange taowe Ite yejanpe yengoh.”

⁸Hüwante lwngmeilan hüyange kahta khongkümpuwe Ite i, “Nange Ite tahjai, Ite hango tahpha.”

⁹Tüokhei Iye Benhadad ngaolan kipalante i, “Ahngpa ü-nokpupate itüoh, nange üwangne nang shaoshanpalante hanghe jingne shon hatüo taowe linglak, hüpoi ni shepupa me shonpuwa taowe yelinglak.” Ngaolan kipalan-a yan hüyange I tangte nishe ngaolan yahpei.

¹⁰Benhadad-e Ahab tangte üne-o shonne i, “Ü-pheite woipalan khongkümpu jingne Samaria kahmük wangpu ne mengma-a, kahwanglan-e üte ünyei-o lingne tamtüoh!”

¹¹Israel ahngpawe jan i, “Ite itüoh: Hüke ütingpa wetaipa ja-a shapju shao me yeje, shapju phei me hei I otapu angnang ja.”

¹²Aope Benhadad hüyange ahngpalan, lakjing me hahyinge ngoh, hüwante tüopa ngaolan jaiyange yoi shaoshanpalante Iye i, numan-e tümyange khünglenge yongtüoh; hüyange chingnyu hahlak jingne tümyange khünglenge iman yong.

¹³Hüwante Ahngpa Ahab tangte hipa ja pei hüyange i, “Youngwanpawe inang, tüopa nyahponglan üngang ngepute tahnyam! Tenyih tüolan tangme taowe nangte okpu phalak, hüyange taowa Youngwanpa she nange shinglak.”

¹⁴Ahab-e tong, “Shümlak jingne aowe woilak?” Hipawe jan, “Youngwanpawe hüke inang, kahmük mepu ahnghalan-e woiyange wetaipu shelalan-e shümlak.” Iye tong, “Ükhong meinyu-a aowe woilak?” Hipawe jan, “Nange woilak.”

¹⁵Tüokhei ahngpawe kahmük mepu ahnghalan (nyahpong shelalan) jemne tam, hüyange iman gho ni phei me delüm phei me ni ngohyangki; hüyange iman phei me Iye kahta khongkümpu jemne tam, hüyange Israel hayim khongkümpu, hüyange iman khongkümpu haja nyit ngoh yangki.

¹⁶Heeitam hahju hipak me shümlak jingne iman yayong, hüwante Benhadad hüyange Iphei teishinpulan delüm me ni iman lakjing me hahyinge jok-e ngohyangki.

¹⁷Hüyange kahmük mepu ahnghalan hüyange naoshelan üwangne shon; hüwante Benhadadte kuhshükpalan ütam shonne teipulan mepu ngaolan hüke ye, “Samaria mepu wetaipalan ükhong ja peiküki.”

¹⁸Iye i, “Iman chingmei jingne peipu ne mengma-a, iman üyin me yahtüoh; iman wehoklak jingne peipu ne mengma-a, iman üyin yahtüoh.”

¹⁹Ahnghalan-e woiyange chingnyute shüm, hüyange iman pheite Israel nyahpong meinyu woi;

²⁰moilan-e yoi yoi phei shuwe hokpupa toi, hüyange Aramlan phette tai, hüyange Israellan-e imante nyün-e jange tai, hüpoi Aram ahngpa Benhadad koipong me shotyange yoi koipong woipalan phei phette taiye I yin.

²¹Israel ahngpa Ahab-e jange taiye koiponglan hüyange tongtoilan khongkümpu toi, hüyange Aramlan üngang toi.

²²Tüophei me Ahngpa Ahab tangte hipa peiye i, “Leih yetüoh hüyange nang kahtalan tümyah, hüyange yeonge kentinge ülam tümyah, hangjingne ngaiwang laojee me Aram ahngpawe üne-o chinghah külak.”

²³Aram ahngpa Benhadad shaoshanpalan-e Ite i, “Israellan Kahwang-a kahtanglan kahwang ngohnang, tüokhei iman toman phei wong shenangpu; hüpoi teman-e iman phei tüi-e kahjee me hokhah, hüyange ütingme iman phei-a teman wong shenang pupa ne menglak.

²⁴Üne-o hüke lingtüoh: iman-e woiye ngohpu mepu ahnglan-a lakne tamtüoh, hüyange iman nyoi me woipa ütah japong angtüoh.

²⁵Hüyange nange mahtepu wetaipalan nanleiye iman shinne, koipong jingne koipong, tongtoilan jingne tongtoi, hüyange nyahponglan she tüm-e angtüoh, hüyange iman phei teman-e kahjee me hoklak hüyange ütingme iman phei-a teman wong shenanglak.” Iye mongeyah, hüyange iman-e ipuke ling.

²⁶Ünepupa laojee me Benhadad-e Aramlan khongkümpu nyik-e jem, hüyange Israel phei tüi-e hoklak jingne Aphek chingnyute ong.

²⁷Aope Israellan jamshe jem-e hahying tüm, hüyange iman phei hoklak jingne yayonge Aramlan yekaote meye ükhong ni ne lak; kahmük khongkümpu yekao me Aramlan üngang lak-e ngohpu phei phinwante, Israellan-a youn ükhong üha ni phaohpu ja leye ngoh yangki.

²⁸Hipa ja pei ngoi hüyange Ahngpa Ahabte i, “Youngwanpawe hüke inang, ‘Aramlan-e hüke ngaonang, “Youngwanpa-a kahtang Kahwang, hüpoi I-a kahjee kahwangne yeje;” tüokhei Taowe tüopa ükhong üyonga nang yak me phünne phalak, hüyange numan-e Taowa Youngwanpa she shinglak.’ ”

²⁹Nyih nyit ngoiye Israellan hei Aramlan janhüowe yoi yoi lakjing me lak-e ngoh. Nyih nyit shepupa nyih me iman hokne ükong wang, hüyange lsraellan-e haja tokte gho Aramlan toi.

³⁰Topulan-a Aphek chingnyu jantpenyu te ya pheipu wetaipalan phette ong, hüyange topu haja da phei me nyit tangme chingtuk penyu khaoh-e sheptoi. Benhadad-o chingnyute phette onge küw, hüyange nokkongye jant shongme lo.

³¹Hüyange I shaoshanpalan-e Ite i, “Sha-a leihuyah, Israel ahnglan-a yayeng shüpshe ngohpu ahngpalan she toman-e jaiyangki, toman-e monnye inyange hüyange üngme wu nyeihyange, Israel ahngpa tangte taiye yoppe tongküning she nangte tongnang; aowe shing Iye nang üyin yintamlak!”

³²Tüokhei iman-e monnye inyange hüyange üngme wu nyeihyange Israel ahngpa tangte peiye i, “Nang shaoshanpa Benhadad-e inang, ‘Tao üyin me angtampha she yoppe tongnang.’ ” Ahab-e jan, “I-a ü-jeiheinao, sha-a ngoiye I üyin me ngohnang kü a?” she Iye tong.

³³Sha-a Benhadad shaoshanpalan-e meiye minjankei she kentinge jaiye leiwante, aope Ahab-e “Ü-jeiheinao” she iyapeih, iman-e nünge hatüo ngao yah, hüyange i, “Hüke nange ipuke, Benhadad-a nang jeiheinao!” Ahab-e ngaophawe i, “I ü-tangte yah peikei.” Aope Benhadad peiye ngoi, Ahab-e I phei tongtoi me jam-e onglak jingne nyik.

³⁴Benhadadte Ite i, “Chingnyulan hangheyin üpawe nangpa mepu yah, hatüo taowe leih yaphaning, hüyange üpawe Samaria me lingpuke, nange Damascus me pheeileihpu nyoijinglan linglak.” Ahab-e jan-e i, “Hüma-a tüopa teijanpu me taowe nang lantamlak.” Tüokhei Iye Iphei jiengjeppu yah, hüyange I taine tam.

³⁵Youngwanpa ngao me hipalan hayim yo me shejawe I shümpa ja te “Üte shüttüoh she taowe nangte yoppe tongnang,” she i, hüpoi kahtawe Ite shütlak yemong.

³⁶Hüwante Iye Ite i, “Youngwanpa ngaote nange ngao yejaitepuwe, leihuyah, nang ü-mepu yanpu phei jamshe yengkong mailang jawe nanga toilak.” Hüyange I mepu I yanpu phei jamshe yengkong mailang jawe Ite shük hüyange I toi.

³⁷Tüophei me tüopa hipa muh taipuwe ülao kahta ja te i, “Üte shütpha!” Tüopa kahtawe Ite shüt, Iye Ite yeonge shüt hüyange Ite mako shatam.

³⁸Hipawe I yeshinglak jingne shetate inkhek-e lüm, hüyange taiye, Israel ahngpa linne taipu tan-e lam nah me yonge ngoh.

³⁹Hüke ahngpa linne taiwante, hipawe Ite nyikyange i, “Üyongpa, tao shapju me hok-e ngohwante wetaipa jawe shapju me phopu wepa ja yahyange ü-tangte peiye hüke i, ‘Hatüo kahta mei meiye yomtüoh; I taine tamma-a, I nanleiye nang üyin nange phalak yejema-a khüm ngin ükhüw haja lüm ngoiye tang phalak.’

⁴⁰Hüpoi tao ülao toi pangpu jingne nan yenangpe ngohwante hatüo kahta taimah.” Ahngpawe jan-e i, “Nang ngaophünpu nang nying nyingke ngaoyangki, hüyange püohyangpu jingne nange phalak yang.”

⁴¹Hüwante hipawe I sheta me lümpu inkhek khok-e win, hüyange hüwante muh ahngpawe I-a hipa yo me ja she shinge yah.

⁴²Hüwante hipawe ahngpate i, “Hatüowa Youngwanpa mepu ngaolan: ‘Taowe aohipa toiye winlak jingne ngao pha, tüopa kahta nange yinne tamyangpu jingne, tüopa nanleiye nange nang üyin phalak, hüyange nang nyahponglan-e I jing nyahponglan yinne tamyangpu khei iman mahne tamlak.’ ”

⁴³Israel ahngpa-a Samariate Inok yam-e mongshang mongmeng puphei leihye mah.