Read Konyak Naga 1 AHNGPALAN 21 Bible Online

1 AHNGPALAN 21 - Konyak Naga bible

1 AHNGPALAN 21

¹Hipak ütenja phei me, Samaria ahngpa Ahab ahngnok phangme Jezreellan Naboth jing wuwüng kah ja ngoh.

²Hüyange nyih ja Ahab-e Naboth te tonge i, “Nang jing wuwüngkah-a ahngnok phei owe ngohtepuwe, taowe hoihei lai deilak pesha ne ngaihu nangki, üte ja yahkei, tüophei shemeipu wuwüngkah ja taowe nangte yah pha ning, yejema-a nange lengma-a tüopa shange taowe ngin me yapha ning.”

³Hüpoi Naboth-e Ahabte i, “Üpa mothlei nangte phalak-a Youngwanpawe tienang!”

⁴Naboth-e Ite hanghe ngao ngaowe tam, tüopate mongshang mongmenge Ahab nokte ye. Jant yekao me meyange I shinleng me lam, hüyange hango yehah.

⁵Hüpoi I shekonyu Jezebel peiye Ite i, “Hangheye nang mongmengne tampu, hüyange hangne nange yehahke?”

⁶Iye yha te i, “Jezreellan Nabothte taowe nangjing wuwüng kah ümee phawe shak shihnüng she tong, yejema-a nange mongma-a tüopa nanleiye ülao wuwüngkah ja yapha ning she taowe i, hüpoi Iye taowe nangte ü-wungkah minpha she janyangki.”

⁷Jezebel yoi shekonyuwe Ite i, “Nange sha-a Israel ahngching tangme wanglam yelampu a? Lüoyah, hahying hahtüoh hüyange nang mongmeiye ngohtüoh; Jezreellan wuwüng kah-a taowe nangte phawe tamlak.”

⁸Tüokhei yhawe Ahab min me Naboth ngohpu chingnyu mepu lwngmeilan hüyange üyonglan tangte lai nyanyange yeonge meiye füosange tüpyange shon.

⁹Nyanpu lai me hüke yhawe nyan-e i, “Nyaowelepu nyih ja taisheng tüoh, khongkümpu nyiktüoh, hüyange ükhong sheshao me wangshüm hüowe Naboth kahmüoh ja me shotne tamtüoh.

¹⁰Hüyange angsa kahta ni Iphei janhüowe shotne tamtüoh, hüyange iman-e I phei tüi-e hüke ngaone tamtüoh, ‘Nange ahngpa hüyange Kahwangte phoiteki.’ Tüophei me chingnyu mepu I ü-atte shui yüotüoh, hüyange longe shüppe toi tüoh.”

¹¹Tüokhei chingnyu me ngohpu ükhonge, lwngmeilan-e hüyange üyonglan-e Jezebel-e nyanpulai me hanghe nyanyange imante i, hüke iman-e ling.

¹²Iman-e nyaowelepu nyih ja pongetam, kahta lili jemne tam, hüyange kahta üshei tangme minyong phawe Naboth shotne tam.

¹³Angsa kahta ni pei hüyange Iphei janhüowe shot; hüyange angsa kahta niye Naboth phei tüi-e ngaomeng yahpei, kahta üshei sheshao me hüke i, “Naboth-e ahngpa hüyange Kahwangte phoiwüm nang.” Hüwante iman-e I chingnyu mepu shuiye yüowe Ite longe shüppe I toiye li ne tam.

¹⁴Tüophei me iman-e Jezebel tangte ngaolan shonne i, “Naboth longe shüppe li ne tamteki.”

¹⁵Naboth longe shüppe toiteki she Jezebelwe ngaolan tüopu phei jamshe, yhawe Ahabte i, “Yayongtüoh hüyange Jezreellan Naboth wuwüngkah hanghepa Iye ümee te-o minpha she i, hatüo yahtüoh; hangjingne Naboth üyin yenang; I liteki.”

¹⁶Hüyange aope Ahab-e Naboth liteki she jai, Jezreellan Naboth wuwüngkahte I ta hüyange hatüo Iye yah.

¹⁷Hüwante Youngwanpa ngaolan Tishbilan hipa Elijah tangte pei, hüyange i,

¹⁸“Samaria me ngohpu Israellan ahngpa Ahab phei hüolak jingne nang yayong taitüoh; leihuyah, Naboth wuwüngkah me tawe Iye hatüo yahlak jingne taiye ngohnang.

¹⁹Youngwanpawe hüke inang she nange Ite itüoh, ‘Kahta ja toiyange üne-o I jing moth-o nange yahnang a?’ Hatüo Taowe inang she Ite itüoh; ‘Naboth iy yaipu nyoi memuh kuihalan-e nang iy yailak!’ ”

²⁰Aope Ahab-e Elijah nge, Iye i, “O ü-wepa, nange tao yüowe phoman?” Elijahwe jan, “Taowe nang ngeteki. Hangjingne Youngwanpa sheshao me hanghe ümengpa ngohnang hatüo jon-e, nange nang nying nyingke yüo.

²¹Tüokhei Youngwanpawe inang, leihuyah, nang sheshao me Taowe ümengpa yahpeilak; hüyange Taowe nang jaosheye kotte winlak, hüyange Ahab mepu netan hayim khongkümpu lange winlak, shayange angpu hüyange Israel me towe ngohpu khongküm mahne tamlak.

²²Hüyange Nebat üha Jeroboam Ahngpa noksa hüyange Ahijah üha Ahngpa Baasha noksa kih-e nenok noksa mah tamlak, hangjingne nange Tao mongmengne tam hüyange Israel lante ünu omne tam.

²³Hüyange Jezebel jingne-o Youngwanpawe ngaowe inang, ‘Jezreel chingnyume, yha iy, kuihalan-e hahlak.’

²⁴Aohipa Ahab pheipulan chingnyu me lilakei, kuihalan-e hahlak, hüyange aoyin I pheipulan kahko me lilakei pongkon lan-e hahlak.”

²⁵(Youngwanpa sheshao me hanghe ümeng hatüo yoi shekonyu Jezebel-e henge tampu me hatüo linglak jingne yoi nying nyingke yüowe hahpu Ahab kih-e ülao ao-o yenang.

²⁶Hüyange Iye Amorlan-e lingpu kih-e moungte khüm-e nunushepu ling; aoyin Youngwanpawe Israellan mepu iman jangetei.)

²⁷Aope Elijahwe ngaopu sho, Ahab-e yoi inkhek hit, hüyange yah ang, hüyange yoi pümtangta me monnye inyange hüyange nyaoweleye yeonge shanghah shaoshipu yah.

²⁸Hüwante Tishbilan hipa Elijah tangte Youngwanpa ngao peiye i,

²⁹“Ahab-e hangke yoi nying nyingke innyai hatüo nange ngeya? Iye hüke lingtepuwe, Taowe I hipak me ümeng hango yephalak; hüpoi Iha hipak me Inokte Taowe shaoshipu phalak.”