Read Konyak Naga 1 AHNGPALAN 22 Bible Online

1 AHNGPALAN 22 - Konyak Naga bible

1 AHNGPALAN 22

¹Aram hei Israel nipa me wehok yengohpe wangpeng lüm lin.

²Hüpoi wangpeng lüm shepupa me Israel ahngpa Ahab tangte Judah ahngpa Jehoshaphat hüolak jingne pei.

³Israel Ahngpawe I shaoshanpa lante i, “Hangne teman-e Aram ahngpa mepu Gilead mepu Ramoth yah yelak jingne ülam ja yelingpu? Hatüowa teman jing ngohnang!”

⁴Iye Jehoshaphat te i, “Ramoth-Gilead phei hoklak jingne nange ü-phei taine oklak jeya?” Jehoshaphat-e Israel ahngpate i, “Tao-o nang kihpu hei: nang kahtalan-a ü-kahta hüyange nang koiponglan ü-koipong.”

⁵Hüpoi Jehoshaphat-e Israel ahngpate i, “Üwangne Youngwanpa mepu ngaolan jingne tonge leihah.”

⁶Tüokhei Israel ahngpa Ahab-e hipalan gho peli nanjing jamshe jemne tam, hüyange imante i, “Ramoth-Gilead ching hahlak jingne tao taihah heiya yetai hah shi?” Hüyange iman-e i, “Ching hahtüoh, hangjingne Youngwanpawe ahngpa yak me hatüowa okpu ngetamlak.”

⁷Hüpoi Jehoshaphat-e i, “Teman-e tonglak jingne tüome Youngwanpa hipa üne-o yenanglak a?”

⁸Israel ahngpawe Jehoshaphat te i, “Youngwanpate tonglak jingne Imlah üha Micaiah üne-o ngohnang ja; hüpoi taowe Ite nunang, hangjingne Iye üjingne ümeng pa tokte kaiye ümei hango ye-itam.” Jehoshaphat-e jan-e i, “Ahngpawe hüke tah ngao!”

⁹Hüwante Israel ahngpawe shaoshanpa ja nyik-e i; “Mamshe Imlah üha Micaiah woipeikei.”

¹⁰Sha-a Israel ahngpa Ahab hüyange Judah ahngpa Jehoshaphat, ahng o o-yange Samaria petente ongpu yekao kahjee me ahngpa shotjing japong me shot, hüyange hipalan khongkümpuwe iman sheshao me itpu ngao iye ngaowe tam.

¹¹Iman yo me sheja, Chenaanah üha Zedekiahwe yanphei üwong ni pheipu üshang ling hüyange Ahabte i, “Youngwanpawe hatüo hüke inang, ‘Tüopa phei nange Aramlan phei hoklak hüyange iman naolak.’ ”

¹²Ülao hipalan khongkümpuwe jakih muh ngao; “Ramoth phei hoklak jingne yayong tüoh hüyange nange oklak; hangjingne Youngwanpawe nangte okke tamlak,” she iman-e i.

¹³Tüopa hipak me, shaoshanpa aowe Micaiahte nyiklak jingne tai, Iye Ite i, “Ülao hipalan khongkümpuwe ahngpawe okpu ngelak jingne shaha itpu ngao iye tamyangki, hüyange nange-o hüke muh ngaowe tampu shemei!”

¹⁴Hüpoi Micaiah jan-e i, “Üyin me ngohpu Youngwanpa min me taowe jan-e inang, Youngwanpawe üte hanghe ngao tamlakei hatüo taowe ngaolak.”

¹⁵Aope I ahngpa Ahab shongte pei, ahngpawe Ite tonge i, “Micaiah, ahngpa Jehoshaphat tomni Ramoth-Gilead chinghahlak jingne taihah heiya, yetaipu meilak shi?” Micaiah-e jan-e i, “Ching hahtüoh!” “Tüoyangpoi numan-e oklak. Youngwanpawe numante okke tamlak.”

¹⁶Hüpoi Ahab-e jan-e i, “Aope nange ü-phei Youngwanpa min me ngaolakei, üting hei ngaotüoh! Taowe nangte tüopa jingne hangshin me ilak?”

¹⁷Hüyange Micaiahwe jan-e i, “Nyeeyompa yenangpu nyeelan kih, taowe Israellan kahtang me yanne ngenangki; hüyange Youngwanpawe i, ‘Tüolan-a woipa yenang, iman kahta lili yoi nokte chingmei me leih yene tamtüoh.’ ”

¹⁸Israel ahngpa Ahab-e Jehoshaphat te i, “Taowe nangte Iye üjingne ümeng shaha ngaowe tamnang, ümeipa me aope-o itpu minpha ja she ye-i a?”

¹⁹Micaiahwe yelakpe i, “Sha-a Youngwanpawe hanghe i tüopate jaiyah! Taowe yoi Ahngpa shotjingme shotyange wangdang me Youngwanpa ngenang, I neikon-e yoi wangdang shongmokpalan yongyange ngenang.

²⁰Hüyange Youngwanpawe i, ‘Aowe Ahabte lowelamlak shi! Hümme I yayonge tailak hüyange Ramoth me toitamlak?’ Wangdang shongmokpalan ütam-e ütamja ngao, hüyange ülao lan-e ülaopake ngao.

²¹Yaha ja shaoyete lüowe ngai, Youngwanpa shongte wen, hüyange hüke i, ‘Taowe I lowelampu oklak,’ she manngao manngao moppu ngoh.

²²Youngwanpawe Ite tong, ‘Hangheke linge?’ Yahawe jan-e i, ‘Tao tailak hüyange Ahab pheipu hipalan khongkümpu tahleih ine tamlak.’ Youngwanpawe i, ‘Taitüoh hüyange I lowelamne tamtüoh. Nange I lowelam-e tampu me okpu ngelak.’

²³Micaiah hüke tüm-e ngao; sha-a tüokhei leitüoh, Youngwanpawe tüolan nang hipalan ju me tahleih ngaolak phateki, hüyange Youngwanpawe nang jingne ümengpa me ngaoteki.”

²⁴Hüwante Chenaanah üha hipa Zedekiah owe wen, hüyange Micaiah omtüo te yakphawe leiyange i, “Nang phei ngaolak jingne Youngwanpa yaha ü-mepu hangke taipu?”

²⁵Micaiahwe jan-e i, “Leihuyah, aope nang, nang nying nyingke lolak jingne tüp ümongpa te onglakeih tüopa nyih me nange ngelak.”

²⁶Hüwante Ahngpa Ahab-e I shaoshanpa jate ngaophawe i, “Micaiah photüoh, hüyange chingnyu governor Amon, hüyange Ahngpa Joash tangte yah teitüoh.

²⁷Küpnok me I ange tamtüoh she imante itüoh hüyange tao chingmei me leih manye manye an hüyange yeng shaha phei I angtüoh.”

²⁸Hüwante Micaiahwe üngwünne i, “Nang chingmei me leih yema-a, hüma-a Youngwanpawe ü-phei yengaotampu ne menglak!” Hüyange Iye paowe i, “O kahtalan, taowe hanghe ngaoyangki; numan khongkümpuwe jaiyah!”

²⁹Tüophei me Israel ahngpa Ahab hüyange Judah ahngpa Jehoshaphat, Gilead mepu Ramoth chingnyu hahlak jingne ong.

³⁰Hüyange Israel Ahngpawe Jehoshaphat te i, “Tao ü-nying nyingke ahngpa yang she yeshingtamlak jingne ü-nyemo jeilei nüng hüyange shapjute ongshih nüng; hüpoi nangpa-a nangjing ahng o yayah.” Tüokhei Israel ahngpawe yoi nying nyingke shingne yetamlak jingne o yange shapjute tai.

³¹Sha-a Aram ahngpawe pongtongtoi woipalan delüm me ni te o-ngao phawe i, “Israel ahngpa ja shingha tokte kaiye numan-e üjoi üyong ao phei-o tah hok.”

³²Aope nyahpong woipalan Jehoshaphat nge, iman-e i, “Ütingme tüopa-a Israel ahngpa.” Hüyange iman-e Ite shüm-e hoklak jingne yong; hüpoi aope Jehoshaphat üngwün;

³³I-a Israel ahngpa ne yeje she iman-e shinge pei, hüyange iman-e Ite jange yetaipe leihye.

³⁴Hüpoi Aramlan wetaipa jawe wulepawe I jing weanglah nowe yahpuwe kep, hüyange Israel ahngpa Ahabte mongkhüp hei shienghit nipa me hong. Tüokhei Iye tongtoi woipate üngwün-e i, “Tao maayah teki, nang yak lüptüoh hüyange shapju mepu tao yanne teitüoh!”

³⁵Tüonyih me shapju jamloi menge hok, hüwante Ahngpa Ahab-a Aram yekao me meyange I jing pongtongtoi me khaktinge shotyange ngoh. Hüyange tongtoi üphangye kümpu me I mepu yünpu iy maa; hüyange ahngpa-a ünpong me li.

³⁶Hüyange wanghe nyüp ne oteiye wetaipalan ükhong ngohpu nyoijing khongkümpute ngaolan shonne “Ahngpa liteki, tüokhei kahta lili yoi yoi chingte hüyange yoi yoi chingnyute yantüoh she ngaolan pha!”

³⁷Tüokhei Ahngpa Ahab li, hüyange I Samariate yah ye; hüyange iman-e ahngpa mang Samaria me mu.

³⁸Hüyange iman-e tongtoi-a Samaria me ngohpu yengnung me poi, hüyange kuihalan-e I iy yaihah; hüyange üshoyüonyu lan-e tüopa yengnung me iman nying nyingke poiye jao; hüke Youngwanpa ipu ngao ütahte ngai.

³⁹Sha-a Ahab towe ngohpu toishao hüyange Iye lingpu hüyange meinyu fa phei lingpu ahngnok, hüyange chingnyulan aoshin Iye ling, Israel ahngpalan putahpangao laitep me tüolan-a nyanyange ngohnang.

⁴⁰Tüokhei Ahab ahngpa yoi payimlan phei shi hüyange yoiha Ahazaihwe I nanleiye ahngne meng.

⁴¹Israel ahngpa Ahab-e wangpeng peli shepupa ahngne mengpu hipak me, Asa üha Jehoshaphat Judah tangme ahngne meng.

⁴²Jehoshaphat Iye wanglam lam ne ükong wangwante nyupuh wangpeng delüm me nga ngohyangki, hüyange Iye Jerusalem me wangpeng da phei me nga wanglam lam. Hüyange Inyu min Shilhi yhala Azubah ngoh yangki.

⁴³Iye yoipa Asa lamnyu me kem, hüyange Youngwanpa sheshao me hanghe ütingpa ngohnang, tüopa linge Iye tüopa mepu leih yeye. Tüoyangpoi ülao khümjinglan yeyahteipe ngoh yangki; hüyange kahtalan-e üne-o tüolan ülao khümjinglan me toidopu sünyet jakke ngoh yangki.

⁴⁴Jehoshaphat-e Israel ahngpa phei chingmei ling.

⁴⁵Sha-a Jehoshaphat towe ngohpu toishaolan hüyange Iye mongyong puphei okkeshangpu, hüyange Iye hangke hok tüolan-a Judah ahngpalan putahpangao laitep me nyanyange ngohnang.

⁴⁶Hüyange üsho yüopulan towe ngohpu netan hüyange shekolan nuweshak-e ngohpu ülao khümjinglan hanghepa Ipa Asa hipak memuh ngoh, tüolan-a Iye kahmük mepu mahne tam.

⁴⁷Edom kahtok me ahng yenangpe ngoh; Judah ahngpawe leye ngaipu ahnghapawe wanglam lam.

⁴⁸Ophir kahtokte hon ki ne tailak jingne Jehoshaphat-e yengchingte kemlak yenglin ling; hüpoi yenglin lan-a Eziongeber me mengteiye yetai.

⁴⁹Hüwante Ahab üha Ahngpa Ahaziahwe Jehoshaphat te i, “Ü-shaoshanpalan nang shaoshanpalan phei yenglin me taine tamtüoh,” hüpoi Jehoshaphat-e yemong.

⁵⁰Jehoshaphat yoi payimlan phei shi, hüyange yoipa David chingnyu me I mu; hüyange yoiha Jehoramwe I nanleiye ahngne meng.

⁵¹Judah ahngpa Jehoshaphat wangpeng pen me nyit shepupa ahngne mengpu hipak me, Samaria me Israel tangme Ahab üha Ahaziahwe ahngne meng, hüyange Iye Samaria me wangpeng ni wanglam lam.

⁵²Hüyange Youngwanpa sheshao me hanghe ümengpa hatüo Iye ling; hüyange yoipa Ahab, hüyange yoinyu Jezebel, hüyange Nebat üha Jeroboam lamnyu me kem, hüyange Iye Israellan ünu omne tam.

⁵³Iye Baal shaoshan-e Ite khüm, hüyange Ipawe lingpu khongkümpu kih-e Iye linge Israel Kahwang Youngwanpa mongshih ngaine tam.