Read Konyak Naga 1 AHNGPALAN 3 Bible Online

1 AHNGPALAN 3 - Konyak Naga bible

1 AHNGPALAN 3

¹Solomon-e Egypt ahngpa phei Inok naoyha yahpu kaiye shümpa tam, hüyange yoi ahngnok hüyange Youngwanpa nok hüyange Jerusalem neikonpu jantpe linge mansho mansho David chingnyu me yha ngohlak jingne Iye yahpei.

²Tüopa nyih hipak me Youngwanpa min me khümjing ja weyange yenang puwe, kahtalan-e kahtang nyoijing üken phe me toidopu phawe ngoh yangki.

³Solomon-e Youngwanpate ken hüyange Ipa David-e nyüoweleipu ngaokhümlan me khakshuwe kem, hüyangpoi üne-o yinmok üngang toiyange wümjong üken phe me toidopu pha.

⁴Hüyange hipak ja me ahngpawe Gibeonte toidolak jingne tai, hangjingne hatüowa ütahpa wümjong ne ngoh, hüyange tüopa wümjong me Solomon-e jakke dopu haja nanjing dopu pha.

⁵Gibeon me mangme I tangte Youngwanpa ngai hüyange Ite i, “Taowe nangte hanghe phane tamhu nangki?”

⁶Hüyange Solomon-e jan-e i, “Iye nang sheshao me hüyange üjaopa me hüyange nang phei juteih mongjang jaoshihpu phei kempu phei phinne, nange nang shaoshanpa David üpate yayeng üyong hüo, hüyange tenyihpu nyih me, nange Ite netan naha ja I ahngpa shotjing me shotlak jingne pha.

⁷Hüyange sha-a O Youngwanpa Ü-Kahwang, Üpa David nanleiye nange nang shaoshanpa tao ahngpa ne mengetam, tao naha ja nehei mengpu jingne, hangke tai onge kemlak taowe yeshing.

⁸Hüyange nange le-ngaipu jatnyu üyong ümeken me kahta üngang ngohpu nanjingne iyeleine ye-ok, iman yo me nang shaoshanpa ngohnang.

⁹Tüokhei nang kahtalan ükhong üyong ngao phünwante ümeng ümei shinglak nanjingne shinge okpu kenmong nang shaoshanpa üte yahkei, hangjingne kahta ükhong üyong hatüo aowe ngao phünpu oklak?”

¹⁰Solomon-e tüopa tongpu me Youngwanpa monghah.

¹¹Kahwange Ite i, “Hangjingne nange hatüo hei tong, hüyange nange nang üyin jinlaolak jingne yejema-a nang hakpa ne menglak jingne yejema-a nang wepa üyin jingne yetong, hüpoi nange ngaoting ngao phünpu shinge oklak pahi tong;

¹²leihuyah, sha-a Taowe nang ngao kih-e lingtam nang, hüke nang sheshao me nang kihpu ülao ao-o yenanglak, ye-i-ma-a nang phei me nang kihpu ao-o yengailak jingne, Taowe nangte konngao shingeoklak kenmong phateki.

¹³Nange hanghepa yetong hatüo-o Taowe nangte phanang, hüke ahngpa yo me nang hipak me nang kih-e ao-o yenanglak jingne Taowe moth hüyange minyong ngampai nangte phalak.

¹⁴Nange nangpa David kempu kih-e ü-nyanne angpu ngaokhüm hüyange ngaowe tampu jon-e kemma-a, hüwante Taowe nang jin laowe angtamlak.”

¹⁵Tüophei me Solomon shinlüo, hüyange leihuyah, hatüowa shinmang ja ne ngohyangki; hüyange Iye Jerusalem te ye-e Youngwanpa üjao Ghonu shongme yong hüyange jakke dopu hüyange chingmei dopu Youngwanpate pha. Tüophei me Iye yoi shaoshanpalan khongkümpute mo üyong ja linge uhtam.

¹⁶Nyihja üsho yüonyu ni pei hüyange iman nying nyingke Solomon ahngpa sheshao me yong.

¹⁷Hüyange sheko jawe i, “Nang Üyongpa, tüopa sheko hüyange tao nok ja me ngohnang, hüyange nokme yhawe nge-e taowe netan nahaja puh.

¹⁸Hüyange hatüo ngai, taowe naopuh phei me nyih lüm ngohyange, tüopa shekowe-o naha ja puh, hüyange toman jam me ngohyangki, hüyange tüopa nok me tomni tokte kaiye ülao ao-o yenangpe ngoh;

¹⁹hüyange tüopa shekonyuwe puhpu naha-a yaningme yeshingpe yha lüpshüpwante sheappu jingne li.

²⁰Yha phawo me lüo, hüyange tao shinnyaiye shi ngohwante ü-mepu ü-ha yhawe yah, hüyange naha-a yoi jakuh tangme angyange yha üha naomang ü-jakuh tangme angtam.

²¹Hüyange aope ühate düam uhlak jingne tao lüo, leihuyah, naha-a liteiye ngoh yangki, hüpoi aope taowe napning meimei-e lei, leihuyah, ü-phei ngohpu naha-a ü-ha ne yejepe ngohyangki.”

²²Hüpoi ülao shekowe i, “Yeje, üyin ngohpupa ü-ha hüyange liteiye ngohpupa-a nangha üja!” Üwangnyuwe-o i, “Yeje, liteiye ngohpupa-a nangha hüyange üyin me ngohpupa-a üha!” Hüke ahngpa sheshao me imni teingaowe ta.

²³Hüwante ahngpa Solomon-e i, “Jawe inangki, ‘Üyin me ngohpupa-a üha, hüyange liteiye ngohpupa-a nangha;’ üne-o jawe inangki, ‘Yeje, hüpoi litepupa-a nangha, hüyange üyin me ngoh pupa-a üha.’ ”

²⁴Tüokhei ahngpawe i, “Üte yanglow ja yahkei.” Hüyange ahngpa sheshao me yanglow ja yah pei.

²⁵Hüyange ahngpawe i, “Üyin me ngohpu naha-a ni ne tange toitüoh, hüyange tangkhüw ja, jate hüyange tangkhüw ja sheja te phatüoh.”

²⁶Hüwante shekonyu ao üyin me ngohpu naha ünyu ne ngoh, yhawe ahngpa te i, hangjingne yhawe naha jingne yoi iymeiye dak-e teih, hüyange yhawe i, “O nang Üyongpa, üyin me ngohpu naha-a yhate phatüoh, hangkejam hatüo yetoilak yang.” Hüpoi ülao shekowe i, “Tüopa naha-a yha jingne-o yejelak, ye-i-ma-a üjingne-o yejelak, ja toi tüoh hüyange tüopa-a tangtüoh.”

²⁷Hüwante Solomon-e jan hüyange i, “Naha-a tahtoi! Üwangpa shekote phatüoh, yha-a hatüo naha jing ütingpa ünyu.”

²⁸Hüyange Israel khongkümpuwe ahngpawe ngaophünpu jai, hüyange iman-e ahngpate nyam, hangjingne ngao phünlak jingne, Kahwang konngao I me ngohnang she iman-e nge.