Read Konyak Naga 1 AHNGPALAN 4 Bible Online

1 AHNGPALAN 4 - Konyak Naga bible

1 AHNGPALAN 4

¹Solomon ahngpa Israel üshei tangme ahngne meng;

²hüyange tüolan-a I jing ütahpa woipalan ngohnang: Ngengpa ne Zadok üha Azariah;

³Gho me nyanpalan: Shisha hayim Elihoreph hei Ahijah; nyan-e angpute üjengpa: Ahilud üha Jehoshaphat;

⁴Nyahponglan woipa ütah: Jehoiada üha Benaiah, Ngengpane: Zadok hüyange Abiathar,

⁵District Governor ütahpa: Nathan üha Azariah, Ahngpa yakjah yene: Nathan üha ngengpa Zabud;

⁶Ahngnok shaoshanpalan tepu üjengpa: Ahishar, Toilingpalan tepu üjengpa: Abda üha Adoniram ngohyangki.

⁷Solomon-e I hüyange ahngnok me ngohpu khongkümpu jingne hahying namnolak yakjongpalan (Governor) penme ni ang, wangpeng ja me iman lilite lekeng japong jingne hahying namno ne tam.

⁸Hatüolan-a woipa pen me ni hüyange imante yakjongne tampu districtlan ngoh nang Benhur: Ephraim phaotang kahmük jingne,

⁹Bendeker: Makaz, Shaalbim, Beth-shemesh, hüyange Elon Beth Hanan chingnyulan jingne,

¹⁰Benhesed: Arubboth hüyange Socoh hüyange Hepher yikeng neikonne ngohpu chingnyulan jingne;

¹¹Benabinadab, aowe Solomon yhala Taphath sheko ne yah: I Dor yenghoi khongkümpu me.

¹²Ahihud üha Baana: Taanach hüyange Megiddo, Zarethan ü-o me ngohpu Beth-shean khongkümpu me Jezreel üphang yeme Beth-shean mepu Abelmeholah ngoiye, hüyange Jokmeam chingnyu ngoiye ngoh yangki.

¹³Bengeber: Gilead mepu Ramoth chingnyu, I phei Jair jing chingnyulan Manasseh üha Gilead me ngohpu; üne-o Argob kahmüklan-o I phei om, Bashan me chingtuk jantpenyuwe neikonyangpu hüyange peten lan-a shakphan yan wenao phei lingyangpu chingnyu üyong dewok.

¹⁴Iddo üha Ahinadab: Mahanaim district (kahhoi) me.

¹⁵Ahmaaz: Naphtali jingne; Iye Solomon yhala Basemath muh yoi shekonyu ne yah.

¹⁶Hushai üha Baana: Asher hüyange Bealoth chingnyu yenghoi jingne;

¹⁷Paruah üha Jehoshaphat: Issakhar yikeng mong jingne,

¹⁸Ela üha shimei; Benjamin yikeng mong jingne,

¹⁹Uri üha Geber: Gilead yenghoi me hüyange Amorlan ahngpa Sihon ne wanglam lampu kahmük hüyange Og ahngpa Bashan-e lampu kahmük me. Tüolan pen me ni tokte, kahmük nopu tangme üne-o governor ja ngoh yangki.

²⁰Judah hüyange Israellan ükhong üngang yengching pheih kih-e ngaiye ngoh yangki; iman-e hahying yange hüyange mongmei.

²¹Solomon-e Philistia kahtok Euphrates yengyin mepu Egypt yikeng ngoiye ahngching üshei tangme wanglam lam; iman-e poon yahpeiye Solomon üyin jinkümme I shaoshan.

²²Nyih japu jingne Solomon jingne hahying tümpuwa shemeipupa ankhoih taksheng delüm, hüyange heeishop itpu dewok ngoh yangki .

²³Tamme angpu mahu üpong pen, heeihüng hahngohpu mahu da, hüyange nyee gho ja, tüolan tokte paowe tok, meishi, hüyange meiyah hüyange awpong shenütpu üngang ngoh yangki.

²⁴Hangjingne Solomon-e Euphrates yengyin mepu Tiphsah mepu Gaza ngoiye, hüyange Euphrates yengyin jayekao ahngpalan tangme Iye wanglam lam; hüyange I neikon-e ngohpu khongkümpu phei I chingmei me ngoh yangki.

²⁵Solomon üyin jin khongkümpu me Judah hüyange Israel yinne ngoh yangki. Dan mepu Beersheba ngoiye, kahta lili-e yoijing wuwüngwu hüyange phuklick ngoh yangki.

²⁶Solomon-e I tongtoi jingne koipong haja deli ngohyangki, hüyange koipongpalan haja pen me ni ngoh yangki.

²⁷Hüyange Governorlan-e Solomon ahngpa jingne, hüyange Solomon ahngpa khao me peipalan khongkümpu jingne hahying yoite, shupu lekeng me pha, iman-e hanghe me-o toinan-e yetüoh.

²⁸Barley tah hüyange koiponglan jingne tahjant hüyange wehok me jonpu shephetpupa koiponglan jingne iman-e kahta lilite itpuke yahpei.

²⁹Kahwange Solomonte konheingao hüyange shinge okpu, hüyange mongyongpu, yengching tangmepu pheih kih-e pha.

³⁰Tüokhei Solomon konheingao heong yekao me ngohpu deitahpalan hüyange Egypt konheingao üshei tangme ütahpa ne ngoh yangki.

³¹I kahta üshei tangme kon shenangpupa ne ngoh yangki, Ezrahitlan Ethan phei-o, hüyange Heman, Calcol, hüyange Darda, Mahol hayimlan tokte; hüyange Iye okkeshangpu neikon-e ngohpu jatnyulan tangme ngoh yangki.

³²Hüyange Iye detngao haja lüm ngao hüyange Iye lingpu hem haja ja phei me nga ngohyangki.

³³Iye pee jeng, Lebanon me ngohpu cedar pee mepu hüke jantpenyu me ngaipu hyssop ngoiye ngao; Iye yinmok jeng, awhalan jeng, hüyange wulung hei wei hüyange nyahte ngoiye ngao.

³⁴Solomon konngao jailak jingne kahta khongkümpu hüyange kahtoknyu ahngpalan aoyinne I konngao jeng jai khongkümpu pei.