Read Konyak Naga 1 AHNGPALAN 5 Bible Online

1 AHNGPALAN 5 - Konyak Naga bible

1 AHNGPALAN 5

¹Sha-a Tyre ahngpa Hiram-e Solomon tangte yoi shaoshanpalan shon; hangjingne Iye Solomon yoipa nokme ahngpa ne menglak jingne minnga phowe leteki she jai hangjingne Hiram-e jinte David te kenne ngoh yangki.

²Solomon-e Hiram tangte tüopa ngaolan shonne ye.

³“Yoi wepalan Youngwanpawe I yashong phangme man ang man ang she wehok üngang I neikon-e ngohpu jingne üpa David-e I jing Kahwang Youngwanpate yoppe khümlak khümjing ja yeweokpe ngoh peipu hatüo nange shingnang.

⁴Hüpoi sha-a Ü-Kahwang Youngwanpawe üte üshei ye me toloimei pha; tüome wepalan-o yenang yejema-a ümengo yengai.

⁵Hüyange leihuyah, Ü-Kahwang Youngwanpate yoppe khümlak khümjing ja taowe welak juteih ngoh nang, hangjingne üpa David te Youngwanpawe i, ‘Nangha, aohipa nenok me nang ahngpa shotjing me taowe shotte tamlakei, Iye üte yoppe khümlak Khümjing welak.’

⁶Tüokhei sha-a Lebanon mepu cedar pee iman-e üte akke tamlak jingne nange tamkei hüyange ü-shaoshanpalan nang shaoshan palan phei ngohlak, hüyange nange yupuke nang shaoshanpalan jingne taowe nanmee wangman-e phalak, hangjingne Sidonlan kih-e pee akke linglak toman yo me manpu yenang she nange shing.”

⁷Aope Hiram-e Solomon ngao jai, I yeonge mongmei, hüyange i, “Tenyih Youngwanpa min yongtüoh, aowe tüopa jatnyu tangme wanglam lamlak jingne David te konnangpu ha ja moiman tam!”

⁸Hiram-e Solomon tangte shonne i, “Nange ü-tangte shonpu ngaolan, taowe tüoteki; nange yampu cedar hüyange yankhekpe taowe nangte phalak.

⁹Ü-shaoshanpalan-e tüolan-a Lebanon mepu tümme sayange yengchingte yah tailak, hüyange taowe tüolan-a tüppe shayange nange hipak khakshuwe tüolakne yengching me nange lepu nyoijing ngoine shonlak. Tüoken me ü-kahtalan-e ütüp-a lan-e tamlak, hüyange nang shaoshanpalan-e shaaji iman mepu yahlak. Hüyange nange linglak ne-a ü-kahtalan jingne hahying phawe tampu kaiye taowe lengpu-a shopu ne menglak.”

¹⁰Tüokhei Hiram-e Solomon te Iye yah-hupu kih-e cedar hei yankhekpe üyung üyung me pha.

¹¹Hüwante Solomon-e Hiramte wheat tah tahki haja da Inok noksa hahyinglak jingne hüyange olive minnga ümei taksheng haja da pha; hüke wangpeng lep iye Solomon-e Hiram te pha.

¹²Youngwanpawe Solomon te Iye Ite janpu ke konngao pha, hüyange Hiram hei Solomon nipa me chingmei ngoh, hüyange iman-e jamshe shüppe shawe ngohlak ling.

¹³Solomon ahngpawe Israel khongkümpu mepu toilinglak kahtalan shaijem, hüyange tüopa ükhong me kahta haja delüm ngohyangki.

¹⁴Iman tangme nokpu ne Adoniram linge tam. Iye kahtalan-a haja pen pong ükhong lüm ne tam, hüyange moilan ükhongte lekeng ja Lebanon me toi lingyange nokte ye-e lekeng ni ngohlak ne linge tam.

¹⁵Solomon-e phaotang kahmük ye me long khüwpalan kahta haja detet ang, hüyange tüolan kilak jingne kahta haja denyit angyangki.

¹⁶Tüo tokte Solomon phang mepu üyonglan toilingpute leilak jingne kahta haja lüm phei me gho lüm angyange ngoh yangki.

¹⁷Ahngpawe ngaokhüm pha, hüyange iman-e khümjing nokjing yonge wanglak jingne khüw-e ling.

¹⁸Hüyange Solomon hei Hiram ni nokwepalan hüyange Geballan nokwepalan-e tüolan-a ling, hüyange peyung hüyange long iman-e khümjing welak jingne tüm.