Read Konyak Naga 1 AHNGPALAN 6 Bible Online

1 AHNGPALAN 6 - Konyak Naga bible

1 AHNGPALAN 6

¹Israel kahtalan Egypt kahtok mepu ngaiyang phei me wangpeng gho peli phei me detet shepupa me, Solomon-e Israel tangme ahngpu wangpeng pelishepupa me, Ziv leat me, hanghepa ni shepupa leat ne meng Iye Youngwanpa Khümjing welak jingne ükong wang.

²Youngwanpa khümjing hanghepa Solomon-e we, üjükte yakkong dewok, hüyange üpeamte yakkong da hüyange kahtok mepu daowe ongpute yakkong delüm .

³Hüyange nokshao yeme üne-o nokja hüppe wepu khaopute yakkong da, noktepu üpeam phei jakih-e, hüyange tüopa ümong nyoi kahjee me yakkong pen ngohyangki.

⁴Hüyange Khümjing jant me Iye tawo ngai, ümongye me shekhao she hüyange ü-at yeme sheti she ling.

⁵Khümjing te shongpu jant moini ünah ye me hüyange nokkong ye me Iye tüp neikon-e ling, tüopa tüp daopu me moilante yakkong nga-nga ngohyangki.

⁶Üphangpa tüp-a khaopu me yakkong nga ngoh, hüyange üwopa tüp-a khaopu me yakkong wok ngoh yangki, hüyange lüm shepupa tüp-a yakkong nyit ngohyangki, nok jant neikon-e ünahye jingne Iye long üwan yahpuwe yajenth tangme nok jant yonglak ne ling.

⁷Long hangheye khümjing we, tüolan-a long khüwjing me tümme shoyange yahpeipu longe we, tüokaiye nok wewante yanmee yejema-a wa yantoi kongkhakpu hango yejai tampe we.

⁸Üphangpa tüpte ongpu tafün-a khümjing heyekao me, ni shepupa hei lüm shepupa tüpte shai janne inyange ngohyangki.

⁹Tüokih-e linge Solomon ahngpawe Khümjing wepu shoyangki. Iye shinpüangne cedar pelao hei pekhüw phei ling.

¹⁰Paowe wepu tüp lümme shinne moilante ja kih-e yakkong nga nga daowe Khümjing jant ü-at ye me linge ngaiye we, hüyange tüolan-a cedar pelao phei teihüppe ling.

¹¹Sha-a Youngwanpa ngao Solomon tangte pei,

¹²“Nange wepu tüopa khümjing jeng me, nange ü-nyanpu ngaokhüm lan me kema-a, hüyange linglak ngaokhümlan ngao jaima-a, hüyange taowe ngaowe tampu lili jaiye tüo me kem ma-a, taowe nangpa David te janpu ü-ngao taowe anglak.

¹³Tao Israel kahtalan yo me nange wepu tüopa khümjing me ngohlak, hüyange taowe aope-o ü-kahta yewintüohlak.”

¹⁴Tüokhei Solomon-e Khümjing we hüyange hatüo shoyangki.

¹⁵Hüyange Iye ümongye jant-a taleng mepu shinpüang ngoiye cedar pekhüw phei eppe ling, hüyange talenga yankhek pee phei ling.

¹⁶Nok mong yeme, Shejaopupa Nyoi she nyikpu tüp ja, khümjing ünah yashong me linge we. Hatüowa yakkong da laowe hüyange hatüowa cedar pekhüw phei taleng mepu shinpüang ngoiye tienne ling.

¹⁷Hüyange shejaopupa nyoi sheshao mepu khümjing nyoi-a yakkong deli laowe ngoh yangki.

¹⁸Hüyange nok ümongye me cedar me jupeng hüyange maikook linge wangyange nokmong lanshepu cedar shaha phei loppe ling, tüone menge jantme shonge lingpu longa lanshe ye-nge.

¹⁹Youngwanpa phei jiengjeppu ghonu anglak jingne, Iye khümjing ümongpa me üjao tüp ja ling.

²⁰Hüyange üjao tüp a üjükte yakkong da, hüyange üpeam me yakkong da, hüyange kahtok mepu daopu yakkong da ngoh yangki; hüyange tüome Iye hon shaha shok-e ling. Hüyange Iye wümjonga cedar pekhüw phei ling.

²¹Solomon-e khümjing nokmonga hon shaha shok-e ling, hüyange shejaopupa tüpte onglak tafün me Iye hon phei yankeilei kih-e lingyange jhotte ang, hüyange tüome-o hon muh hin.

²²Hüyange khümjing nokmong khongkümpu me hon shaha shok-e shitte phowe ling. Hüyange shejaopupa tüp me ngohpu wümjong khongkümpuwa, hon shaha phei ling.

²³Shejaopupa tüp me Iye olive pee phei cherubim ni ling, laopu me yakkong pen pong ngoh yangki.

²⁴Cherub ja yangteng yakkong nga hüyange ja jing yangtengo yakkong nga ngoh, yangteng ja üküm ye mepu yangteng ja üküm ngoipu me yakkong pen,

²⁵Hüyange ülaopa cherub-o yakkong pen ngoh, cherub moini-a sheampu jakih-e hüyange leilak-o ja kih-e ngoh yangki.

²⁶Cherub ja kahtok mepu daopu me yakkong pen ngoh yangki, hüyange ülao japa-o, hüke muh ngoh yangki.

²⁷Hüyange Iye cherub nok mongme ang, hüyange cherub yangtenglan-a saayange yangteng jawe jant jate yüowe hüyange yangteng japawe-o jant jate yüowe she ling, hüyange noksa üwo me iman yangtenga teilet-e ngoh yangki.

²⁸Iye cherub, hon phei phowe lingyangki.

²⁹Iye nokmong jant hüyange ümongpa tüp jant khongkümpu me cherubim hei logpee üyak, hüyange jupeng noksalan khak wange ling.

³⁰Nok mong taleng nehoi ümongyeme hüyange ütah yeme honne ling.

³¹Hüyange shejaopupa tüp tafün shong nyoi me olive pee phei ni me pheiye jeiye lingpu taküp shong; hüyange taküp shangtang ye-a jüpkülüp-e ngaiyange ngoh.

³²Hüyange taküplan me cherubim, logpee, hüyange jupenglan ling. Tüopa taküp, cherubim, hüyange logpeelante honne shitte phoyange ling.

³³Tüokhei Iye onglak jingne olive pee phei taküp ling, jant meitam peli me ja she ling.

³⁴Hüyange yankhek pee phei taküp ni; taküp ja ni me nüplak ne hüyange taküp ja-o ni me nüplak ne ling.

³⁵Hüyange tüopa tangme Iye cherubim, logpee, hüyange jupenglan ling, hüyange Iye tüolan toi tangme honne phoyange ling.

³⁶Iye khüwyahpu long üleng lüm hinyange hüyange cedar yajenth üleng ja she heyange ümongye me tüp-a ling.

³⁷Youngwanpa khümjing nokjinga Solomon-e wanglam lampu wangpeng peli shepupa ni shepupa Ziv lekeng me ükong wang.

³⁸Hüyange Solomon-e wanglam lampu wangpeng pen me ja shepupa me, Bul leat hanghe leat tet shepupa ngoh nang, tüopa leat me nok ülam lili hüyange noksa yahhuwe teihpu khongküm tümme sho. Hatüo linge wesholak jingne Solomon-e wangpeng nyit hipak yahyangki.