Read Konyak Naga 1 AHNGPALAN 8 Bible Online

1 AHNGPALAN 8 - Konyak Naga bible

1 AHNGPALAN 8

¹Tüophei me Youngwanpa phei jiengjeppu ghonu David chingnyu Zion mepu yah yelak jingne, Solomon-e Israel lwngmeilan hüyange jat woipalan khongküm, hüyange Israel kahta yo me woipalan khongküm Jerusalem me Solomon nok me jemne tam.

²Israellan khongküm Ethanim leat me, hatüo lekeng nyit shepupa, Solomon ahngnok me mo te jem.

³Hüyange aope woipalan khongkümpu jem-e küm, ngengpa lan-e jiengjeppu ghonu nowe yah.

⁴Hüyange iman-e Youngwanpa ghonu yah, hüyange khümjing nyenok, hüyange nyenok me ngohpu, üjao wan khongküm, tüolan khongkümpuwa ngengpalan-e hüyange Levilan-e yah pei.

⁵Ahngpa Solomon hüyange Israel ükhong üshei, aoyin I sheshao me jemyangki, khongkümpuwa ghonu sheshao me I phei, ine ye-okpe hüyange iyeleine ye-okpe mahu üpong hüyange nyeelan dopu yahpeiye pha.

⁶Hüyange ngengpalan-e Youngwanpa phei jiengjeppu ghonu yoi nyoite, ümongpa nyoi mongme, shejaopupa nyoijing me hüke cherubim yangteng phangte yah pei.

⁷Hangjingne cherubim yangteng phangme üjao ghonuwa ngoh yangki, hüyange cherubim-e ghonu hüyange tüome ngohpu sheam khongkümpu tangme yüohyange ngoh yangki.

⁸Laopu nanjingne üjao tüp mepu shejaopupa nyoi me üjeng ngenang, hüpoi ü-at yeme-a sheam üjenga ye-nge, hüyange tenyihte ngoiye tüolan-a tüome ngohnang.

⁹Israel lan Egypt kahtok mepu ngaiwante Youngwanpa hanghe jiengjeppu Israel kahtalan phei ling, hüwante Mosawe tüome Sinai kahtang me hintampu longsheng ni ghonu me, tüo tokte kaiye tüome hango yenangpe ngoh.

¹⁰Aope ngengpalan khümjing tüohyange ngai, mokhshe Youngwanpa nok wangphom-e maa;

¹¹hüyange ngengpalan wangphom ngohpu jingne namnolak jingne yeyong okpe ngoh; hangjingne Youngwanpa müktishiwapuwe Youngwanpa nok maa.

¹²Hüwante Solomon-e yoppe i, “Youngwanpawe wangdang me wanghe angtam , hüpoi wangphom ünyak yo me I ngohlak she i.

¹³Taowe nangjingne weyange hüyange nok nowe intam nang; nang jingne nyoijing ja jinte ngohlak jingne wetam.”

¹⁴Jempu kahtalan khongküm yongyange ngoh wante, iman yekaote Solomon ahngpa sheta lüp, hüyange iman tangme Kahwangpa moiman peilak jingne Iye tong.

¹⁵Hüyange Iye i, “Israel Kahwang Youngwanpa moimanpupa, Iye yoi juwe üpa David phei-o ngao, hüyange Iye yoi yak-e hatüo ngaine tam, hüyange i,

¹⁶‘Ü-kahta Israellan Egypt kahtok mepu woiteipu nyih mepu taowe ümin ngohlak jingne nok welak Israel jat mepu chingnyu ja nehoi yele, hüpoi nang kahta Israel tangme nokpu ne menglak jingne taowe David le.’

¹⁷Solomon-e yelakpe i, üpa David mongjang me Israel Kahwang, Youngwanpa min jingne nokja welak teih ngoh yangki.

¹⁸Hüpoi Youngwanpawe üpa David te i, ‘Nang mongjang me ü-min jingne nok ja welak teihpu-a meinangki;

¹⁹hüpoi nange nok-a yewelak, hüpoi nangha nenok mepu ngailak, hüyange ümin jingne Iye nok-a welak.’

²⁰Sha-a Youngwanpawe ngaopuke, Iye yoi ngao ütahte ngaitam nang; hangjingne Üpa David mepu tao ngai, hüyange Youngwanpawe janpuke, Israel ahngching me tao shot; hüyange Israel Kahwang, Youngwanpa min jingne nok-a we.

²¹Taowe tüoken me ghonu jingne nyoijingja we, hüyange teman payimlante iman Egypt kahtok mepu woiye yahpeiwante, jiengjeppu-a tüoken me angnang.”

²²Tüophei me Israellan ükhong jem-e ngohpu sheshao me Solomon-e Youngwanpa wümjong shongme yong hüyange yoi yak wangyekao te hongyange, Iye i,

²³“O Youngwanpa Israel Kahwang, wang ütang yeme yejema-a kahtok ümong yeme nang lepu ülao Kahwang yenang; yoi kenmong jang khongkümpuwe nang sheshao me kempalante, nange jiengjeppu hüyange yayeng shüpshe hüonang;

²⁴nange nang shaoshanpa David üpate janpu angepei, eihyang, tenyihpu nyih kih-e, nange nang juwe ngao, hüyange nang yak-e hatüo ngaine tamteki.

²⁵Sha-a tüokhei, O Youngwanpa, Israel Kahwang, Üpa David nang shaoshanpate janpu nange ange i: ‘Nangha lannehi yoi toishao me, mongphawe peima-a hüyange nange kempuke iman-e ü-sheshao me kemma-a, Israel ahngching me ü-sheshao me shotlak taowe ao-o ye-okpu ye-ngetamlak.’

²⁶Sha-a tüokhei, O Israel Kahwang, nange nang shaoshanpa üpa David shongme ngaopu ütahte ngailak jingne, nang ngao ngohtam pha she taowe yopnang.

²⁷“Hüpoi eihyang Kahwang-a kahtoknyu me ngohlak a? Leihuyah, wangdang hüyange wang ütang me ngohpu khongkümpu me nang ngohne yesheam; hüma-a taowe wepu hatüo nok me nang hangke sheam ne!

²⁸Hüpoi nang shaoshanpa yoppu, hüyange Iye yoppetongpu me nange iyeshepu hüonang; O Youngwanpa, Ü-Kahwang nang sheshao me tüopa nyih me nang shaoshanpawe üngwünpu hüyange yoppu nange jaipha;

²⁹nang mük tüopa nok yekaote wangnyak hüyange wangngai phe me leiye, hüke nange ipu yekaote lüplak, ‘Ü-min tüome ngohlak,’ hüke nang shaoshanpawe yoppu yekaote lüppe yoplak she nange i.

³⁰Aope tüopa nok yekao me meyange nang shaoshanpa hüyange nang kahta Israelan-e yoplakei, nange jaipha; eihyang, nang ngohjing wangdang mepu nange jaipha, hüyange aope nange jailakei, hüwante ümeng winpha.

³¹“Kahta jawe yoi yupi phei tüi-e ünu om ma-a, hüyange Iye jiengjeplak jingne phoiwümpu ngao tüohma-a, hüyange Iye peiye nang üjaopa wümjong me nang nok me jiengjepma-a,

³²hüwante nang wangdang mepu jaipha, hüyange lingpha, hüyange nang shaoshanpa ümengpa yoi toishao-a yoi shangtang me kilak ne, üjaolan tinge tam-e, yoi üjaopa phei phünne phalak ngaophün tamtüoh.

³³“Aope nang kahta Israellan iman-e nang phei tüi-e ünu ompu jingne, wepalan sheshao me ye-okpu ngelakei, iman-e nang tangte peiye, nang min me janma-a, hüyange tüopa nok me nang min me yopma-a,

³⁴hüwante nange wangdang mepu jaipha, hüyange nang kahta Israellan te ümeng winpha hüyange iman payimlante nange janpu kahtokte nishe iman woipeikei.

³⁵“Iman-e nang phei tüi-e ünu ompu jingne, aope wangdang taküp küppe wai yekeilakei, hüwante iman-e tüopa yekao me lüpyange yopma-a, nange iman shaoshi tamwante iman ünu mepu lüppe nang minme janma-a,

³⁶hüwante wangdang mepu nange jaipha, hüyange nang shaoshanpalan, hüyange nang kahta Israel lante ümeng winpha, hangjingne iman-e kemlak lamnyu ümei imante hüonang, hüyange nange mothleilak jingne phapu kahmükte iman tangte nange wai shonpha.

³⁷“Kahmük me seanyao yengle ngohma-a, shaoshi yatengpu ngohma-a, wangyang wangyi kaiye ülicklan mengma-a, nyaodukh hüyange yongyat ngaima-a, hüyange yoi wepalan-e iman yoi chingnyulan me neikonma-a, hangheyin leamdakpu hüyange daktinpu ngohlakei;

³⁸hanghe yoppuwe aowe aope tonglakei, ye-i-ma-a nang kahta Israellan khongkümpuwe yoi mongjang me shaoshipu teihaowe yoi yak noyange tüopa nok yekaome meyange yoplakei;

³⁹hüwante nang ngohjing wangdang mepu nange jaipha, hüyange ümeng winpha hüyange nange kahta lili mongjang shinge ngohtepuwe yoi toishao phei shuwe nange kahta lilite pükke tamshih;

⁴⁰tüome nakshih toman payimlante phapu kahmük me iman ngohwante, iman-e hipak üshei me nangte nyamlak.

⁴¹“Üne-o nang kahta Israellan ne yeje, kahhengpa ao nang min me kahmük üjai mepu peilakeih,

⁴²(hangjingne iman-e nang min üyong hüyange nang wongnangpu yak hüyange nang yaknoyange ngohpu jailak) Iye tüopa nok yekao me yoppe peiwante, nang ngohjing wangdang mepu nange jaipha.

⁴³Hüyange kahtoknyu jat üsheiye nang min shinglak nanjingne, nang kahta Israellan-e nangte nyampuke nangte nyamlak nanjingne, hüyange tüopa nok hanghepa taowe we, hatüowa nang min me nyiknang she shinglak nanjingne kahhenglan-e nyikpuke linge tamshih!

⁴⁴“Nang kahtalan-e yoi wepa phei tüi-e hokne taima-a hanghepa lamye me nange iman shonlak, nange lepu nok yekao me meyange iman-e nangte yopnang, hüyange nang min jingne taowe hanghe nok ling, tüopa yekaome meyange iman-e aope yoplakei,

⁴⁵hüwante iman-e yoppu hüyange tongpu nang wangdang mepu jaitam shih, hüyange iman wongpongke linge tamshih.

⁴⁶“Iman-e nang phei tüi-e ünu om ma-a, hangjingne ünu ye-ompu kahta ao-o yenang-hüyange nange imante mongmengma-a, hüyange wepa kahmükte üjai yejema-a ü-o me phowe tailakne iman yoi wepa yakme phünne phama-a;

⁴⁷hüpoi iman yoi wepa kahmük me ngohwante yoi nying nyingke teihtüowe nang yekaote lüpma-a, hüyange iman küppe angpu kahtok me ngohyange nangte, ‘Toman-e ünu om, hüyange püohpinne ling, toman-e yemeipe jon she yoppe tongma-a’;

⁴⁸yoi wepa kahtok me hüyange iman küppe angpu kahtok me ngohyange iman-e yoi kenmong üsheiye hüyange iman yaha üsheiye nang tangte lüpma-a, hüyange nangte iman-e yoi kahtok yekao me hanghepa nange iman payimlante pha, hüyange hanghepa nange le, hüyange hanghepa taowe nang min me taowe ling, tüopate leiye yopma-a;

⁴⁹hüwante iman-e yoppu hüyange tongpu nange nang nyoijing wangdang mepu jaipha hüyange iman wongpong lanke angtam pha.

⁵⁰Hüyange nange kahta aowe ünu om imante ümeng winshih, hüyange nang phei tüi-e iman-e hanghe me ünu om hatüo winpha hüyange iman aoyin phowe tei iman sheshao me shüpshe hüotamtüoh;

⁵¹hangjingne iman nang kahtalan hüyange nang mothleipalan, iman nange Egypt kahtok shanghah shaoshi mepu woiye yah pei.

⁵²Okkeshangpupa Youngwanpa, nang shaoshanpawe yoppe tongpu mepu hüyange nang kahta Israellan-e yoppe tongpu mepu iman-e aope nangte üngwünlakei, hüyange yoppe tonglakei, nange na epyange hüyange jaipha.

⁵³Hangjingne nang mothleipalan-e menglak jingne nange iman kahtoknyu jatlan yo mepu yanne tam, hüyange nang shaoshanpa Mosa yak kaiye nange ngao hüyange O Youngwanpa Kahwang, nange toman payimlan Egypt kahtok mepu woiye pei.”

⁵⁴Sha-a aope Solomon-e Youngwanpate yoppu hüyange yoppetongpu üküm ngoiye pei, yatuh shingyange yoppu hüyange wangyekaote yak hongyange yoppu mepu hüyange Youngwanpa wümjong mepu I yayonge ye.

⁵⁵I yong, hüyange jem-e ngohpu Israel lante üngwün-e moiman phatam-e i,

⁵⁶“Youngwanpa aowe yoi shaoshanpa Mosa yak kaiye jan, Iye janpu ja me nehoi Iye ye-okpu ye-ngetam, hüyange Iye janpu kih-e yoi kahta Israellante Iye toloimei phapu jingne I moimanpupa.

⁵⁷Youngwanpa Kahwang toman jing pajeiyonglan phei ngohpu kih-e toman phei ngohpha, Iye teman tahtüoh ye-i-ma-a teman winne tah ang;

⁵⁸teman kenmong I yekaote lüplak, hüyange I lamnyu me kemlak, Iye teman payimlante phapu nyanpu ngaokhüm anglak hüyange linglak ngaokhümlan anglak nanjingne Iye jampha.

⁵⁹Tüolan ü-ngao hanghepa taowe Youngwanpa sheshao me yoppe tongnang, tüolan wangnyak wangngai teman Kahwang Youngwanpa ü-o me ngohtam tüoh, hüyange nyihjeih she wongpong ne ngaipu kih-e, yoi shaoshanpa hüyange kahtalan üyin shinne angpha.

⁶⁰Hümme nakshih Youngwanpa Kahwang hüyange I lepu ao-o yenang she kahtoknyu jatlan-e shinglak.

⁶¹Tüokhei numan mongjang üsheiye ütingpa me Youngwanpa teman Kahwang me angtam tüoh, hüke tenyihpu tüopa nyih kih-e, I nyanpu ngaokhüm me hüyange I ngaokhümlan me kemtüoh.”

⁶²Tüophei me Solomon ahngpa hüyange Israellan hangshin I phei ngoh, khongkümpuwe Youngwanpate toidopu pha.

⁶³Solomon-e chingmei dopu Youngwanpate do, mahu üpong haja da me ni, hüyange nyee lakh ja haja da ngoiye dopu pha. Hükih-e ahngpa hüyange kahtalan lili-e khümjing jaowe tam.

⁶⁴Tüopa nyih memuh ahngpawe Youngwanpa nok sheshao me ngohpu ngaophünlak gho nyoi jaowe tam; hangjingne tüoken me jakke dopu, hahying dopu, hüyange üyao hei chingmei dopu pha, hangjingne Youngwanpa nok sheshao me ngohpu wümjong me jakke dopu, hahying dopu hüyange üyao dopu phalak nyoi yeonge shoi ngohyangki.

⁶⁵Tüokhei Solomon-e tüopa hipak me mo tüm, hüyange I phei ükhong üngang Israellan khongkümpu Hamath mepu Egypt yengyin ngoiye, hüyange Kahwang Youngwanpa sheshao me nyih nyit mo ngoh yangki.

⁶⁶Hüyange tet shepupa nyih me, Iye ükhonga yanne tam, hüyange kahtalan-e ahngpate moiman phatam, hüyange Youngwanpawe I shaoshanpa David hüyange Israellan te ümei lingpu jingne mongmei sheiye yoi nyenokte leihye.