Read Konyak Naga 1 AHNGPALAN 9 Bible Online

1 AHNGPALAN 9 - Konyak Naga bible

1 AHNGPALAN 9

¹Aope Solomon-e Youngwanpa nok, hüyange ahngnok hüyange Iye linghuwe ngohpu khongküm tüm-e pei,

²Youngwanpawe Solomon shongte, Gibeon me ngaipuke nishe ngai.

³Youngwanpawe Ite i, “Ü-sheshao me nange yoppe tongpu hüyange yoppu jaiteki; Ü-min jinte ngohlak jingne Taowe nange wepu nok jaowe tamteki. Hüyange ü-mük hüyange ü-mongjang jinte üküm yenangpe tüoken me ngohlak.

⁴Hüyange nangpa David kempuke nange ü-sheshao me üjaopa me ngaotingpa mongjang me kemma-a, hüyange Taowe nangte ngaowe tampuke lingma-a, hüyange ü-nyanpu ngaokhümlan hüyange linglak ngaokhümlan angma-a,

⁵Taowe nangpa David te ngaowe janpuke, nang ahngching Israel tangme Taowe nang jinte ahngne tamlak, hüyange, ‘Aope-o nang Israel ahngching tangme ye-okpu ye-ngetam lak.’

⁶Hüpoi numan-e hüyange numan hayimlan-e ü-mepu yanma-a, hüyange Taowe ngaowe tampu hüyange ü-nyanpu ngaokhüm ye-angma-a, hüyange yanne taiye ülao kahwanglan shaoshan ma-a, imante khüma-a,

⁷hüwante Taowe imante phapu kahmük mepu Israel lange winlak, hüyange tüopa nok hanghepa ü-min jingne jaowetam, ü-mepu Taowe winlak, hüyange Israel eiha jat sheshao me detngao hüyange ngaoleppu me jonpu jat ja ne menge mahlak.

⁸Tüopa nok khüw-e menglak, hüyange linne onge peipalan khongkümpuwe ngeye yashanlak, hüyange iman-e haimahpuwe ngaowe ilak, ‘Hangne Youngwanpawe tüopa kahmük hüyange tüopa nokte hüke lingetam pu?’

⁹Hüwante iman-e ilak, ‘Hangjingne iman-e yoi payimlan Egypt kahtok mepu peipu Kahwang pemeiyange, ülao kahwangte menge khüm hüyange shaoshan; tüokhei Youngwanpawe iman tangte tüopa ünu yahpei nang.’ ”

¹⁰Solomon-e wangpeng da hipak yah-e khümjing hüyange yoi ahngnok we peipu üküm yeme;

¹¹sha-a Tyre ahngpa Hiram-e Solomon jingne cedar hüyange yankhekpe phei, hüyange Iye yah hupu kih-e hon phei wetam, tüokhei Solomon-e Hiramte Galilee kahtok me chingnyu da pha.

¹²Hüpoi Hiram-e Tyre mepu Solomon-e Ite phapu chingnyu lante leilak jingne pei, iman-e Ite mongmei ne yetam.

¹³Tüokhei Iye i, “O, Ü-jeiheinao, nange üte phapu chingnyu lan-a hangkih pu lan shi?” Tüokhei Iye tenyih te ngoiye tüolante Cabul (ühak yekohpu) kahtok she nyik.

¹⁴Hüpoi Hiram-e Solomonte hon kilogram haja peli phei nyeiye shonne tam.

¹⁵Hüyange Solomon ahngpawe Youngwanpa nok, Inok, hüyange Megiddo, hüyange Jerusalem jant hüyange Hazor hei Gezer linglak jingne kangpunan yah.

¹⁶Egypt ahngpa onge Gezer ching hah, hüyange vünne jakke tamyange tüopa chingnyu me ngohpu Kananlan toi, hüyange tüopa chingnyu yoi yhala Solomon shekote hünghao ne pha;

¹⁷tüokhei Solomon-e Gezer nishe wetam hüyange Beth-Horon chingphang ye,

¹⁸hüyange Baalath hei Tamar Judah kahtok phaonyu jongme,

¹⁹hüyange chingnyu chingha me Solomon toinan angjing nyoi khongküm, hüyange I pong tongtoilan jingne chingnyu, hüyange Solomon ne yoi mongmeilak jingne hanghe Jerusalem me linghuwe teih, tüolan-a ling; hüyange Lebanon hei yoi ahngching me khongkümpu ling.

²⁰Amorlan, Hitlan Perizzlan, Hivlan, hüyange Jebuslan, aoyin Israellan ne yeje,

²¹iman hayim aoyin kahmük mepu Israel kahtalan-e jaosheye mahtampu ye-ok, iman mepu tenyihte ngoiye Solomon-e kangpunan ne hüyange rha ne jonnang.

²²Hüpoi Israellan yo mepu-a Solomon-e ao-o rha ne ye-ang; iman-a wetaipalan ne, iman-a üyonglan ne, woipa ütahpane, gho ja woipa ne, hüyange Ijing pongtongtoi hüyange koipong pheipu lan ne ang.

²³Solomon toishao me ütahpa woipalan-a gho nga phei me denga ngoh yangki; toilingpalan tangme iman-e woilak wong ngohyangki.

²⁴Hüpoi Egypt ahngnok yhala David chingnyu mepu ngaiye, yhate Solomon-e wetampu nokte pei, hüwante Iye chingnyu heongye kahkook phünge tam.

²⁵Wangpeng ja me lümme Solomon-e jakke dopu, chingmei dopu, Youngwanpa jingne lingpu wümjong tangme phawe pei, Youngwanpa sheshao me ngohpu wümjong me sünyet jakke dowe pei. Tüokhei Iye khümjing wepuwa sho.

²⁶Hüyange Edom kahtok Ütak yengching nahme hanghepa Eloth ü-o me ngoh, tüoken me Eziongeber me Solomon ahngpawe yenglin ling.

²⁷Hüyange Hiram-e yoi shaoshanpalan, yenglin woipalan aoyinne yengching me woilak shinge ngoh, Solomon shaoshanpalan phei shon.

²⁸Hüyange iman-e Ophirte pei, hüyange hon kilogram haja penme peli tüomepu Solomon tangte yahye.