Read Konyak Naga 2 AHNGPALAN 10 Bible Online

2 AHNGPALAN 10 - Konyak Naga bible

2 AHNGPALAN 10

¹Sha-a Samaria chingnyu me Ahab hayimlan denyit ngohyangki. Tüokhei Jehuwe nyanpulai ja nyan, hüyange Samaria te Jezreel wanglam lampalan tangte, hüke lwngmeilan hüyange Ahab hayimte leipalan tangte shonne i,

²“Sha-a tüopa nyanpu lai numan tangte ngoipu phei jamshe, numan nokpu hayim, hüyange numan phei tongtoilan, hüyange koiponglan, üne-o chingtuk penyuwe neikonyange ngohpu chingnyu, hüyange hoklak yonglah, numan phei ngohtepuwe,

³numan ahngpa hayim yo me shemeipupa hüyange wangngoipupa ja letüoh, hüyange Ipa ahngpa shotjing me I shotne tamtüoh; hüyange I yinlak jingne numan-e hoktüoh.”

⁴Hüpoi iman yeonge nyam, hüyange hüke i, “Leihuyah ahngpa niye I sheshao me yeyong ok; hüma-a teman-e Jehu sheshao me hangke yonge oklak?”

⁵Tüokhei ahngnok yompu tepu nokpu, hüyange chingnyu kahpalan tepu üjenglan, hüyange lwngmeilan-e hüyange aoyinne ahngnok nahalante leinang, tüolan mepu ngao Jehute hüke shonne i, “Toman-a nang shaoshanpalan ngohnang, hüyange nange hanghe ilakei linglak jingne toman ngohnang. Hüpoi toman-e ao-o ahngne menge yetamhu; nang mükte hanghe meilak she teih, tüopa lingtam tüoh.”

⁶Jehuwe imante nishepupa nyanpulai shonne i, “Numan ü-phei ngohpu ne mengma-a, hüyange ü-ngao phapulan jaiye woilakei she ima-a, ngainyih hakih tingme Jezreel me Ahab ahngpa hayimlan shang phünne peikei.” Sha-a Ahab ahngpa hayim denyit ne menge, chingnyu me kahta üyonglan, aoyinne iman tam-e ok, iman phei ngoh yangki.

⁷Aope nyanpu laiye iman ngoi, iman-e ahnghalan yah, hüyange iman toi, hüke kahta denyit hüyange iman shang do üyong ja me ang, hüyange I tangte Jezreel te tüolan-a shon.

⁸Aope Jehu tangte ngaolan kipa pei hüyange i, “Iman-e Ahab hayimlan shang yahpeiteki,” Iye ngaophawe i, “Numan-e tüolan-a ngainap te ngoiye peten me üphong ni ne phonge angtüoh.”

⁹Hüyange napning I petente wen, hüyange yong, hüyange kahta khongkümpute i, “Numan ngaoting ipalan ngohnang: leihuyah taowe ü-nokpu ahngpa phei tüi-e kon ümeng kon, hüyange I toi. Hüpoi tüolan khongkümpu aohiye toipu?

¹⁰Sha-a shingyah, Ahab noksa jeng Youngwanpawe ngaopu Youngwanpa ngao hango kahtokte yeyeilak. Hangjingne Youngwanpawe I shaoshanpa Elijah kaiye ngaopu lingteki.”

¹¹Tüophei me Jezreel me Ahab noksa towe ngohpu khongküm, hüyange I kahtalan üyong hüyange I pheipu shümpalan khongküm, hüyange I jing ngengpalan, Iye ao-o towe yetüohpe Jehuwe toiküm.

¹²Samariate tailak jingne Jehuwe Jezreel tüohyange yayong. Lamme, “Nyeeyompa lakjing” she nyikpu nyoi me,

¹³Iye litepu Judah ahngpa Ahaziah pheipulan hüo, hüyange imante tong; “Numan aoyin shi?” Iman-e jan-e i, “Toman Ahaziah pheipulan ngohnang. Toman Ahngyha Jezebel hayim hüyange ahngnok phong üyonglante salam phane Jezreel te tainang.”

¹⁴Jehuwe yoi kahtalante ngaophawe i, “Iman üyin me yahtüoh!” Hüyange iman-e iman üyin me pho, hüyange Iye tüopa phin me ngohpu kahkook me iman toi. Iman khongküm kahta deli me ni ngohyangki, hüyange sheja nehoi üyin me yetüoh.

¹⁵Aope Jehu üne-o tüomepu yayong, I pongte yupu Rechab üha Jonadab phei I hüo; hüyange Jehuwe Ite salam pha hüyange i, “Ü-mongjang nang phei ngohpu kih-e, nang mongjang khakshuwe ngohyah?” Jonadab-e jan, “Tao hüke ngohnang.” Jehuwe jan-e i, “Hüma-a, nang yak üte yahkei.” Jonadab-e I yak leetam, Jehuwe shuwe yah-e I tongtoi me shotne tam.

¹⁶Iye i, “Ü-phei te kei, hüyange Youngwanpa jingne tao hangshin lahnyik nange leiyah.” Tüokhei I tongtoi me jam-e shotyange Samariate yayong.

¹⁷Aope iman tüote ngoi, Jehuwe Ahab pheipulan khongkümpu toi, ja nehoi towe yetüoh. Hatüowa Youngwanpawe Elijah te ngaikülak she ngaowe tampu ngaiyangki.

¹⁸Jehuwe Samaria kahtalan khongkümpu te nyik hüyange jemne tam; hüyange hüke i, “Ahngpa Ahab-e Baal üjingha hei shaoshan; hüpoi Jehu taowe I yeonge shaoshanlak.

¹⁹Tüokhei sha-a ü-tangte Baal hipalan khongküm, Ite khümpalan khongküm, hüyange I jing ngengpalan khongkümpu nyik jemtüoh. Ao-o yepeipe angne tahtam; hangjingne taowe Baal te toidopu üyong linglak ne ngohnang; aoyin ye-omlakei, I üyin yengohlak.” Hüpoi Baal te khümpalan mahtamlak teihyange Jehuwe kon phei hatüo ling yangki.

²⁰Tüophei me Jehuwe ngaophawe i, “Baal jingne wangshüm hüowe bangjem üyong ja jaowe shawe nyoitüoh!” Hüyange ngaolan pongpu yanne tam;

²¹hüyange Israel kahtok üshei yete ngaolan shon. Aoyinne Baalte khüm, khongkümpu pei; yepeipu ao-o yenangpe ngoh. Hüyange iman khongkümpu Baal khümjing te ong; hüyange Baal khümjinga jaye üshuk mepu jaye üshuk ngoiye maawe ngoh yangki.

²²Tüophei Jehuwe ngeng-ahng phakshaoh yakjongpa ngengpate ngao phawe i, Baal te khümpalan khongkümpu jingne ngeng-ahng phakshaoh yah peikei. Hüyange Iye imante ngeng-ahng phakshaoh yah pei.

²³Tüophei me Jehu, hüyange Rechab üha Jonadab, Baal khümjing nokte ong; hüyange tüome jem-e ngohpu kahta lante i, “Baal te khümpalan tokte kaiye, tüome numan phei Youngwanpa shaoshanpa ao-o yenanglak jingne yamtüoh, hüyange leitüoh.”

²⁴Tüophei me Jonadab imni Baal te jakke dopu toidopu phalak jingne ümongte ong. Sha-a Jehuwe kahta detet leyange nokshao me tanne angne tam, hüyange imante hüke i, “Taowe numan yak me phapu kahtalan ütamja nehoi taine tamma-a, aohepawe I yinne tamlakei, I üyin-a I üyin nanleiye ngohlak!”

²⁵Iye jakke dopu shopuphei jamshe, Jehuwe tanne ngohpalan hüyange woipalante i, “Ongtüoh, hüyange iman khongküm toitüoh, aohi-o yinne tahtam!” Yanglow ünah phei iman ong, khongkümpu toi, hüyange nokshaote mang shuiyüo. Tüophei me iman ümongpa khümjing üjao nyoite ong;

²⁶hüyange Baal nok me ngohpu üjao shongnyu yahyüo, hüyange tüopa vün me jakke tam.

²⁷Tüokhei iman-e üjao shongnyu hüyange khümjing menge tam, hüyange khümjinga jeamtai jingne menge tam, hatüo hüke tenyihte ngoiye ngohnang.

²⁸Hüke linge Jehuwe Israel mepu Baal mahne tam.

²⁹Tüoyangpoi Nebat üha Jeroboam ünu hanghe kaiye Iye Israel ünu omne tam. Bethel me, hüyange Dan me ngohpu hon mahu üha, hanghepa Iye ling, tüopa ünu-a Jehuwe yewintüoh.

³⁰Hüyange, Youngwanpa Jehute i, “Ü-sheshao me hanghe shunang, hatüo nange lingteki. Hüyange ü-mongjang me ngohpuke Ahab noksate lingpu nanjingne, jin peli shepupa ngoiye nang hayimlan-e Israel ahngpa shotjing me shotlak.”

³¹Hüpoi Jehuwe yoi mongjang khongkümpuwe, Israel Kahwang Youngwanpa ngaokhüm me kemlak ken yetingpe ngoh. Iye Jeroboam ünu, hangheye Iye Israel ünu jonne tam, tüopa mepu yeyan.

³²Tüopa nyih hipak me Youngwanpawe Israel shoiye tamlak jingne ükong wang. Hüyange Israel yikeng üshei yekao me (Syria ahngpa) Hazael-e iman nao.

³³Hüke Jordan heong yekao Gilead kahmük khongküm, Gadlan, Reubenlan, hüyange Manassehlan kahmük khongkümpu me Aroer mepu hanghepa Arnon yengyin ü-o me ngohnang, hüke Gilead hei Bashan ngoiye.

³⁴Sha-a towe ngohpu Jehu toishao hüyange Iye lingpu khongkümpu, hüyange I mongyonge wongnangpu khongküm, Israel ahngpalan putahpangao laitep me nyanne ngohnang.

³⁵Hüyange Jehu ipayimlan phei shi; hüyange iman-e Samaria me, muwe tüoh. Hüyange Iha Jehoahazwe I nanleiye ahngne meng.

³⁶Hüyange Samaria me Jehu ahngne mengpu hipak-a wangpeng da me tet ngoh yangki.