Read Konyak Naga 2 AHNGPALAN 11 Bible Online

2 AHNGPALAN 11 - Konyak Naga bible

2 AHNGPALAN 11

¹Sha-a ahngpa Ahaziah Inyu Athaliahwe yha üha toiteki she shinge peipu phei jam she yha yayong, hüyange ahngnok kahtalan khongküm toiwinlak jingne ngao pha.

²Hüpoi Jehoram ahngpa ahngyha (Ahngpa üha) Ahaziah jeiheinao Jehoshebawe Ahaziah üha Joash lowe yah hüyange ahnghalan toipu yo mepu lowe yahtei, I hüyange Inyei khümjing me shipu tüp me lowe ang; hüyange iman-e Athaliah mepu I lowe jüowe ang, tüokhei I shaha toipu me ye-ompe yinne ngoh yangki.

³Wangpeng wok mongme Jehoshebawe naha-a yeonge meiye pao hüyange khümjing me I lowe ang, tüohipak me Athaliah ahngyhawe wanglam lam.

⁴Hüpoi wangpeng nyit shepupa me Jehoiada ngengpawe ahng gho yompalan woipa hüyange ahngnok yompalan nyiklak jingne shon; hüyange iman Youngwanpa khümjing nokte woi pei; hüyange Iye iman phei jiengjeppu ja yah, hüyange Youngwanpa nok me imante jiengne tam, hüyange imante ahngpa üha hüowe tam;

⁵Iye imante ngaophawe i, “Numan-e hatüo lingtüoh; aope numan Sabbath me ahngnok yomlak jingne peilakeih, numan meitam lüm shepupawe ahngnok yomlak;

⁶hüyange meitam lüm shepupawe Sur peten me yonglak, hüyange meitam lüm shepupa-a yompalan tokphei me peten me ngohlak; hüke numan-e nok-a yomlak, hüyange tienpu ja ne menglak.

⁷Hüyange numan ükhong ni, Sabbath nyih yomlak jingne peinang, tüolan-a ahngpa neikonne Youngwanpa nok yomme ngohlak.

⁸Hüyange kahta lili yoi yak me ngouyang jonyange numan-e ahngpa neikonne kamyange ngohlak; hüyange aowe neikonne ngohpu kaiye onglakeih, I toitam tüoh; hüyange aope ahngpa ngailakei hüyange aope I onglakeih, numan I phei ngohtüoh.”

⁹Jehoiada ngengpawe ngaophapu ülam kih-e woipalan-e ling; Iman kahta lili-e, kahtalan aoyin Sabbath nyih onglak ne ngoh, hüyange aoyin Sabbath nyih ngailak ne ngoh iman woijem, hüyange Jehoiada ngengpa tangte pei.

¹⁰Hüyange ngengpawe gho ja woipate ngou hei ree hanghepa David jing Youngwanpa nok me ang, tüolan ngai pha.

¹¹Hüyange yompalan-a kahta lili ngouyang jonyange khümjing nok heyekao mepu apyekao ngoiye, ahngpa neikonne yongne tam.

¹²Hüwante ngengpa Jehoiadawe Joash woiye yüo, hüyange Ite ahngpa shaoshaoh shaoh tam, hüyange ahngching ngaokhüm laitep Ite pha. Tüophei me Joashte minnga phowe tam, hüyange iman-e I-a ahngpa she üngwün. Kahtalan-e iman yakpha khok, hüyange hüke üngwün “Ahngpa jin laowe ngohtüoh!”

¹³Aope Ahngyha Athaliahwe yompalan hei kahtalan-e üngwünpu hei moppu jai; yha khümjing, ümeken me kahtalan üngang jem-e ngoh, ngoine phet.

¹⁴Aope tüome yhawe lei, leihuyah, wanglam kih-e, ahngpa üla-a khümjing tafün shongme yong; hüyange I-a ghoja woipalan hüyange nyawong wüngpalan-e neikon yange, hüyange jempu kahtalan khongkümpuwe hoongli mongong puphei üngwün hüyange nyawong wüng. Hüwante Athaliahwe mongshih ngaiye yoi inkhek hit hüyange üngwün, “Khüwtampu yang! Khüwtampu yang!”

¹⁵Hüwante ngengpa Jehoiadawe nyahpong woipalan yo me leyange angpu ghoja woipate ngaophawe i, “Khüng lenge yonge ngohpu pa me yha woi teitüoh, hüyange aohipawe yha yintamhuwe woilakei yanglow-e toitüoh.” Hangjingne ngengpawe inang, “Yha Youngwanpa nok me toine tahtam.”

¹⁶Tüokhei iman-e yhate yak yuwe pho; hüyange ahngnokte ongpu koilam peten pongme iman-e yha toi.

¹⁷Ngengpa Jehoiadawe Ahngpa Joash hüyange kahtalan iman Youngwanpa kahta ne menglak she jiengjeppu ja lingetam; üne-o Iye ahngpa hei kahtalan nipa me-o jiengjeppu linge tam.

¹⁸Tüophei me kahta lili Baal khümjing te tai, hüyange hatüo mengetam; iman-e wümjong hüyange kahyak jaosheye menge wen, hüyange Baal ngengpa Mattan, wümjong shong me toi. Hüyange Jehoiada ngengpawe khümjing yomlak jingne we yompalan tüoh.

¹⁹Tüophei me I woipalan, gho yompalan, hüyange ahngnok yompalan-e Youngwanpa nok mepu ahngnok ngoiye kahtalan khongkümpuwe shomme aiyange ahngpa-a woiye tai. Joash ahngpa gho peten lamme ong, hüyange ahngpa shotjing me I shot.

²⁰Tüokhei kahmük me kahta lili hoongli mongong hüyange chingnyu-a toloimeiye wüngmakke ngoh yangki, hüyange ahngnok me iman-e Athaliah toi.

²¹Joash Judah ahngne meng wante nyupuh wangpeng nyit me ngoh yangki.